جە هەڵەبجە دیدارو ئەکادیمی ھەورامییەکا لواڕاوە

جە ھۆڵو د.مستەفا زەڵمی و بە ئامادەبییەی کۆمەڵێ چالاکوانۍٚ و زوانئەشناسۍٚ و ڕۆشنویرۍٚ ھەورامانی، دیدارو ئەکادیمی پەی زوان، ئەدەب و ڕۆشنویری ھەورامانی ڕێکوزیا.

ئارۆ چوارشەممە، جە ھۆڵو د.مستەفا زەڵمی جەشارو هەڵەبجەی، دیدارو ئەکادیمی پەی زوانو ئەدەب و ڕۆشنویری ھەورامانی ڕێکوزیا و جە میانشەنە  کۆمەڵێ چالاکوانۍٚ و زوانئەشناسۍٚ و ڕۆشنویرۍٚ ھەورامانی ئامادێش بیۍٚ.
سەرەتاو دیدارەکەی بە واتێوە د.مەھاباد هەورامیۍٚ سەرۆکو زانکۆو ھەڵەبجەی دەسشپەنەکەرد جە میانشەنە ئاماژەش بە ئانەیەدا کە وانای بە زاونی ئەڎایی مافێوە بنەڕەتین پەی گردو گەلەکا. هەورامییە واتیچش: ئێمەی ھەورامیچ پێسەو مافێوە وێما مشیۆ وانایما ،جە نااوەندەکاو واناینە بە هەورامی ببۆنە.
دماتەر ھەر یۆ جە م.جەمال بێدار و م. زوبێر خەرپانەیی بابەتشا پێشکەش کەرد. جە بابەتەکانە سەرو رازوانی هەورامی و وانای بە زوانی ھەورامی و ئامادەکاری پەی یۆوستەی مەنھەجێوە یۆگیرتەی و بە رەسمی وانیاش جە وانگاکاو ھەورامانینە، قسێشا کەردۍٚ
 دمایی دیدارەکە بە قسە کەردەی و پەیلوا و سەرنجەکاو ئامادەبییەکا درێژەش پەدریا و داوا کریا ھەوڵی جدی بدریۆ پەی یۆوستەی ھەنگامەکا و یۆگیرکەردەی ڕازوانێ ھەورامی.

دماتەر رێکوزۍٚ دیدارەکەیچ باسشا جە ئانەیە کەرد کە سەرجەم قسۍٚ و باسۍٚ و سەرنجۍٚ تەمامو ئامادەبیاکە جە کۆنویسێوەنە بنویساوە و ئامادە بکەرانۍٚ و جەڕاو دروستکەردەی لیژنێوی تایبەتیۆ ھەوڵ بڎانۍٚ پەی یاگەگیرکەردەی وانای بە زوانی ھەورامی و کەردەیۆ بەشو زوانی ھەورامی جە زانشتگاو ھەڵەبجەی و کەردەیۆ مۆزەخانە و ھۆڵی رۆشنویری پەی ھەورامانی.

ھەڵەبجە - جیھاد ھەورامی