بەسێ هۆزات هاوسەرۆکی کۆنسەی بەرێوەبەرایەتی کەجەکە لەسەرتای قسەکانیدا باسی لەوە کرد کە دەسەڵاتدارێتی فاشیست، دوژمنی سەرەکی ژنانە و وتی:" فاشیزم خۆی لەسەر بنچێنەی دوژمنایەتیکردنی ژنان و کۆمەڵگاو سروشت بنیاد ناوە. کۆمەڵکوژ و لەناوبەرە. دەستەڵاتداریی ئاکەپە و مەهەپەش قڕکەر و لەناوبەرە. دەستەڵاتداریی ئاکەپەو مەهەپە، دەستەڵاتدارییەکی فاشیستە کە دوژمنی ژنانە و لە هەمان کاتدا دوژمنی هەموو کۆمەڵگایەکە. بە هێرشکردنە سەر نرخ و بەرهەمەکانی کۆمەڵگا، درێژە بە مانەوەی خۆیان دەدەن. لەبەر ئەوەی فاشیزم خۆی لەسەر شەر و توندوتیژی و رشتنی خوێن، بەخێو دەکات."
هۆزات هەروها وتی، ئەم راستییە لە ناو سیاسەتە فاشیزمەکانی دەستەڵاتدارێتی ئاکەپە-مەهەپەدا بە روون و ئاشکرا دەبینرێت، لە ماوەی دەستەڵاتدارێتی ئاکەپە-مەهەپەدا کوشتنی ژنان و توندوتیژی لە دژی ژنان گەیشتووەتە ئاستێکی بێسنوور و بەم شێوەیە دوا:" تێکۆشانی ئازادی ژنان داینەمۆی دیمۆکراتیکی کۆمەڵگا دەخاتە جموجوڵەوە و دەبێتە هەنگاوی یەکەم بۆ بەرخۆدانی کومەڵگا. دەستەڵاتدارێتی فاشیستی ئاکەپە-مەهەپە لە دژی هەموو کەسێکە، بۆیە ئایدۆلوژیی زایەندپارێزی گەش دەکەن و لە دژی ژنان ئاستی شەڕ و توندوتیژی، توندتر و گەورەتر دەکەن."
هۆزات هەورها رایگەیاند بۆ ئەوەی بزانرێت دوژمنایەتی بەرامبەر بە ژنان گەیشتووەتە چ ئاستێک، پێویستە مرۆڤ تەماشای دەستبەسەرداگرتنی شارەوانییەکانی هەدەپە بکات کە بە بەهانەی سیستمی هاوسەرۆکایەتی دەستیان بەسەردا دەگیرێت و وتی: " ژنان بە رەنگ وشێوازی خۆیان بەشداری لە سیاسەتدا دەکەن و سیاسەتێکی دیمۆکراتیک پەیرەو دەکەن. لە کەسایەتی شارەوانییەکاندا، ژیانێکی یەکسان و ئازاد دروست بنیاد دەنێن. دەیانەوێت ئەو ژنانەی بەم رۆڵە هەڵدەستن، لە مەیدانی سیاسەت دووریان بخەنەوە. لە کەسایەتی ئەم جۆرە ژنانەدا، هێرش دەکرێتە سەر سیاسەتی دیمۆکراتیک و ژیانی ئازاد. ئەمە قووڵبوونەوەی سیاسەتی قڕکردنی ژن و کۆمەڵگایە."
'لە دژی دەستەڵاتداریی فاشیستی ئاکەپە و مەهەپە پێویستە تێکۆشانێکی هاوبەش پەیرەو بکرێت'
هۆزات هەروها وتی:"ئەم هێرشە نامەردانەی دژی سیستمی هاوسەرۆکایەتی، هێرشی سەر ژنی ئازاد و هێرشی دژی دەستکەوت و نرخەکانی ژنانە. هاوژیانی ئازاد و نوێنەرایەتییەکی یەکسان و سیستمی هاوسەرۆکایەتی، لە کوردستان و تورکیا دەبنە هۆکاری پێشکەوتنی ئەخلاق و کەلتورێکی دیمۆکراتیک. دەستەڵاتداریی فاشیستی ئاکەپە-مەهەپە بە هۆی ترسیان لە نەمانی کەلتوری زایەندپارێزەوە، بە شێوەیەکی دڕندانە هێرش دەکەنە سەر سیستمی هاوسەرۆکایەتی و نوێنەرایەتی یەکسان. لە ژنانی ئازاد و کۆمەڵگای ئازاد دەترسن."
