گۆشەگیرکەردەی و چارەنۋیس-نادیاری ڕێبەر ئۆجالانی و بڕیارەکەو ئەمەریکای دژ بە ڕاۋەبەرانو جمیەری ئازادی کوردستانی (جه‌میل بایك، دوران كاڵكان و موراد قه‌ره‌یلان)ی، ئێزیدیەکێش تۆڕێ و نیگەرانێ کەردێنێ و دژ پانەیە تا ئیسە چنڎین چالاکیێشان ئەنجام دێنێ و چالاکییەکێچ درێژەشان هەن. جەی چۋارچێۋەنە جە شارچەو تەل عوزێری سەدان کەسێ ڕاپیمای و وێنیشاندایشان ئەنجام داۋە. ڕاپیمایەکە کە بەسەرپەرستی یه‌كێتیی گەنجانو ئێزدی و یه‌كێتیی ژنێ ئێزدی ڕێکۋزیابێ، جە کەمپ-و تەل عوزیری دەستش پنەکەرد و تا باخچەو ڕێبەر ئاپۆی درێژەش کێشا و پەیتا پەیا دروشمی دڵۆزی پەی ڕێبەر ئۆجالانی و دژ بە گۆشگیرکەردەیش و پەی ئازادیش واچیێۋە و بڕیارەکەو ئەمەریکای بە تنڎی سەرکۆنە کریا. هەرپاسە پۆستەرێ ئۆجالانی، ئاڵێ په‌كه‌كه‌ی، یه‌به‌شه‌ی، یه‌ژه‌شه‌ی و یه‌جه‌ئێ-ی بەرزێ کریێۋە.

دماتەر ڕاپیمەرێ و وێنیشاندەرێ جە باخچەو ڕێبەر ئاپۆیەنە کۆبیێۋە و جمیەرو ژەنێ ئێزیدی (TAJÊ) بەیاننامەش پێشکەش کەردێ، کە دلێشەنە ئامابێ: گەرەکەن ئێزیدیەکێ جە گرد لایێ زیاتەر خاوەنداری جە ئۆجالانی و فەلسەفەکەیش بکەرانە و دەورشەنە کۆبباۋە و هەوڵ پەی کۆتایی-ئاۋردەی بە گۆشەگیریەکەیش و ئازادکەردەیش بڎانە. چونکە ئۆجالان و فەلسەفەکەش و وانکارەکێش بێنێ کە ئێزیدیەکێش پارێزنێ و شەنگال و ئێزیدخانشان ئازاد کەردەۋە و ڕێکشان ۋستەۋە. جمیەرو ژەنێ ئێزیدی (TAJÊ) داۋاش جە ئەمەریکای کەرد، تا بلۆۋە بڕیارەکەیشەرە کە دژ بە پەکەکەی و کەجەکەی دانش، کە دەرنجام بڕیارێۋەن دژ بە سەرجەم گەلو کوردی و ئازادیۋازانو کوردستانی و جیهانییەن و خزمەت بە بەهێزکەدەی داعشی و تەرۆرو دەوڵەتو تورکیای مەکەرۆنە.