ساروخان ئۆلوچ سەرۆکی فراکسیۆنی پارتی دیموکراتیکى گەلان (هەدەپە) لەبارەی ئۆپراسیۆنی پاکتاوکردنی سیاسیی دوێنێی دەوڵەتی تورک بۆ سەر هەدەپە بە ئاژانسی هەواڵی فورات (ANF)ی راگەیاند، دەیانەوێت بە دەستگیرکردن و زیندانیکردن هەدەپە پاکتاو بکەن. راشیگەیاند، ئۆپراسیۆنەکە بەشێک لە پلانی چۆک پێدادانە، بەڵام ئاکەپە – مەهەپە لە ناوخۆ و لە دەرەوەش سەرکەوتوو نەبوون و گەیشتوونەتە کۆتایی رێگاکە.

ئۆلوچ لە بەردەوامیی وتەکانیدا وتی، "ئەو ئۆپراسیۆنە بەردەوامیی پلانی چۆک  پێدادانی ٢٠١٤یە، کە دەوڵەتی تورک لە کۆبوونەوەى ئەنجوومەنى ئاسایشی نەتەوەیدا بڕیاری لێداوە. دەیانەوێت هەدەپە لەگەڵ هەموو هاوپەیمان و پێکهاتەکانیدا لە گۆڕەپانی سیاسەتی دیموکراتیک دا پاکتاو بکەن".

 ئۆلوچ وتیشی، خاڵی کۆتایی ئەو قۆناغە لە ساڵی ٢٠١٦ەوە بە زیندانیکردنی هاوسەرۆکەکەیان  و پەرلەمانتارانی تر دەستیپێکردبوو.  لێکۆڵینەوە لە روداوەکانی ٦-٨ی تشرینی یەکەمی ٢٠١٥ کە دەستیپێکردووە تاوەکو ئێستا دەوڵەت هیچ هەنگاوێکی بۆ هەڵنەگرتبوو. سەرباری بەرخودان لە دژی هەموو هەوڵە پاکتاوکارییەکانیان و ئۆپراسیۆنەکانیان دیسانەوە هەوڵ دەدەن بڵێن 'ئاخۆ ئێمە دەتوانین پلانی چۆک پێدادان سەربخەین'.

بە کۆتایی رێگاکە گەیشتوون

ئۆلوچ ئاماژەی بە تێکشکاندنی ئاکەپە – مەهەپە لە دەریای سپی، ئەگە و لیبیا کرد و وتی، ئیدی کۆمەڵگە زۆر گوێ لەو شتانە ناگرێت، کە ئاکەپە – مەهەپە لە عەفرین، ئیدلب، یان باکووری رۆژهەڵاتی سوریا ئەنجامیان دا. وتیشی، "لە سیاسەتی دەرەوەدا تووشی قەیران و ئاڵۆزی بوون و ئەوەى لە دەستیاندا مایەوە ئەوەبوو هێرش بکەنە سەر هەدەپە، دوژمنایەتیی کوردان بکەن، دوژمنایەتیی هێزە دیموکراتیکەکان و هەدەپە بکەن. تاقیی دەکەنەوە و دەڵێن، ئاخۆ ئەوە قازانجی دەبێت بۆیان یان نا".

ئۆلوچ هەروەها قەیرانی ئابووریی تورکیای بە بیرخستەوە و وتی، "دەیانەوێت ئەو دۆخەش بە رق و نفرەت بەرامبەر بە هەدەپە و زۆرکردنی وشە رقاوی و نفرەتاوییەکان لە ناو کۆمەڵگەدا و لە سۆنگەی مافی دوژمنایەتییەوە دەڵێن، ئێمە دەتوانین ئەنجامی بدەین، بەڵام لەوەشدا گەیشتونەتە کۆتایی رێگاکە و بە دڵنیاییەوە ئەوەش دەبینین".

بە دڵنیاییەوە دادگایی دەکرێن

ئۆلوچ باسی ئەوەیکرد، بەپێی راپرسییەکان ئاکەپە – مەهەپە زۆر لاواز بوون و لەبارەى هەوڵی هێزە دیمەکراسییەکان، ئۆپۆزسیۆنی کۆمەڵگە و سیاسییەوە وتی، "لە بەرامبەر ئەو ئۆپراسیۆنە پاکتاوکارییەى ئەمدواییەدا، هەڵوێستێکی توندیان نیشان دا. هەم لە ناو حیزبە سیاسییەکان و رێکخراوەکانی کۆمەڵی مەدەنیدا و هەمیش لە ناو هاووڵاتییاندا هەڵوێستێکی جدی خرایەڕوو. ئیدی کەس ئەوە قبوڵ ناکات کە کورد و هەدەپە بکەن بە دوژمن، پەنا بۆ وشە رەقاوی و نفرەتلێکردن ببەن. کاتێکیش ئەوەیان لە دەست بچێت، ئیدی هیچیان بۆ نامێنێتەوە.

بەو زوڵم و ناهەقییەى ئەوان، ئێمە ئەوان تەنها و تەریک دەخەین، بە دڵنیاییەوە ئێمە داواکانی خۆمان بەدیدەهێنین و ئێمە سەردەکەوین. ئەوانیش تووشی شکستێکی گەورە دەبنەوە. بەهۆی پێشێلکردنی مافەکان، داد، هەق و ئازدییەکان بە دڵنیاییەوە لە چوارچێوەی بنەماکانی دیموکراسیدا دادگایی دەکرێن. ئێمەش لەو پێناوەدا تێدەکۆشین".

ژ.ت