داڵاهۆ بە پایتەختو تەنبور و تەنبورسازی هۆروچنیا

داڵاهۆ کە ئەرنیشتەکێش فێشتەر گۆرانێ و یارسانێنێ بە پایتەختو تەنبور و تەنبورسازی ئێرانی هۆروچنیا.

دمایی یەک ساڵ و نیم جە پەیجۆری و شۆنیرەلوای و کۆشش و داواکاری خەڵکی و چالاکوانە فەرەنگی و هونەریەکانو شارستانو داڵاهۆی سەر بە هەرێمو گۆرانی جە پارێزگاو کرماشانی، دەرەنجام جە کۆبیێوەنە جە کرماشان کە وەزیرو میراس فەرهەنگی و ئەراگێڵی ئێرانی، ڕاوەبەری میراس فەرهەنگی و ئەراگێڵی کرماشانی، ئوستاندارو کرماشانی و فەرماندار شارستانو داڵاهۆی، نمایندەو شارستانەکەی جە پارلەمان و چەنڎین کاربەدەستێ تەرێ ئامادێش بیێ، بەفەرمی شارستانو داڵاهۆی بە پایتەختو تەنبور و تەنبورسازی ئێرانی هۆروچنیا. 
جە کۆبیەکەۆە بڕیار دریا تا،هەوڵێ و کۆششەکێ پەی تۆمارکەردەی داڵاهۆی جە ئاستی جیهانییەنە وەگەڕ بوزیانێ و جە ڕێکوزیاو یونسکۆیەنە داڵاهۆ پێسەو پایتەختو جیهانی تەنبوری و تەنبورسازی و شاری خوڵقنەر نامێش تۆمار بکریۆنە.

داڵاهۆ ۳۶ هەزار کەسێ ئەرەنیشتێش هەنێ و فێشتەرشان گۆرانێ و یارسانێنێ، جە وەرئاواوە ۱۰۰ کیلومەترێ دوورەن جە شارو کرماشانی. جە شارەکەنە سەدان ئوسایێ شارەزێ و دەستڕنگینێ سەرقاڵێ تەنبورسازییەنێ و هامکات سەدان ژەنیارێ شارەکەنە هەنێ کە شارەزایانە تەنبور مەژەنانێ کە جە کرماشان، ئێران و جیهانەنە نامێ و نامبانگشان وەڵاوبییەنەوە و ئەشنایێنێ. سەرەڕاو بەکاربەردەی تەنبور یان تەمورەی بە بەردەوامی جە مەڕاسیمە ئایینەکانو یارسانیەنە، ساڵانە هەم جە داڵاهۆ و کرماشان، هەم جە ئێران و چەندین وڵاتێ دنیایەنە، مەراسێمێ تەمبورنەوازی پەی تەنبوژەنانو داڵاهۆی سازێ مەکریانێ کە چەنی تەنبورنەوازی شعرێ و سرودێ و گۆرانیێ و کەلامێ ئایینێ و عرفانیێ یارسانی مەچڕیانێ کە تێکستەکێشان تاک و تەرا نەبۆنە سەرجەمشان بەزوانی (هەورامی/گۆران)یەنێ و بەگردی تەنبور یان تەمورە سازێوی پیرۆزەن پەی یارسانەکان و بەبێ ئا سازەیە هیچ مەڕاسێموی ئایینی بەتایبەتی جە جەم و جەمخانەکانە ڕێکمەزیۆنە.

تەنبور و تەنبورسازی لانی کەم ڕیشە و دێرینەی ۶ شش هەزار ساڵانەش هەن و ئا سازە دێرینە ١٣ تا ١٤ پەردێ و دوێ تا یەرێ تەلێ (سیمێ)ش هەنێ و دەسەکەش جە دارو وەزێ و کاسەکەش جە داروو تفێ دروستێ مەکریانێ و بەشێ ئەرەنەبڕیاو فەرهەنگ و ژیوا و موزیکو زاگرۆسنشینەکان و وەڵێ ئاومای عەرەبی و ئیسلامی پەی هەرێمەکەی جە ئاستێوی فروانتەرەنە جە هەرێمەکەنە کاربەریش بییەن.
جە ئیسەنە بەگردی جە شارستانو داڵاهۆی کە شارو کرندی ناوەندشەن و هامکات جەلاو یارسانەکانو شارو شائاباد (ئیسلامئابادی)ـەوە، ساڵانە زیاتەر جە ١٥ هەزار تەنبورێ دروستێ مەکریانێ و ڕەوانێ بازاری هونەری کوردستان، ئێرانی و جیهانی مەکریانێ و هەزاران خانەوادێ جە ئا ڕاوە دەرامەتشان بەدەست مەوزانێ.