جە ڕۆژئاڤاو کوردستانی شەڕڤانەکێ یەکینەکێ پارێزنای گەلی- یەپەگە، یەکینەکێ پارێزنای ژەنێ- یەپەژە و هێزەکێ سوریای دیموکراتیکی- قەسەدە، بەردەۋامێنێ جە ڕزگارکەردەی ژەنی و زارۆڵە ئێزیدیەکان و تەسلیم و شاد-کەردەیشان بە کەسوکاریشان. جەی چوارچێۋەنە ۱۳ ژەنی و زارۆڵێ ئێزیدێ تەرێ کە شەڕڤانەکێ ئازادی جە داعشی ڕزگارێشان کەردێبێنێ و دماتەر جە ئوردووگاو هولی نیشتەجا کریێبێنێ تسلیم بە (یانەو ئێزیدی- ماڵا ئێزیدی) ڕۆژئاڤاو کوردستان-یشان کەردبێنێۋە. دەرەنجام ئارۆ یانەو ئێزیدی سەرجەم ڕزگارکریێکێش تەسلیم بە ڕاۋەبەری وێسەری دیموکراتی شەنگالیش کەردێۋە و بڕیارەن ئارۆ ئێۋارەگا بریانێۋە شەنگال و بە کەسوکاریشان شادێ بکریانێۋە.

نامێ ژەنی و زارۆڵە ڕزگارکریێ ئێزیدیەکان پی جورەنە:

فەهەد قسم ١٥ ساڵێ

شاها رەڤۆ ٣٠ ساڵێ چەنی ۲ زارۆڵانش بە نامەکێ 
: هادی ٦ساڵێ و خەڵات ٥ ساڵێ

زێنێ ئیبراهیم ١٩ ساڵێ- تەلبەنات

ناڤین دەرویش ٢٤ ساڵێ- شەنگال

جیلان جوقی ١١ ساڵێ- تەل عوزێر

وەتفا نایەف ١٠ ساڵێ- تەل عوزەیر

هەڤال ڕەشۆ ١٢ ساڵێ -سولاخ

لەیلا سادۆ ٢٠ ساڵێ- شەنگال

هەیفا سادۆ ١٦ ساڵێ- ڕەمبووسێ

حازیم حسێن ١٧ ساڵێ- ڕەمبووشێ

ئەسرا موستەفا ٢٢ ساڵێ- کۆچۆ

یاگێ بەیادئاۋردەیەن، جە ساڵەو ۲۰۱٤ی دما ئانەیە هێزەکێ پارتی دیموکراتی کوردستانی ئێزیدیەکێ شەنگالیشان بێتەقە و مدرامان ئاستێ جییا، چەتەکێ داعشی دڕندانە ئیزیدیەکێشان کۆمەڵکوشێ کەردێ و جە ئاکامشەنە هەزاران کەسێ شەهیدێ بیێ و سەدان هەزار کەسێ ناچارێ کۆچبەرێ کریێ و هەزاران ژەنی و زارۆڵێ بەدیل بریێ. جەی کاتەۋە تا ئیستە، گەریلاکێ هێزەکێ پارێزنای گەلی هەپەگە و ژەنە گەریلاکێ یەکینەکێ ژەنێ ئازادێ - یەژەئاستار، شەڕڤانەکێ یەکینەکێ پارێزنای گەلی- یەپەگە، یەکینەکێ پارێزنای ژەنێ- یەپەژە و هێزەکێ سوریای دیموکراتیکی- قەسەدەی هەزران جە بەدیلگیریا ئێزیدیەکانشان ڕزگارێ کەردێنێ و بە کەسوکاریشان شادێشان کەردێنێۋە و هەوڵ و تەقەلاشان پەی ڕزگارکەردی سەرجەم ئێزیدیەکان بەردەۋامەن.