نامێ پەی خوڎای

نەزەر عەلی نامێۋەش پەی خوڎای کیاستە و جە ڕاو ناسرەدین شای خوڎا وەڵامش داۋە.

ئینە حەکایەتێ هەرەقەتینەنە سەبارەت بە کەسێ بە نامێ "نەزەر عەلی تاڵەقانی"، کە جە زەمانو ناسەردەین شاو قاجار-یەنە ڕووەش دێنە و جە تاران فەقی بیینە. نامبریا کابرێۋێ ئانڎە هەژار بییەن، کە گرد شەۋێ لۋان دەوروبەرو حوجرەو فەقیەکانە تا چێۋێ جە ئەۋامەنەکەیشان پەی ۋاردەی و سێرکەردەی لەمێش پێڎا بکەرۆنە. ڕۋێ نەزەر عەلی ۋیر چانەیە مەکەرۆۋە تا نامێ بنۋیسونە و بکیانونەش پەی خوڎای. هەڵبەتە هەر پاسەش کەرد و نامەکەێش نۋیستە و کیاستەش کە پی جۆرە نۋیستێنەش:

نامێ پەی خوڎای

بسم اللە الرحمن الرحیم 
جەنابو خوڐای..
سڵامت ۋەنە بۆنە: من بەنڎنەو زاتو تۆنا،
هەرپاسە کە ۋێت جە قورعانەنە فەرماۋانت: (وما من دابە علی الارض الا علی اللە رزقها)
منیچ گیاندارێنان چا گیاندارانە کە جەنابت سەرو زەمینی خوڵقنێنت..
هەرپاسە یاگێ تەریچەنە فەرماوانت:
{ان اللە لایخلف المیعاد}
دەی من پەنەوازە و ئاتاجم پی چێۋاو واریە هەن و پەیم دەستەبەرێ بکەرە:
یۆۋەم:ژەنێ زەریفە و ئیماندارە
دووەم:یانێ گەورە
یەرەم:کارەکەرێۋە
چوارەم:ئەسپ و عەرەبانێ 
پەنجە:باخێ گەۆرە
ششەم:بازێ زەڕ پەی هەرمانێ
دماو ئامادەکەردەی چێوەکان تاکام هەنە ئاگاڐارم بکەرەۋە و پەی بکیانە.
نامونیشان: حوجرەو مەروی ژوورو ژمارە شانزەی، نەزەر عەلی تاڵەقانی.

نەزەر عەلی دماو نۋیستەی نامەکێ، ۋیر مەکەرۆۋە نامەکێ بۋزۆنە کۆگە. جە ۋەرو وێشەرە ماچۆنە: مەگەر مەۋاچانە مزگی یانەو خوڎاین دەی ملو پەی مزگی ئیمامی جە بازاڕو تارانی{مزگی شاو ئاوەختەیە} نامەکێ کەلەبەرێنە شارووە و حەتمەن خوڎا مێزۆشەۋە!
نامەکە ڕۆو پەنج شەممەی مزگیەکەنە شاروۋە. سەۋایش کە هەینی-یەن، ناسرەدین شا قاجاری شاو وەختو ئێرانی چەنی دارودەسەکەیش نیازشەن بلانە پەی ڕاو و نێچیری، قافڵەکەش وەردەمو مزگیەکەیەرە ڕەڎ مەبۆنە. چا وەختەنە جە پڕێنە واگژێ هۆرمەکەرۆنە و نامەکێ نەزەر عەلی جە کەلەبەرەکێنە بەرماۋەرۆنە و ۋزۆش ۋەردەمو ناسرەدین شای.ناسرەدین شا نامەکێ موانۆۋە و  فەرمانە بەرمەکەرۆنە تا قافڵە بگێڵۆۋە پەی کۆشکی. بە یاۋایشان بە کۆشکێ پەیکێ مەکیانۆنە پەی حوجرەو مروی شۆنەو نەزەر عەلی-یەرە و نامبریای بەرانە کوشکە. وەختێ نەزەر عەلی مارانە پێ لاو شای، ناسرەدین شا وەزیرێ و کاربەدەستێ گلێرێ مەکەرۆۋە و ماچۆنە: ئا نامێ کە کە پەی خوڎای نۋیسیێبێ، خوڎای کیاستەش پەی ئێمە، ئێمەیچ مشیۆم بە ئەرکو وێمان هوربێزمێنە و  داۋاکاریەکێ نۋیسەری دەستەبەرێ بکەرمێنە. ئیتر پ جۆرە نەزەر عەلی تالەقان وەڵامو نامەکیش جەلاو خۋڎای-ۋە دریاۋە و بە داۋاکاریەکەیش یاۋا.

٭نامەکێ نەزەر عەلی تالەقانی، تا ئارۆچ جە مۆزەخانەو گوڵستانی جە تاران پارێزیێنە.

هۆرگێڵنەر جە فارسی پەی هەورامی: ڕێبوار هەورامی