پەکەکە: جە ٤٣مین ساڵیادمانە کۆشای و دەستکەوتێ گەورێ ئینێ ڕاوە

٢٧و نۆڤەمبەری ٤٣ ساڵێ سەرو کۆشای و ئەرەمەرزنای پەکەکە-یەرە دەرباز مەبۆنە و ئا پارتە ئاشکراش کەردەن: جە ٤٣مین ساڵیادمانە، کۆشای و دەستکەوتێ گەورێ ئینێ ڕاوە و شکستدای بە فاشیزمی، سیستمو گۆشەگیری ئیمرالی و ئەرەگێرتەیی تورکیای جە کوردستان، نزیکەن.

٢٧و نۆڤەمبەرو ئێساڵی، پارتو کارگەرانو کوردستانی (پەکەکە-PKK)، هامتەریب چەن گەلو کوردی و ئازادیوازێ جیهانی، ٤٣مین ساڵەو ئەرەمەرزنیاش پیرۆزە مەکەرۆن. کۆمیتەو ناوەندی پەکەکە بە ئی بۆنەوە ئەرەیونایێوش دان و جە میانشەنە دەستنیشانش کەردەن: "٤٣مین ساڵیادمان مەکەرمێ بە ساڵەو کۆشاییشی گەورەی و بەدیئاوردەی دەستکەوتەکان، شکستدای بە فاشیزمو ئاکەپە/ مەهەپە-ی، هۆرشانایۆ سیستمو گۆشەگیری ئیمرالی و دمایی ئاوردەی بە ئەرەگێرتەیی ڕژێمو تورکیای جە کوردستان".
پەکەکە بانگەوازیش جە گرد کەسێ و لایێ کەردەن، هامشان چەنی گەریلای، بە ئیرادەی پۆڵایینەوە بەشداری هەڵمەتو 'کات کاتو ئازادییەن' بکەرانێ و مدرامن کۆشاییش دژ بە فاشیزمی وەرفرتەرە بکەرانێوە.

تەمامی ئەرەیاوناکەو کۆمیتەو ناوەندی پەکەکە-ی:

"ئێمە چوون گەل و جمیەر، ئینایمێ جە ٤٣مین ساڵیادو ئەرەمەرزنارەی پەکەکە-یەنە،  جە ٢٧و نۆڤەمبەریەنە پارتەکەمان ٤٢ ساڵێ جە خەباتی و کۆشای شۆنەو وێشەرە مازۆنە جیا. بە ئی بۆنەوە ٢٧و نۆڤەمبەری، جەژنەو ئەوەژیویای نەتەوەیی، جە ڕێبەر ئاپۆی، سەرجەم هامڕاکێمان، گەلە وڵاتپارێزەکەیمان، دۆستێ شۆڕشگێڵێ گەل و جمیەرەکەیمان و کەسانێ دیمۆکراتیوازێ پیرۆز مەکەرمێنە. جە ٤٣مین ساڵیادو کۆشایشی و ئەرەمەزنارەیمانە هیواو سەرکەوتەی پەی گرد لایێ مەوازمێنە و جە کەسایەتی یەکەم شەهیدیمان (هەقی قارەر) و سەرجەم شەهیدێ ٤٢ ساڵێ ویەرەدەنە، جە کەسایەتی شەهیدە هامڕێکێمان (قاسم ئەنگین، لەیلا ئاگری، عەگین جڤیان، ئامارا باتمان و یلماز دەرسیم)ینە، بە رێز و شکۆمەندیەوە یاد جە سەرجەم شەهیدان مەکەرمێنەوە و بەڵێنشان پەی دووپات مەکەرمێنەوە کە ئامانجەکانشان بەدی باوەرمێنە و خاوەنداری جە یادەوەری و ڕێبازەکەیشان بکەرمێنە.

ئاشکران کە ئێمە چوون پارت و هەرپاسە گەل جە ٤٢مین ساڵەو خەباتیمانە، خەباتێوی گەورەمان بەردڕاوە و هامکات چەنڎین شەهیدێ بەنرخێمان دێ.ک کە دمایینشان  ئەندامو کۆمیتەو ناوەندی پەکەکە-ی و فەرماندەو هەپەگە-ی جە ئیالەتو دێرسیمی هامڕامان (یلماز دەرسیم، ئەشناسیا بە ئیسماعیل سورگەچ) بێ کە جە ٢٠٢٠/١١/١٠ی جە جەنگەنە دژ بە سپا فاشیستەکەو تورکیای جە دێرسیم شەهید بی. هامڕا یلماز دەرسم چوار دەیێ دلێ کۆشای و گەریلایەتینە پەی ئازادی و ڕزگاری کوردستانی، بە شێوازێوی قارەمانانە کۆشیا و جەنگیا و چوون میلیتانێوی ئاپۆیی فرەتەرین تەمەنش جە کەش و کۆکانو دێرسیمینە بەسەر بەرد و بی بە ڕۆحیاەتو سەید ڕەزای و عەلیشێرەکان و جە ٨٣مین ساڵیادو جەداردای سەید ڕەزایی و هامڕاکانشەنە پەی تۆڵەکەردەی ئاڎیشا و قوربانیەکێ کۆکوشی دێرسیمی جەنگ و کۆشای گەورەش بەرپا کەرد و دەرەنجام جە دمای مدرامانی قارەمانانەی پەیوەست بە کاروانەکەو سەید ڕەزای و شەهیدا بی. هەر پۆکەی بە ڕێزدای و شکۆمەندییەوە یاد جە ئی ڕۆڵەو دێرسیمی و مسیارەو ڕبەر ئاپۆی مەکەرمێنەوە و بەڵێن مڎێمێ؛ تۆڵەش بکەرمێوە و ئامانجش بەگاباوەرمێ.

