فەڕەنسا چالاکی ستراسبۆرگیش قەدەغە کەرد کە دژ بە گۆشەگیری ڕێبەر ئۆجالانی ئەنجام مڎریۆنە و (KCDK-E - كه‌جه‌ده‌كه-ئه‌ورووپا)ی قەدەغەکەش شەرمەزار کەرد و دژ بە قەدەغەکەی و بڕیارو ئەمەریکای زنجیرە چالاکی ڕێکۋزۆنە.
۰٦/۱۱/۲۰۱۸ی جە شارو ستراسبۆرگ-و فەڕەنسای، چالاکی گەۆرە پەی ئازادی ڕێبەرو گەلو کوردی عەبدوڵا ئۆجالانی بە پێشەنگایەتی کۆنگرەو جڤاکی دیموکراتی جە ئەوروپا و جمیەرو ژەنێ کوردی جە ئەوروپا و بەبەشدار هەزارن کەسێ ئەنجام دریا بێ. چالاکییەکە بڕیابێ یەک هەفتە بەردەۋام بۆنە، بەڵام ڕووبەڕوو هێرشو هێزە ئەمنیەکانو فەڕەنسای بییەبێۋە و ئارۆچ حکومەتو فەڕەنسای چالاکییەکەش قەدەغە کەرد.
دیوانو کۆنگرەو كۆمه‌ڵگه‌و دیموكراتیی كوردستانی جە ئه‌ورووپا (KCDK-E)، جەی بارەۋە بە سەردێڕو «دژ بە پیلانگێڵی و گۆشەگیری مدرامان بەهێز بکەردێ» ۋەڵاکریاش دان و ئاشکراش کەردەن: "سەرەڕا ئانەیە کە مۆڵەت پەی چالاکی ستراسبۆرگی هۆرگێریابێ، بەڵام دەسەڵاتدارێ فەڕەنسای بە بێ هۆکار چالاکییەکەشان قەدەغە کەرد".
کەجەدەکە-ئەوروپای ئاماژەش بە هێرشەکان دژ بە کوردی و جمیەرە ئازادیەکەیش دان و دەستنیشانش کەردەن: "هێرشەکێ نیشانەش مڎانە کە ستراتیژی ئا تاقمە چەتانە شکست دریان کە ڕژێمو تورکیای پەشتیۋانشانە. جە سایەو مدرامانو هامچەرخو مرۆڤایەتی کە دژ بە چەتەکانو داعشی کورد و جمیەرەکەیش ئەنجامشدا، ڕاگیریش جە هێرشە تەرۆرستیەکانو داعشی جە پاریس و بەرلین و ئەوروپا کەرد. ئی مدرامانە مێژوویی و بەهادارە کە دژ بە داعشی ئەنجام دریا، سەرەتا جەلاو ئەمەریکای و دماتەر سەرجەم وڵاتانو ئەوروپای و جیهانی ستاییش و پێشوازیش کریا. بەڵام بە بێدەنگی ۋەراۋەر بە هێرشەکانو تورکیای پەی سەرو عەفرینی، ئا دەوڵەتێ و ڕێکۋزیێ میاندەوڵەتیەکێ بیێ بە هامبەشێ هێرش و تاۋانەکانو تورکیای. سەمەرەن پانێچە سێرێ نەبیێ، ئیسەیچ بە فراۋانی پەرەشان بە سیاسەتی دژە کوردی دان. ئانەیچە وەختێنە ڕووە مڎۆنە کە جە ڕۆژئاڤاو کوردستانی ۋینگە و فەلسەفەو ڕێبەر ئاپۆی کەردەیی کریان و كورد، عه‌ره‌ب، توركمان، چه‌ركه‌ز، عه‌له‌وی، ئێزدی، موسوڵمان، مه‌سیحی ئازادانە پێۋەر مژیۋانێ. ئینێچە هێزە پیلانگێڵە و دماکەوتە هەرێمی و جیهانیەکێش تەرسێنێنێ. هێزە باڵادەستەکێ جیاتی چارەسەری کێشەکان، پەرەشان بە جەنگی و ناکۆکی دان و پی جۆرە گەرەکشانە درێژە بە دەسەڵاتداریشان بڎانە".
