جە ئورمییە و هەورامان ٤ پاسدارێ ئێرانی کوشیێ

جە ماکۆو سەر بەئورمییەی و جە ڕەوانسەر و نەوسوڎەو سەر بە هەوراماناتی جە میانو گەریلاکانو (یەرەکە-YRK)ی و سپاو پاسدارانو ئێرانی-ـەنە جەنگ قومیان و جە ئاکامشەنە ٤ پاسدارێ کوشیێنۍ و ٦ی تەرێ بریندارێ بیێنۍ.

جەی بارەۋە سەرچە هەرێمیەکێ ئاشکراشان کەردەن: "جە ناوچەو ماکۆی کە سەر بە پارێزگاو ئورمییەو وەرهۆرزو کوردستان-یەن، جە میانو گەریلاکانو یەکینەکێ ڕۆژهەڵاتو کوردستانی (یەرەکە-YRK) و سپاو پاسدارانو ئێرانی-ـەنە جەنگ قومیان و جە ئاکامشەنە ۲ پاسدارێ (کە یۆشان پلەدارەن) کوشیێنۍ و ۲ پاسدارێ تەرێ بریندارێ بیێنۍ".

هەمان سەرچەمێ ئاماژەشان دان بە قۆمیای جەنگی هامشێوەی جە شارچەکێ ڕەوانسەری و نەوسوڎێ سەر بە هەوراماناتی جە پارێزگاو کرماشانی و ئاشکراشان کەردەن: "جەنگەکە جە کۋیسانەکێ شاهۆی ڕووەش دان و کوشیای۲ پاسدارێ و برینداربییەی ٤ پاسدارێ تەرێش ۋنەکەفتەنەۋە. ڕژێم بە هەلکۆپتەر تەرمێ ۲ دووە پاسدارە کوشیاکەی و ٤ بریندرەکەیش فاڕێنی نەوەشخانەو قودسی جە شارو پاۋەی. دمای جەنگەکەی حسێن سەلامی فەرماندەو گردیی سپاو پاسدارانی بە یاۋەری ژمارێۋ جە فەرماندارەکێ سپاکەی بە دووێ هەلیکۆپەەرێ جەنگیێ سەردای یاگێ جەنگەکەیشان کەردەن".

 تا ئیسە یەکینەکێ ڕۆژهەڵاتو کوردستانی (یەرەکە-YRK) سەبارەت بە هەر دووە جەنگەکەی وەڵاکریای لەشکریاش نەدان و چەمەڕایی هەن بەزوویی جەی بارەۋە زانیاریێ پەی ڕای گردینی ئاشکرا بکەرۆنە.