هاموەخت ئینایمێ جە ٢٥و نۆڤەمبەری ڕۆو جیهانی بەرەنگاربییەی توندوتیژی دژ بە ژەنانە و بە ئی بۆنەوە جە کوردستان و وڵاتێ جیهانیەنە، دژ بە زیهنەیت، سیاسەت و ئەقلیەتی پیاسالاری، دژ بە دەستدرێژیکەردەی، لاقەکەردەی و کۆکوشی ژەنان، ژەنی ئینێ خەبات و کۆشایەنە. بە ئا ژەنەلۆژیەوە کە ڕێبەر ئاپۆی خوڵقنان، بە نامێ پارتەکەیماوە، سڵام و ساتییش مەکیانمێ پەی مدرامان و کۆشای ژەنا. ئەرەمەرزنارەی پارتیمان و ٢٥ نۆڤەمبەری ئامێتەو کۆشیای ئازادی ژەنێ مەکەرمێ و پەی سەروستەیش مەکۆشمێ. چونکە ئێمە (پەکەکە) کۆشای و خەبات دژ بە سیاسەت و زهنیەتو پیاسالاری، چوون کۆشای شۆڕشگێڵی و ئازادۍپارێزنانی مەوینمێ. پەی سەروستەی ئا کۆشاییشە کە وێش مەسپارۆنە بە فرەڕەنگی و ئازادی گلێرگەی، گرد هەوڵێ بڎێمێ و درێخی نەکەرمێ. باوەڕمان هەن کە کۆشای جە ٢٥ نۆڤەمبەریەنە دژ بە نێرسالاری و توندوتیژیەکێ دەوڵەتی بەهێزتەر ببۆنە و سەرکەوتەی پەی کۆشایە موازمێنە.

جە ٤٢مین ساڵمانە، ڕاستینەو ڕابەرایەتی و پەکەکە-ی بیێ ئامانجو هێرشو دلێنەبەردەی و نکۆڵیونەکەردەی کە ئەمەریکا و هامپەیمانی ئەمەریکا/ دەوڵەتو تورکیای و پەدەکە بە شێوازی پیلانپەیکریا پێشەنگیش مەکەرانێ. جە ئی هێرشەنە کە چوون نوکەردەوەو گەلەکۆمەی میاندەوڵەتییەن، گەرەکشان بێ جە باکور (سەرنیشت)، ڕۆژاڤا (وەرکەوت) و باشور (پانیشت)و کوردستانی جمیەرو ئازادی دلێنەببەرانێ و ئا یەرە بەشەیە بە تەمامی داگیرێ بکەرانێ. هامکات بە فاشیت-قڕکەر و گردگیر کە سیستمو گۆشەگیری و ئەشکەنجەو ئیمرالیش کەردەن بە دلێگەو وێش، ئامانجشان بێ ڕاستینەو ڕێبەر ئاپۆی و پەکەکە-ی بێکاریگەرێ بکەرانێ و دەرەنجام کوردی ئازادی دلێنەببەرانێ و هێرشی قڕکەر کە سەد ساڵێن پیلانەش پەی مەکەران، بەئەنام بیاونانێ. پەی یاوای بەئانەی هەرچی ئامرازێ و ڕێبازێ بێنێ بەکارشان ئاوردێ. بە گرد شێوازێ ڕێککەوتەی و یەیمانێ دژمان مۆرێ کریێ. سەرجەم شێوازێ و هێرشێ دڕندانێ و نامرۆڤانێ و تاوانێ، فشارێ و کۆمەڵکوشیێ دژمان ئەنجامێ دریێ. دژ بە ئی هێرشا بە تایبەت ڕێبەر ئاپۆ، بە گردی پارتەکەمان، گەریلاکێمان، جمیەرو ژەنا و جەوانەکێمان، گەلەکەمان و دۆستەکێمان، قارەمانانە ئینێ مدرامان و جەنگی شۆڕشگێڵییەنە و هێرشە فاشیزمێ و قڕکەرەکێشان شکست دێنێ و پیلانێ و ئینکاریکەردەی دوژمنیشان مایەپووچ کەردەنەوە. جە هەڵمەتو جەنگو هەفتانین-یەنە، گەریلاێمان گورزی فرە قورسش جە دوژمنی هێرشبەری دا و پەی یاوای بە ئامانجی ڕۆڵی پێشەنگانەشان گێڵنا. جە (١٢و ئەیلول)یەنە، کۆنسەو کەجەکە-ی دەستش کەرد بە هەڵمەتو 'گۆشەگیری، فاشیزم و ئەرەگێرتەیی ئیتر وەسێن، کاتو ئازادییەن'. بە ئی هەڵمەتیە گەریلا و گەل ئامانجو وێشان دیاری کەرد کە هۆرشانایۆ فاشیزمو ئاکەپە و مەهەپە-ی و سیستمی گۆشەگیری و ئەشکەنجەی ئیمرالی و ڕزگاریکەردەی مرۆڤایەتیی و ئازادی ڕێبەر ئاپۆی و کوردستانیەن جە  تیرۆر و  فاشیزمی. سەرو ئا بنەمایە هامتەریب چەنی مدرامان و جەنگو گەریلای، گەلەکەمان جە بەر و دلێ وڵاتیەنە چەنی هێزە شۆڕشگێڵ و دیمۆکراتەکان بەشدارێ هەڵمەتەکەی بیێ بە ئا ئامانجە ڕێبەر ئاپۆ ئازاد بکریۆن، کوردستانی ئازاد و وەرکەوتی میانی دیمۆکراتیک بەدی باوەریۆن.
 
