جە دمای ئانەی کە سەرسەبای هیزی  پەنجشەممەی، جە شارو نەوسوڎێ ئەوەتەقایێوی فرە گەورە بە هۆکارو تەشەنەکەردەی گازی ڕوەشدا و وڕای یانێوی ٣ نهۆمی و گیان جەدەستدای ٢ کەساش ونەکەوتەوە، دەسەو پلاتفۆمو هۆرام-ی جە ئا بارەوە بەیاننامێوشد.
هۆرام جە بەیاننامەکەنە سەرەڕاو نیشاندای هامخەمی و سەرەوەشی وێش پەی قوربایەکاو ئەوەتەقاکەو نەوسوڎێ و نەوسوڎیەکا، وازیارەن جە خەڵکو هۆرامانی نۆسوڎێ بەتەنیا نازاوە و هامخەمێ و یاردیدەرێش ببانێ.
 
تەمامی بەیاننامەکەی:

خەڵکوو وەشەویسو هۆرامانی ، هەر پاسە کە ئاگادارێندێ، ڕۆو پەنجشەممەی ١٨و خۆردادی جە شارو نەوسوڎێ تەقایۆ گازی چنڎ هاموەڵاتیێ گیانشا جەدەسدا و چنڎ کەسێچ زەخمیێ بیێ . ئینە جە وەختێوە ڕەوەشدا کە ڕۊانە هەواڵو کوشتەو کۆڵبەرا ، گێرتەو مامسایا؟و هەر پاسە جەدەسداو گیانو هاموەڵاتیا بەنونگەو خرابی ڕاوبانی خەمبارما مکەرا . بە جۆری متاومێ بواچمێ؛  کەمتەر خەمی دەسەڵاتدارا پاسەش کەردەن کە ڕۊانە کارەساتێ جیاوازێ بوینمێ .
کارەساتو پەنجشەمەو شارو نۆسوڎێچ یۆ جە ئا کارەساتە ناوەشانە کە گرد لایەما بە ڕوەدایش خەمبارێ بیەمێ . هەر پاسە کە زاندێ چنڎ هاموەڵاتیێ بە تایبەت ئەڎا و زاڕۆڵە کوڕەکەش ، جە کاەساتەکەنە گیانشا جەدەسدان و چڎن کەسێ تەرێچ زەخمیێ بیێ و سڵامەتیشا خاس نیا . پسەو پڵاتفۆرمو هۆرام-ی بە یاگێ وێش مزانمێ؛ سەرەوەشی و هامخەمی وێما پەی کەوارو قوربانەکا و سەرجەم خەڵکو نەوسوڎێ نیشان بڎمێ و داوا جە گرد لایە بە تایبەت خەڵکو هۆرامانی بکەرمێ؛ پەێ کەمتەر کەردەیۆ خەمو کەسوکارو گیان جەدەسدریایا و هەر پاسە کەمکەردەیۆ قۆرسایی ماڵی زامدارەکاو ئی کارەساتەیە، هامکارێ و یاردیدەرێ ببانێ و خەلکو نۆسوڎێ بەتەنیا نازانێوە .

خەلکوو هۆرامانی گرد وەختێ جە ڕوە وەشەکا و ناوەشەکا ژیوای بە دەسە جەم هەنگامەشا نیەنە و ئەرکوو وەڵاتپارێزی وێشا نیشانەدان . ئاڕۆیچ پەنەوازەن پەێ نیشانەداو ئی ڕاسیەیە بە هەر شێوە کە پیما کریۆ بیمێ بە دەرمانێ پەێ کەم کەردەیۆ زاموو زامدارا و هەر پاسە سەبووری و دڵ ئارامی کەس و کارو گیان جەدەسەکا ئی کارەساتەیە .

دەسەو ڕاوەبەریی پلاتفۆرمو هۆرام-ی