"فەریدە ئاڵکان"ە: ئەرەکۊشای بە ھۊرچنیەی دەسش پنەنەکەرڎەن و بە ھۊرچنیەیچ دمایش پنە نمۍ

"فەریدە ئاڵکان"ە ئەرەیاۋناش، فاشیزم جە ھۊرچنیەکا ۱٤و ئایارینە کورڎسانەنە شکسش ئارڎ و ۋاتش، "بەڵام کۊشش بە ھۊرچنیەی دەسش پنەنەکەرڎەن و بە ھۊرچنیەیچ دمایش پنە نمۍ. پێۋیسا جە گرڎو مەجالەکانە دژوو فاشیزمی کۊشش کریۊ.".

"فەریدە ئاڵکان"ە یۊ جە فەرمانڎەکا یەژاستاری بەشڎارییش جە بەرنامەو تایبەتو ستێرک تیڤی نە کەرڎ و شیکەرڎەیۊش پۍ قەرارو مرڎناو چالاکییەکا و ھۊرچنیەکا ۱٤و ئایاری کەرڎ.

ئاڵکانە بە یاڎکەرڎەیۊ گەشمەرڎا مانگەو ئایاری دەسش بە قسەکاش کەرڎ و ئەرەیاۋناش، قەرزارو گرڎو گەشمەرڎا کورڎسانینمۍ، بەتایبەت حەقی قەرار.

ئاڵکانە ئەرەیاۋناش، سەرەڕاو قەرارو کەجەکەی پۍ مرڎناو چالاکییەکا دماو بوومەلەرزەکەو مەرەشی، بەڵام دەوڵەتو تورکی ھجومەکێش زیاڎ کەرڎېنۍ و ۋاتش، " ئاکەپە - مەهەپە جیای ئانەی دماو بوومەلەرزەکەی زامەکا گەلی ساڕێژ کەرا، نیازشابۍ بوومەلەرزەکەی کەرا بە فرسەتێوە پۍ ۋېشا. دماو مودەتۍ کەمی لوۍ دلۍ ڕۊژەڤو ھۊرچنیەی و گۊششا بە ئێشەکا گەلی نەڎا. حەجمو گۊرەیی کارەساتو بوومەلەرزەکەی دەرەئەنجامو سیاسەتەکا دەسەڵاتو ئاکەپە - مەهەپەی بۍ. پۍ ئانەی بومەلەرزەکەی فەرامۊش کەرا بومەلەرزەکەشا جە ڕۊژەڤەنە بەرئارڎ.

سەرەڕاو قەرارەکەو ئێمە پۍ مرڎناو چالاکییەکا، بەڵام دەوڵەتو تورکی دەسش جە ھجومەکاش ھورنەگێرت. وەرو ئانەی دوژمن ھجوم کەرۊ، ھامڕېکێما ناچارېنۍ ۋېشا پارېزنا. ھجومشا کەرڎ سەرو باگۊکی، ئامەڎی و بەستای جە ئاکامو جوابدایۊ ھامڕاکامانە چنڎین سەروازۍ  دوژمنی بە سزاو گەلی یاۋۍ. دوژمن هەم جە ھجومی سەروازی و هەم جە ھجومی سیاسیی ۋېش جە گرڎو مەنتیقەکا کورڎسانی جە دژوو گەلی وەردەوامیشا ھەن. ئێمە قەرارو مرڎناو چالاکییەکاما دان، ھامڕېکێما بەپاو ئا قەراریە هەڵسوکۊت کەرا، بەڵام وەختۍ دوژمن مۍ سەرما، گەریلاکێما جە بەرزتەرین ئاستەنە جواب مڎاوە. ئانە جە باگۊک، ئامەڎ، بەستا و سەرحەدەنە ڕووەشدا. گەلەکەما جە حەر چوار پارچەو کورڎسانینە جە وەران ۋەرو گرڎو ھجومەکانە وەردەواما جە مدرامانی. بێگومان ئی مدرامانە مشۊ بەقوەتتەر کریۊ."

گەلوو کورڎسانی به فاشیزمیش ۋات، مرڎە

ئاڵکانە ئەرەیاۋناش، فاشیزم جە ھۊرچنیەکا ۱٤و ئایارینە جە کورڎسان شکسش ئارڎ و ۋاتش، ئەردۊغانشا کەرڎ چێرو خاکیۊ. ئاڵکانە ئەرەیاۋناش، شارەکا کورڎسانینە، بە تایبەتی جۊلەمێرگ، ئامەڎ، مێردین، شرنەخ، ئێلح و بەدلیس-ەنە فاشیزمشا ڕەڎکەرڎۊ و ۋاتش، "گەل بە ئەردۊغانیشا ۋات، جە کورڎسانەنە دەنگ پۍ تۊ نییا. گەلەکەما جە سەرنیشت بە ئیراڎەو مدرامانو ڕابەرایەتی و گەریلاکاما بە فاشیزمیشا ۋات، مرڎە. ئەردۊغان کورڎسانەنە کەمترین دەنگش بەدەسئارڎ.