ئێمە چوون جمیەر و گەلەکەمان، بە هەنگامەو مدرامان دەربازێ ٤٣مین ساڵەو کۆشای پەکەکە-ی مەبێمێ. پەی ڕاگیرێ جە هەنگامەکێمان، هامپەیمانی ئەمەریکا، تورکیا و پەدەکە-ی بە ڕێککەوتەو شەنگالی هێرشی نوشان دەست پنەکەردەن و هەوڵ مڎانێ تا هێزە چەکدارەکێ پەدەکە-ی بکیانانێ سەرمان. ئی جۆرە گەرەکشانە ڕاگیری جە هەڵمەت، 'کاتو ئازادییەن' بکەرانێ و هامکات فاشیزمو ئاکەپە و مەهەپە-ی جە هۆرشنیای ڕزگار بکەرانێ و تەمەنش درێژ بکەرانێوە.بەڵام فرە ڕۆشن و ئاشکران کە ئی هەوڵەشان نەزۆکەن و هیچ وەختێ بە مەرام نمەیاوۆن. چونکە گەلە وڵاتپارێزەکەمان و هێزە شۆڕشگێڵێ و دیموکراتەکێ هەڵمەتو ئێمەشان قبوڵ کەردەن و جە شار و جە کەش بەبەردەوامی ڕێکوزیێکێ ژەنا و گەنجان، گەل و دۆستەکێمان پەیسەروستەیش بەبەردامی و کار ئینێ چالاکیێنە.

گومانمان نییەن کە بە ئی هەڵمەتەیە، ٤٣مین ساڵیادمان  مەکەرمێ بە ساڵەو کۆشاییشی گەورەی و بەدیئاوردەی دەستکەوتەکان، شکسدای بە فاشیزمی، هۆرشانایۆ سیستمو گۆشەگیری ئیمرالی و ئازادکەردەی ڕێبەر ئاپۆی و دمایی ئاوردەی بە ئەرەگێرتەیی ڕژێمو تورکیای کە جەلاو هامپەیمانەکانش و هامسایەکانشەوە پەراوێز وزیان و دلێنە ڕێزانەرە.چەنی ئەنجامەکێ هۆروچنای سەرۆکایەتی ئەمەریکای، ئاشکران کەئا ڕژێمە هۆربشنیۆوە. بێگومان بە چالاکییەکێ گەلی و دۆستەکێمان ئا هۆرشنیایە خێراتەر و قوڵەەر ببۆنەوە و دمایی بە ئەرەگێرتەیی تورکیا جە بەشەکێ تەرێ کوردستانیچ بەیۆنە.

سەرو ئی بنەمایە، ئێمە پێسەو کۆمیتەو ناوەندی پەکەکە-ی، جارێوی تەر، سەبارەت بە ٤٣مین ئەرەمەرزنای پارتەکەیمان، پێرۆزبایی جە ڕێبەر ئاپۆی، سەرجەم هامڕێکێ پارتیمان، گەلە وڵاتپارێزەکەیمان و دۆستەکێمان مەکەرمێنە و بانگەوازیمان پەی گرد کەسێ و لایێ هەن؛ تا کارا تەر و فراوان تەر جە ویەردەی بەشدارێ هەڵمەتو 'کاتو ئازادییەن' ببانێ و مدرامان و کۆشای گرد لایێوەرە گەش و وەڵاو بکەرانێوە.