هاوسەرۆکی کۆنسەی بەڕێوەبەرایەتی کەجەکە هەروها رایگەیاند کە هێرشەکانی دەستەڵاتداریی فاشیست، بە واتای هێرشکردنە سەر ژن و کۆمەڵگا دێت و وتی:" بۆیە دەبێت تێکۆشان لە دژی دەستەڵاتداریی فاشیستی ئاکەپە-مەهەپە، تێکۆشانیکی هاوبەش بێت. لە ئێستادا ئەرکە سەرەکییەکە ئەوەیە کە تێکۆشانی هاوبەشی دیمۆکراتیکی ژنان بەهێزتر ببێت. پێویستی بە یەکێتییەکی تێکۆشانی ژنان هەیە. تێکۆشانی هاوبەشی دیمۆکراتیکی ژنان لە ناوچەکە و لەسەر ئاستی نێودەوڵەتی، بە واتای گەورەترین خۆپاراستنی هەموو ژنان دێت. کاتێک ژنان بە یەکەوە تێکۆشانیان کرد و بە یەکەوە جوڵانەوە، ئەوکات بەهێز دەبن. مەترسییەکانی سەر ژنان، ئەوە ناچار دەکات کە ژنان بەیەکەوە بجوڵێنەوەو بە هاوبەشی تێبکۆشن.
سیستمی هاوسەرۆکایەتی پڕۆژەیەکی هاوژیانی ئازاد و دەستکەوتی هەموو ژنانی کوردستان و تورکیا و رۆژهەڵاتی ناوەڕاست و جیهانە. هەر هێرشێک لە دژی ئەمە ئەنجام بدرێت، هێرشی دژی ئازادی ژنانە. بۆیە پێویستە هەموو ژنان خاوەندارێتی لەم نرخ و دەستکەوتانە بکەن. بێدەنگیی بەرامبەر بەم هێرشانە بە واتای بێدەنگی دێت، بەرامبەر بە نرخەکانی ئازادی کە ئەمەش دەبێتە هۆی لەدەستدانی دەستکەوتەکان. بزوتنەوەی ژنانی کوردستان و بزوتنەوەی ژنانی تورکیا کاتێک تواناکانیان یەکخست و لە دژی هێرشی دەستەڵاتداریی فاشیست تێکۆشانێکی هاوبەشیان کرد، ئەو کات دەتوانن دەستکەوتەکانیان بپارێزن. رێکخستنکردن و تێکۆشانی هاوبەش رێگای گارانتی ژیانێکی یەکسان و ئازادیی ژنانە."
'لە کەسایەتی رۆژئاوادا هێرش دەکرێتە سەر گشت مرۆڤایەتی'
هۆزات هەروها رایگەیاند کە رۆژئاوای کوردستان ٧ ساڵە بە سیستمێکی دیمۆکراتیک بەرێوە دەچێت کە سەرچاوەکەی لە نوێنەرایەتی یەکسان لە دەرەوەی سیستمی دەوڵەت و دەستەڵاتدارییەوە وەردەگرێت و وتی:" ئەو نرخە مرۆڤایەتییانە کە لە کەسایەتی ژنانی ئازادەوە سەرچاوە دەگرێت، لە گەڵ دەستپێکردنی شۆڕشی رۆژئاوا سەرلەنوێ رووایەوە. هێرشە داگیرکەرییەکان لە دژی رۆژئاواو دژی باکور و رۆژهەڵاتی سوریا، هێرشی دژی نرخەکانی مرۆڤایەتی و دژی هیواو ئاواتی ژیانێکی ئازادە. هێرشی دژی رۆژئاوا، بە واتای هێرشکردنەسەر گشت مرۆڤایەتییە. بۆیە مرۆڤایەتی بۆ گەلانی باکور و رۆژهەڵاتی سوریا هەڵسایە سەر پێ. دەوڵەتی تورکی فاشیست دوژمنی ژنانە، دوژمنی کوردە و دوژمنی مرۆڤایەتییە. وەک چۆن لە مێژووی مرۆڤایەتیدا ژن و گەلی کورد، لە ئافراندنی نرخەکانی مرۆڤایەتیدا خاوەن رۆڵێکی سەرەکی بوون، لە ئێستاشدا هەمان رۆڵ دەگێرن. شۆڕشی رۆژئاواو باکور و رۆژهەڵاتی سوریا سەلمێنەری ئەم راستییەیە."
هۆزات تیشکی خستە سەر ئەوەی کە گەلانی جیهان و مرۆڤایەتی بە شێوەیەکی بەهێز خاوەندارێتی لەم سیستمە دەکەن و ئەمەش دەبێتە هۆکاری دروستبوونی دڵخۆشییەکی گەورە و وتی:" بە یەکبوونی ژنان و بە کۆبوونەوە لە دەوری نرخە گەردوونییەکانی ژنان و بە بەرخۆدانێکی جەوهەری، پێشوازی لە ٢٥ی تشرینی دووهەم، رۆژی نەهێشتنی توندوتیژی لە دژی ژنان دەکەین. چونکە ئەو هێزەمان هەیە کە تێکۆشانمان بۆ نەهێشتنی توندوتیژی بەردەوام بکەین و جیهانێکی بێ شەڕ و بێ توندوتیژی بئافرێنین."
ز.ش