سەرو نەخشەکەیۊ ئانەی نیشانە مڎا، کە بەحری سیاو و ئەنادۊڵ بە ڕەنگی پرتەقاڵی، کە ڕەنگو ئاکەپەیا پۊشیانەرە و کورڎسان و مەنتیقەکۍ بەحری چەرمەی و مەڕمەڕەی و ئیجەی، کە خەڵکو کورڎیشا چەنەن و کۊچشا پۍ کەرڎەن بە ڕەنگی سوور پۊشیانەرە. گرنگتەرین چێو پۍ ئێمە هەڵۋێسو گەلەکەیمانە. پێسە گەریلاکا ئازاڎیی کورڎسانی، ئێمە ئی هەڵۋێسەو گەلەکەیما بە مۊچیاری و فەرمانێوە پۍ ۋېماش مزانمۍ. حەرچی ڕوۋەبڎۊ، ئا ئیراڎەی گەلەکەیما نیشانش دان، ئێمە ھانی مڎا پۍ سەرکۊتەی. ئێمە پێسە گەریلای تا دمادمایی وەردەوامۍ بیمۍ جە کۊشیای. تورکیانە، حیچ لایەنێوە بەبۍ ڕەزامەنڎیی گەلوو کورڎی سەرکەوتە مەبۊ.

گەلوو کورڎسانی جە پرۊسێوە نادیموکراتینە لوۋا دلۍ ھۊرچنیەکاوە. سەڎان ڕۊنامەنۋیسۍ و سیاسەڎمەدارۍ وەڵۍ ھۊرچنیەکانە گیریۍ. سەرەڕاو ئا گرڎ ھجوم و فێڵ و تەڵاکا، فاشیزمو ئاکەپە - مەهەپەی کورڎسانەنە شکسش ئارڎ، بەڵام مۊچیاری ئێمە پۍ پارتە سیاسییەکا و هێزە دیموکراتییەکا، بە هەدەپەیچۊ، ئانەن سەرجە نۊ ھورسەنگنای پۍ ۋېشا کەرا. پێچی بەحری سیا و چەرمەو ئەنادۊڵشا پۍ ویژدانو ئاکەپە-مەهەپەی جیا ئاست؟ پۍ چی چا مەنتیقانە ڕێکوستەی بەقوەت نییا؟ چا چوارچێوەنە پێۋیسا سەرجەنۊ ھورسەنگنای پۍ ۋېشا کەرا".

ئاڵکانە جە وەردەوامی قسەکاشەنە ۋاتش: "خەمو گەلوو کورڎی ئانە نییا، کە کلیچدار ئۊغڵو بۊ بە سەرۊک کۆمار. تاریخو جەهەپەی و ڕاسیی کلیچدارئۊغڵوی دیارا. سەرەکیتەرین قۊرتە شکسپنەئارڎەو فاشیزمین. ئەردۆغان ماوەو ۲۲ ساڵان سیاسەتی جینۆسایدو گەلوو کورڎی و دلێنەبەرڎەو جمیەرو ئازاڎیی پەیڕەو کەرۊ. پۍ ئانەیچ بە دڵنیاییوە گەلەکەما پۍ شکسپنەئارڎەو ئەردۆغانی هەڵۋێسو ۋېش نیشانە مڎۊ و دەنگو ۋېش بەکارمارۊ.

جە دمادماینە متاوو واچو؛ حیچ هێزێوە فاشیست، یا دەسەڵاڎدار تەنیا بەمەڵامەتو کۊشیای پەرلەمانیۊ نەوڕان. مەبۊ ئینە جە ۋیر کریۊ. وەرو ئانەیچ مەبۊ مژارەکە بە تەنگی و سنورداری تەماشە کریۊ. فاشیزم تەنیا بە پەرلەمان و ھۊرچنیەی مەوڕۊ، بەڵام مەبۊ گرنگییەکەیچش پەشتگۊش وزیۊ، چونکی جە ئاکامو ھۊرچنیەینە شەرعییەتو ۋېشا جە دەس مڎا، بەڵام مشۊ کۊشیای و خەبات هەمەجۊر بۊ. کۊشس نە بە ھۊرچنیەی دەسش پنەکەرڎەن و نە بە ھۊرچنیەیچ دمایش مۍ. پێۋیسا کۊشیای سەرو بنەماو کورڎسانی ئازاڎیی، تورکیای دیموکراتیکی ماڕای گۊشەگیری و ئازاڎیی ڕابەر ئاپۊی وەردەوام بۊ. گەلەکەما فرە ڕێکوزیا و سیاسین. بە پەی لواو من گەلەکەما جە گەڕو دووەمینە پۍ شکسپنەئارڎەو فاشیزمی و ئەردۆغانی دیکتاتۆری چالاکتەرۍ با. پی بۊنۊ و بەمەڵامەتو ئەنجامە سەرکەوتەکا کورڎسانی مبارەکبایی جە گەلەکەیما کەرمۍ."

ھ . ش