دیوانو کۆنگرەو كۆمه‌ڵگه‌و دیموكراتیی كوردستانی جە ئه‌ورووپا (KCDK-E)، ئاشکراش کەردەن: "قەدەغەکەردەی چالاکی ئازادی ئۆجالانی جە ستراسبۆرگ و دیارکەردەی خەڵاتی پەی دەستگیرکەردەی ڕێبەرانو پەکەکەی پەیوەستەن بە کۆبیەو چنڎ هەفتەی ۋیەردەی جە ئەستەنبۆڵ و ئامانجیچ شکستدای ئیرادەو گەل و جمیەرو کوردیەن. پۆکەی هەم بڕیارو ئەمەریکای و هەم بڕیارو فەڕەنسای جیاۋازێ نییەنێ و یۆنێ و بە یەک ئامانج دریێنێ کە دژایەتیکەردەی کوردی و جمیەرکەیشەن. هەم کۆبیەی جە ئەستەنبوڵ و بڕیارو ئەمەریکای و فەڕەنسای نیشانەش مڎۆنە پیلانگێڵنای و گەلەکۆمەی میاندەوڵەتی تا ئارۆ ئامان و درێژەش هەن و نۊشان کەردەنەۋە".
کەجەدەکە-ئەوروپای جەتش کەردەنەۋە: "ئێمه خاس مزانمێنە ئی بڕیارو قەدەغەکەردەو چالاکی ستراسبۆرگی هینو فەڕەنسای نییەن، بەڵکو بڕیارێن کە جە کۆبیە چوار قۆڵیەکەو ماكرۆن، مێركڵ، پووتین و ئه‌ردۆغانی جە ئەستەنبوڵ دریان. هەر پاسە بڕیارو ئەمەریکای دژ بە بەڕێزان، جه‌میل بایك، مووراد قه‌ره‌یلان و دووران كاڵانی درێژەپنەدای پیلانگێڵی ۲۰ ساڵێ جەی وەڵتەریەن و ئارۆ تازە کریانەۋە. ئی بڕیارێ بە ماناو پەسەندکەردەی کۆمەڵکوشی و قڕکەردەی کوردی و پەشتیوانی جە تورکیایەن، یان ڕاستەر فەراتەر جە پەشتیوانی، هامکاری کەردەیەن. بڕیارەکێ ڕا جە ۋەردەمو چەتەکانو داعشیەنە مەکەرۆۋە و دەرفەتی زیاتەرشان پەی خوڵقنۆنە".
دیوانو کۆنگرەو كۆمه‌ڵگه‌و دیموكراتیی كوردستانی جە ئه‌ورووپا (KCDK-E)، جەختش سەرو بەردەۋامی-دای بە چالاکی ئازادی پەی ئۆجالانی جە ئەوروپا کەردەنەۋە و داۋاش کەردەن: "دژ بە بڕیارەکانو فەڕەنسای و ئەمەریکای جە ۋەردەمو باڵۋێزخانەکاشانە کورد و ئازادیۋازێ چالاکی ئەنجام بڎانە و بڕیارەکانشان شەرمەزار بکەرانە. باۋەڕمان هەن کە کورد و مرۆڤایەتی ئی سیاسەتە چەپەڵەیە پووچەڵ مەکەراۋە".
جە کۆتایەنە کەجەدەکە-ئەوروپای ئاشکراش کەردەن:" هەفتێ ۳ ڕووێ جە ۋەردەمو باڵۋێزخانەکانو ئەمەریکای و فەڕەنسای جە فرێۋ جە شار و پایتەختکانو ئەوروپای چالاکی ڕێکۋزانە و پێۋیستەن کورد و دۆستەکێش کارا و جدی و بە فراوانی بەشدارێشان ببانە".
