ئارۆ (جەمە-هەینی)، جە شارو ئایدهۆڤن-و شانشینو هۆڵەندای ۱۹مین کۆجڤاتی گردیی کۆنگرەو نەتەوەیی کوردستانی - (کەنەکە) بە دروشمو "بە ئامانجو ۋەڵێۋستەی ئاشتی و دیالۆگی دلێۋێی" بەشەداری سەدان کەسان دەستش پنەکەرد.
جە کۆجڤاتەکەنە سەرەتا زوبێر ئایدار ئەندام جە کۆنسەو سەرۆکایەتیی کەنەکەی قسێش کەردێ و خێرئامی بەشدارەکانش کەرد کە نمایندەیی زیاتەر جە ٥۰ پارتێ و ڕێکۋزیێ کوردستانی مەکەرانێ. دماتەر بە سرودو ئەی ڕەقیبی دەیەقێۋ ڕێز جە گەشمەدەکانو ڕاو ئازادی کوردستانی گیریا.
شۆنیشەرە شاهۆز حەسەن هامسەرۆکو پەیەدەی و عەبدلکەریم عومەر قسێشان کەردێ و  ڕۆشنایشان ۋست سەرو دمایین ڤییەرکێ ڕۆژاڤاو کوردستانی و کوردستان بە گردیی.
هەرپاسە مەلا بەختیار ۋەرپەرسیارو دەستەو کارگێڵنای یەکێتیی نیشتمنی کوردستانی قسێش کەردێ.

جە کۆجڤاتەکەنە ڕەفیق غەفور ئەندام جە کۆنسەو سەرۆکایەتیی کەنەکەی پەی ئاژاسەکەیمان فوڕات نیوزیش قسێش کەردێ و ئاشکرا کەرد: "کۆجڤاتەکە ۳ ڕووێ مەخاینۆنە سەدان ئەندامێ کەنەکەی و دەیان مێمانێ بەشدارێش مەبانە".

نامبریا دەستنیشانش کەرد: "جە ۱۹مین کۆجڤاتەکەنە دمایین بارودۆخو ڕۆژاڤاو کوردستانی و هێرشە ئەرەگێرەکێ تورکیا دژ پا بەشەو وڵاتی، یەکێتیی نەتەوەیی، دمایین ڤییەرێ و فاڕیاکێ وەرهۆرزی میانی و چارەسەری دۆزو کوردی و ئاشتی جە  کوردستان و هەرێمەکەنە، ئاژەی سەرەکیێنێ و قسێ و باسێشان سەر مەکریانە  و هامکات بەرنامە و کارنامەو کەنەکەی جە ۋیەردە ئیسە و ئایندە گفتوگۆش سەر مەکریۆنە و هۆرۋنای پەی هامسەرۆکان و ئەندامێ دەستەکان و ئەندامێ کەنەکەی ئەنجام مڎریۆنە.".

کار و چالاکییێ ۱۹مین کۆجڤاتی گردیی کەنەکەی جە ئیسەنە بەردەۋامێێ.