له‌ تووفارا مافی هاوڵاتیبوونی فه‌خری به‌ ئۆجالان درا

له‌ ئیتاڵیا ده‌یه‌مین مافی هاوڵاتیبوونی فه‌خری به‌ ڕێبه‌ری گه‌لی كورد عه‌بدوڵا ئۆجالان درا.

شاره‌وانیی تووفارا له‌ شاری كامپۆباسۆ-ی ئیتاڵیا بوو به‌ یه‌كێك له‌و شاره‌وانییانه‌ی ئیتاڵیا كه‌ مافی هاوڵاتیبوونی فه‌خری-یان به‌ ئۆجالان داوه‌. به‌ شاره‌وانیی تووفارا-وه‌، ژماره‌ی ئه‌و شاره‌وانییانه‌ی كه‌ مافی هاوڵاتیبوونی فه‌خری-یان به‌ ئۆجالان داوه‌، بوو به‌ ١٠ شاره‌وانی.

پێشتر كۆمه‌ڵه‌ی «Padre Giuseppe Tedeschi» داواكارییه‌كی پێشكه‌شی شاره‌وانیی تووفارا كردبوو كه‌ تیایدا باسی له‌ گرینگی كاره‌كانی ئۆجالان له‌پێناو ئاشتی، دیموكراتی و دادپه‌روه‌ری له‌ ڕۆژهه‌ڵاتی ناوین كردبوو. 

 له‌ داواكارینامه‌كه‌دا هاتبوو، ئۆجالان له‌ لایه‌ن گه‌لی كورده‌وه‌ كه‌ وه‌ڵاته‌كه‌یان ٤ پارچه‌ كراوه‌، به‌ ڕێبه‌ر قبووڵ ده‌كرێت. هه‌روه‌ها تێكۆشانی ئۆجالان له‌پێناو ئاشتی به‌بیرهێنرابوویه‌وه‌ و هێما بۆ گۆشه‌گیریی سه‌ر ئیمڕاڵیش كرابوو.

سه‌رۆكی شاره‌وانییه‌كه‌ دۆناتۆ پۆزوتۆ لێدوانێكی دا ڕایگه‌یاند، ئۆجالان بۆ مافه‌كانی گه‌لی كورد تێده‌كۆشێت. به‌ ناوی ئه‌نجومه‌نی شاره‌وانی تووفارا، له‌ به‌رانبه‌ر كاره‌كانیدا بۆ ئاشتی، دیموكراتی و دادپه‌روه‌ری له‌ ڕۆژهه‌ڵاتی ناوین، «هاوڵاتیبوونی فه‌خری» به‌ ئۆجالان ده‌ده‌ین.

پێشتریش هه‌ریه‌كه‌ له‌ شاره‌وانییه‌كانی كامپۆباسۆ، كاستلبۆتاتشۆ، پالێرمۆ، ناپۆلی، پالاگۆنیا، رێجیۆ ئێمیلیا، ڕیاچه‌، مارتانۆ و پینه‌رۆلۆ مافی «هاوڵاتیبوونی فه‌خری»یان به‌ ڕێبه‌ری گه‌لی كورد عه‌بدوڵا ئۆجالان داوه‌.

s.m