پەی بەرز گێرتەو یادو سی ساڵەو تاوانو کیمیاوارانو هەڵەبجەی، تەڤگەری ئازادی کۆمەڵگاو کوردستانی بەئامادەبیەو هامسەرۆکو پەیەدەی، نوێنەرا ڕەژاکی و کۆمیتەو شەهیدانو پەکەکەی جە پانیشتو کوردستانی و ژمارێوە جە کەسوکارو شەهیداو هەڵەبجەی ڕاپیمایشا ئەنجامدا.
جیهاد هەورامی
ڕاپیمایەکە، دەمژمار دەو وەڵێ نیمەڕۆی جە دلێ بازاڕییەنە دەسش پەنە کەرد پەی سەرو مەزارو شەهیداش خاینا و چاگە تاجە گوڵینێ نیریڕە.
دماتەر، شاهۆز حەسەن، هامسەرۆکو پەیەدەی بە ئەنەفەی وات: سی ساڵێ چێێوەڵتەر ڕژێمو بەعسی خەڵکو هەڵەبجەیش کیمیایی واران کەرد و پەنج هەزارێش چەنە شەهید کەردێ، ئیسەیچ ڕژێمو فاشیستو تورکی جە عەفرین کۆمەڵکوژی کوردەکا کەرۆ، وەلێ گەلەکەما ئینا سەرو پێ و بەرخودان کەرۆ و سەرکەوتەی بەدەس مارۆ وەراموەرو دوژمناو گەلەکەیما.
هەرپاسە محەمەد عەبدوڵا، هامسەرۆکو تەڤگەرو ئازادی بەئەنەفەیش وات: جە کیمیاواران کەردەو هەڵەبجەی چن لایەنێ سیاسی کوردو پانیشتو کوردستانی دەسشا بیەن و کۆمەڵگاو نێودەوڵەتیچ جیا جە بێدەنگیش چی تاوانەیە پاڵپەشتیچش چەنە کەرد پەی کۆمەڵکوژ کەردەو کوردی جە هەڵەبجەنە، ئیسەیچ دماو سی ساڵێ بەهەمان سیاسەت کۆمەڵگاو نێودەوڵەتی بێدەنگێنێ جە کۆمەڵکوژکەردەو خەڵکو عەفرینی و هامکاری ڕژێمو تورکی فاشیستی کەرا چی کۆمەڵکوژیەنە.
