٩ ئاوەوەرەو ١٣٥٨ وەرەتاوی جە میانو سەقز-ی و مەریوان-یەنە و نزیک جە دەگاو بەستامی، کاک فواد موستەفا سوڵتانی یۆ جە ڕابەرە گەورە و دیارەکانو وەرکەوت کوردستانی بەتایبەتی و کوردستانی گەورەی بەگردی، جە بۆسەو هێزەکانو سپاو پاسدارانو ئێران-یەنە گیانش بەختکەرد. ئاڕۆچ ٤١ ساڵێ جە شەهیدبیەیش دەرباز مەبۆنە. کاک فواد موستەفا سوڵتانی یۆ جە ئا ڕابەرانە کە یەکەمین هەنگامەو خەبات و کۆشایش پەی نەمەنەی ستەم و نادادی و کۆمەڵایەتی و نەتەوەیی بییەن. نامبریا خەڵکو دەگاو ئاڵماتە-ی سەر بە مەریوان-ییەن و جە ساڵەو ١٣٢٧ جە ئەدا بیەن و جە ٩-٦-١٣٥٨ (١٩٤٩-١٩٧٩) یاوان کاروانو گیانبەخشا ڕاو ئازادی و یەکسانی. کاک فواد وانایش جە سنە و تاران-ـەنە تا قۆناخەو فوقە لیسانسی وئەندازیاری تەمامنان. دمایی ڕابەری ئاخێزو هەژارا کوردستانیش کەردەن. جە ساڵەو ١٣٤٨ وەرەتاوی چەنی چەنڎین ژمارێو جە هاوەڵێ و یاوەرانش، بەنونگەو کار و خەباتو کۆشای و رێکوستەیی، جە لاو هێزەکانو دەستگا بەدنامەکەو ساواک-ی سەر بە دەسەڵاتداری شاهنشاهی ئێرانی قۆبەستێ و زیندانیێ کریێنێ.

بەڵام ئانە نمەبۆنە ئاستەنگ پەی خەباتیشان و کاک فواد و هاوەڵەکێش جە زیندانەنە نزیکە بە ٢٤ ڕوان مان جە واردەی مەگێرانێ و ئانەیچە دەنگوەدای گەورەش مەبۆنەهەم جە زندانەکانو ڕژێمی شاهنشاهی و هەم جە بەرو زیندانیچەنە و کاریگەری فرە سەرو دەنگە نارازیەکان منیۆرە. دماجار جە ساڵەو ١٣٥٧ جە زیندانەۆە ئازادێ مەبانێ و بە مەگێڵانێوە پەی مەریوانی. کاک فواد جە مەریوان سازی و ڕێکوزیای هیتارانی مەرزنۆرە و هامتەریب چەای ئانەیچە، سەرقاڵ مەبۆنە بە رێکوستەی لامێ (جەوانێ). دیسان سەرپەشتاری کۆچ ڕەوو خەڵکو مەریوان پەی سنەی مەکەرۆنە. هەر پاسە جە سەرهۆرادای جەوانانو سەقز، بانە، بۆکان و مەهاباد-ی و ئاخێزو گەلی دژ بە کۆمارو ئیسلامی ئێرانی ڕۆڵێ وەرچەم و تایبەتش بییەن.

جە دمای فتواو جهادو خومەینی دژ بە خەڵکو کوردستانی کە جە ٢٨ گەڵاوێژو ١٣٥٨ی وەرەتاوی داش، ئیتر قۆناخێ تازە جە سەرکوتکەردەی خەڵکوکوردستانی دەستش پەنە کەرد و ڕژێم بەفراوانی قڕکەردەی و کوشتوبڕو کوردیش پەیڕەو کەرد و پەی ئا مەبەستەیە هێزێ چەکدار و لەشکری فراوان و پۆشتە و پەرداخ کیانیان کوردستان. کاک فواد جە ٩ ئاوەوەرەو ١٣٥٨ وەرەتاوی جە دمای کۆبییەی چەی خەڵک و ڕێکوستەکانو ناوچەکەی، جە سەروەختوو ئەوەگێڵایشەنە جە نزیکو دەگاو بەستامی کە مەگنۆنە میانو سەقزی و مەریوانی، مەگنۆنە بۆسەو هێزەکاێ سپاو پاسدارانی و گیانش بەخت مەکەرۆن. دمای ئانەیە تەرمو کاک فوادی چەنی چوار پێشمەرگێ تەرێ کۆمەڵەی جە گۆرستانو تاڵەسواری سەر بە دەگاو ئاڵماتەی شکۆمەندانە ئەسپەردێ مەکریانێ.

جە دمای ٤١ ساڵان، ئەگەرچی کاک فواد نەمەنەن، بەڵامم ڕاگا و ئامانجەکێش و خەبات و کۆشایشش درێژەشان هەن و تا ڕوێێچ نامێ کاک فوادی بمانۆنە، ڕاو یاوای بە سوسیالیزمی ڕۆشن و بەردەوامەن و هیشتای چوون ویەردە بەڕابەرو ئارۆ و سەڤای مەیۆنە ئەشمار. ئانە کە کاک فوادش پسۆ ڕابەرێ ئاستەنەوە، کەسایەتی و کەردەکێشەنێ و ئا گفتار و ئاکارێشەنێ کە پێسەو یۆی بێیێنێ. هەنگامە مەدەنیەکێ کۆمەڵەی بە ڕابەری کاک فوادی کریۆنە پەی ئارۆی و خەڵکو کوردستانی ببانێ بە ئامیان ونەخشەڕا پەی یاوای بە مافەکان.