هەزاران کەسۍ سویسرانە پەی مەبارەککەرڎەی نەورۊزی کوۍ بیێوە
هەزاران کوردسانیۍ شاروو فرایبورگی جە سویسرانە چەنی دۊسەکاشا کوۍ بیێوە و جەژنەو نەورۊزیشا مەبارەکە کەرڎە.
ئاهەنگوو نەورۊزی جە هۊڵوو "فۊروم فرایبورگ"ی لوا ڕاوە و سیاسەتمەداراو سویسرای، ژەنی و گەنجۍ بەشڎاریێوە فرە و هەسشا ئاهەنگەکەنە کەرد. نەورۊزوو سویسرای کریا بە سەوقات دیاری پەی قوربانییاو بوومەلەرزەکەو مەرەشی.
یاگۍ ئاهەنگەکەو نەورۊزی بە ڕسمەکاو ڕابەروو گەلوو کوردی "عەبدوڵڵا ئۊجالان"ی مەزڵوم دۊغان و ساکینە جانسزە و حەرپاسە پۊستەرێوە، کە سەرۊش نویسیابۍ "نەورۊز مەبارەک بۊ" ڕازیابێوە. گرڎوو هۊڵەکەیچنە ڕسمۍ گەشمەرڎا ورێواسیێبێنۍ.
بەرنامەو نەورۊزی سەعات ١٥:٣٠ دەسش پەنە کەرد و دماو مرڎای دەیەقێوە پەی ڕێزگێرتەی جە یادوو گەشمەرڎا شۊڕشوو کوردسانی، هامسەرۊکاو گلێرگەی دیموکراتیکوو کوردی جە سویسرانە، "ئیسماعیل کارداش" و "سەلما سورەر"ە، جە وتەکاشانە نەورۊزشا مەبارەک کەرد.
حەرپاسە پەرلەمانتاراو سویسرای "مستەفا ئاتجی" و "ئورسولا شنایدەر" و سیاسەتمەداراو کوردی "کاوە کاڤ" قسێشا کەرڎە و نەورۊزشا مەبارەک کەرد.
هەر یۊ جە هونەرمەندا "ئۊزان جۊمێرد، سلبوس و تاری، ئازاڎ بەدران، باران بازید، گرووپوو لێلۊی، گروپوو ژەنە ئازاڎا" لوۍ سەروو تەختەو ئاهەنگی و هونەروو وێشا پێشکەش کەرد و بەشڎارەکێچ چەنیشا گۊرانییشا واتێوە.
نەورۊزەکە بە ورپڕای دماییش ئاما، حەرپاسە داهاتەکەکاو ئاهەنگوو نەورۊزیچ پەی وەنەقۊمیایا بوومەلەرزەکەو مەرەشی کیانیۊ.
س.ز
