سەرهۆردای ئێرانی و ڕۆژهەڵاتی سەرەڕاو سەرکوتی فراۋانتەر بیەنەۋە

سەرهۆردای ئێرانی و ڕۆژهەڵاتی فراۋانەر بیەنەۋە و ڕژێم بە ئێر و ئاسن ڕووبەڕووشان مەبۆنەۋە و دەیان کوشیێ و سەدان بریندارێ هەنێ و تەنها جە کوردستان ٥۰ کەسێ گیانشان جە دەست دان.

سەرهۆردای و نارەڕەزاییە جەماۋەریەکێ ئێرانی و وەرهۆرز (ڕۆژهەڵات)و کوردستانی چوار ڕووێشان دەرباز کەرد. جەماوەر سورەن سەرو داۋاکارییەکانش کە بریتینێ جە: کۆتایی ئاۋردەی بە گرانی بەنزینی و ماددە سەرەکییەکێ وارەدەمەنی، دەستەبەرکەردەی خزمەتگورزایەکان، فاڕیای سیستەمی سیاسی و حوکمداری وڵاتی. بەڵام هەر جە یەکەم ڕۆچەۋە تا ئارۆچ هێزە ئەمنیەکێ ئێرانی بە ئێر و ئاسن و فیشەکێ و تونڎوتیژی ڕووبەڕووێ جەماۋەری بیێنێۋە و جەی چوارچێۋەنە دەیان کەسێ گیانشان جەدەست دان و سەدان کەسێ تەرێ بریندارێ بیێنی کە  فێشتەرشان جە ڕۆژهەڵاتو کوردستانی بیێنێ قوربانی.

کاربەدەستێ کۆمارو ئیسلامی ئێرانی پەی ئانەیە هەۋاڵێ و زانیاریەکێ سەرهۆردای دلێ ئێرانی نەزانیان و نەیاۋانە بەرو وڵاتی و دلێ وڵاتیەنە جەماوەر هایدارو یەکتری نەبۆنە، سەرجەم ئامرازەکێ پەیوەندی بەتایبەتی تۆڕەکێ ئەنتەرنێتیشان بڕیێنێ. بەڵام سەرەڕاو ئانەیە سەرچەمەکێ هەۋاڵی ئاشکراشان کەرد: "چەنی کوشت و بڕی و فشاری و دەستگیرکەردەی و میلیتاریزەکەردەی و شار و شارچەکان، جەماۋەری ناڕازی جە سەرجەم ئوستانەکێ ئێرانی و ئوستانەکێ وەرهۆرزو کوردستانی جە وێنیشاندای بەردەۋامێنێ و سەرهۆردای و وێنیشانداکە فراۋان تەر بییەنەۋە".

هەمان سەرچەمێ ۋستەنشان ڕوو کە جە یەکەم ڕۆچەۋە تا ئیسە تەنها جە شارەکێ ڕۆژهەڵاتی ٥۰ کەسێ گیانشان جەدەست دان و سەدان کەسێ ترێ بریندارێ بیێنێ و سەدان کەسێ دەستگیرێ و قۆڵبەستێ کریێنێ و سەبارەت بە زیانە گیانیەکان ئامارێۋی بەی تەورەشان ۋەڵاۋکەردەنەۋە:

کرماشان ۱٦ کەسێ گیانشان جەدەست دان
جوانڕۆ ۱٤  کەسێ گیانشان جەدەست دان
مەریوان ۱۲  کەسێ گیانشان جەدەست دان
بۆکان ٥  کەسێ گیانشان جەدەست دان
سنە ۱  کەسێ گیانشان جەدەست دان
ئورمییە ۱ کەس گیانش جەدەست دان
تاران ۱ کەس گیانش جەدەست دان کە کوردەن

هامکات جە شارە ناکوردیەکێ ئێرانی بە هەمان شێۋە ژمارێۋی فرێ کوشیێ و بریندارێ هەنێ بەڵام جەی بەرەۋە ئاماری ورد و دروست بەدەست نەۋزیان. هامکات جەماۋەری ناڕازی دەیان بانکێ و تەلارێ سەر بە دەسەڵاتی و سەڎان ماشینێ پۆلیس و هێز ئەمنیەکانشان ئێر دێنێ و سۆچنێنێ.

جەی سەروبەندەنە عەلی خامەنەئی ڕابەرو کۆمارو ئیسلامی ئێرانی گرانکەردەی بەنزین-یش پەسەند کەرد و جەماۋەری ناڕازیش بە تێکدەر تۆمتەبار کەرد و ڕەتش کەردەۋە بڕیارو گرانکەردەو بەنزینی هۆربشانەۋە و ئیمزاش نەکەرۆنە. پی جۆرە داۋاکاری گەلی ۋەرچەم نەگیریا و ڕەتکریاۋە.

جە لایێۋی تەرەۋە کارەبەدەستێ ئێرانی هەڕەشێشان جە جەماوەری ناڕازی کەردە، ئەگەر کۆتایی بە وێنیشاندای نەئاۋەرانێ بە تونڎتەرین شێۋە ڕووبەرووشان مەباێنێۋە و بانگەشەشان کەردەن، وڵاتێ و لایەنێ بیانیێ دەستشان جە خوڵقنای سەرهۆردای و ناڕەزایەتیەکانە هەن. بەڵام جە ۋەرانۋەرەنە جەماۋەری ناڕازی ئا بانگەشەیە ڕەت مەکەرانێۋە و سەرهۆردای و ناڕەزایەتیەکەیشان بە زادەو قەیران و کێشە چارەسەرنەکریانو وڵاتەکەیشان جە قەڵەم مڎاێ و ئۆباڵەکەیش مەوزانێ ملو کاربەدەستانو وڵاتەکەیشان کە خەمسەردانە کارشان پەی چارەسەری قەیران و کێشەکان کەردەن و گۆششان بە داۋاکاری جەماۋەری جە ۋەیەردە و ئیسەنە نەڎان.