ڕووسیا و تورکیا سەبارەت بە باکوری سوریا لە سەر ۱۰ ڕێککەوتن

لە کۆبوونەوەی نێوان ڤلادیمیر پووتین سەرۆکی ڕووسیا و رەجەب تەیب ئەردۆغان سەرۆککۆماری ڕژێمی تورکیا دا سەبارەت بە باکوری سوریا لە سەر ۱۰ ڕێککەوتن واژۆ کرا و بڕیار درا دەورییەی هاوبەش لە سەر سنور ئەرکدار بکرێن.

ئەمڕۆ لە شاری سوچی گەشتیاری ڕووسیا، ڤلادیمیر پووتین سەرۆکی رووسیا و ڕەجەب تەیب ئەردۆغان سەرۆککۆماری ڕژێمی تورکیا سەبارەت بە باکوری سوریا کۆبوونەوە. پاش کۆبوونەوەکە هەردوولا لە کۆنفرانسێکی رۆژنامەوانیدا ناوەڕۆکی کۆبوونەوەکەوەکەیان بۆ ڕای گشتیی ئاشکرا کرد.
پوتین رایگەیاند: قسەمان کرد لە سەر ئۆپەراسیۆنی تورکیا لە باکووری سووریا و جەختم کردەوە کە کورد بەشێکن لە سووریا نابێت پشتگوێ بخرێن.
ناوبراو ئاشکرای کرد: لەگەڵ تورکیا رێککەوتنێکی ۱۰ خاڵیمان واژۆ کردوە و لە میانیدا ۱٥۰ کاتژمێری دیکە ئاگربەست درێژ کراوەتەوە و بڕیاریش دراوە سوپاکان تورکیا و ڕووسیا دەورییەی هاوبەشیان لە سەر سنوری نێوان تورکیا و باکوری سوریا هەبێت.

دەقی ریککەوتنە ۱۰ خاڵییەکە:

۱- هەر دوولا پابندی خۆیان بە پارێزگاری لە یەکپارچەیی سیاسی و  خاکی سووریا و نیگەرانیەکانی تورکیا ن
 
۲- هەردوولا جەختیان لە سەر بەرەنگاربوونەوەی تیرۆر کردووەتەوە.‌
 
۳- بە قووڵایی ۳۲ کیلۆمەتر ئۆپەراسیۆنی تورکیا لە گرێ سپی و سەرێ کانی پارێزگاری لێدەکرێت.
 
٤- جەخت لە رێککەوتننامەی ئەدەنە کرایەوە و رووسیا لە کاتی پێویستدا ئاسانکاری بۆ رێککەوتننامە دەکات.
 
٥- لە ۲۳ی تشرینی یەکەمی ۲۰۱۹ لە پاش کاتژمێر ۱۲:۰۰ی نیوەڕۆوە  پۆلیسی سەربازی رووسیا و هێزی سەربازی سوریا دەربازی سنوری باکوری سوریا دەبن و  هێزی کوردی بە قوڵایی ۳۰ کیلۆمەتر لە سنووری تورکیا - سووریا بۆ دواوە دەکشێنەوە و کشانەوەکە لە ماوەی ۱٥۰ کاتژمێردا جێبەجێ دەکرێت و دەوریەی هاوبەشی ڕووسی و تورکی لە سەر سنور ئەرکدار دەکرێن.
 
٦- یەپەگە و قەسەدە لە منبج و تەلڕەفعەت دەکشێنەوە.
 
۷- هەر دوولا کار بۆ گەڕانەوەی دڵخوازانەی پەنابەران دەکەن.

۸- هەوڵی هاوبەش بۆ دزەپێنەکردنی تەرۆریستەکان دەخرێتەگەڕ.
 
۹- میکانیزمێکی هاوبەش بۆ جێبەجێکردنی ڕێککەوتنەکە دەدۆزرێتەوە.
 
۱۰- هەر دوولا کار بۆ چارەسەری هەمیشەیی قەیرانی سیاسی سوریا دەکەن.

 

 هـ.هـ