جە ۹ مانگەو کانونو دووەمو ساڵەو ۲۰۱۳ی، جە پاریس-و پایتەختو فەڕەنسای ژەنە پێشەنگەو جمیەرو ئازادی کوردستانی (ساکینە جانسز ئەشناسیێ بە سارا) و هەر دووێ ژەنە کۆشەرێ (فیدان دۆغان ئەشناسیێ بە رۆژبین) و (لەیلا شایلەمەز ئەشناسیێ بە رۆناهی) کۆمەڵکوشێ کریێ. سەرەڕاو ئانەیە بکوشەکەشان عومەر گونەی دەستگیر کریا و بەبەڵگێ سەلەمیا کارش پەی دەستگاو هەواڵگری و سیخوڕی میتی تورکی کەردەن و بە فەرمانو میتی تاوانەکەش ئەنجامدان و جەی ئی چوارچێوەنە چەندین بەڵگێ تەرێ دەنگیێ و دیمەنییێ و وێنەیی و نویسیێ بەدەستێوزیێ، بەڵام دەوڵەت و دادگەری فەڕەنسای تاوانەکەی پەردەپۆش مەکرانێ. جە ئی چوارچوەنە عومەر گونەی بە شێوازێکی گوماناوی جە زیندانەنە کوشیا و واچیا، گوایا  تۆماری سەرەتانی سەرەشەنە بییەن، بە ئا هۆکارە مەردەن. 
پەی پەردەپۆشکەردەکەی هامکات چەنی کوشتەی عومەر گونەی سەرجەم بەڵگێ و دۆسیێ سەرو کۆمەڵکوشیەکەی کە جەلاو دادگای و دادوەری فەڕەنسای بیێنێ، بانگەشە کریا دزیێنێ.

بەشی پەنجەم و دمایی

"ئایا تورکیا بە تەنیا کۆمەڵکوژی پاریسیش ئەنجام دان یان.."

جە ڕواڵەتەنە ڕاستەن بە فەرمانو ئەردۆغانی کاربەستێ ڕژێمو تورکیای 'کۆمەڵکوژی پاریس'یشان ئەنجام دان، بەڵام سەرجەم پەیجۆرێ و ئیماژێ و هەڵوێستەکێ ئانەیە  کە هێزێ و دەوڵەتێ تەرێ ئەورووپیێ و جیهانیێ بە شێوازێ جیا جیێ بەشدارێ تەرۆرکەردەی ژەنە پێشەنگەو جمیەرو ئازادی کوردستانی (ساکینە جانسز ئەشناسیێ بە سارا) و هەر دووێ ژەنە کۆشەرێ (فیدان دۆغان ئەشناسیێ بە رۆژبین) ئەندامەو کۆنگرەو نەتەوەیی کوردستانی کەنەکە-ی و (لەیلا شایلەمەز ئەشناسیێ بە رۆناهی) ئەندامەو ڕێکوزیاو گەنجانی، جە پاریس بینێ. چونکە وەڵەتریچ کەردێ و پیالانگێڵنایێ و گەلەکۆمێ هامشێوێ دژ بە کوردی و ئۆجالانی و جمیەرو ئازادی کوردستانی ئەنجامێ دریێنێ. کە گرنگتەرینیشان گەلەکۆمێ و پیالانگێڵناکێ مانگەکێ ئۆکتۆبەری و شوباتی دژ بە ئۆجالانی و پەکەکە-یەنێ.

"هۆرسەنگانی ئۆجالانی سەبارەت بە کۆمەڵکوشی پاریسی"

جە ئی بارەوە ڕێبەر عەبدوڵا ئۆجالان هۆرسەنگنانی گرنگش کەردەن و مژارەکەش ڕۆشن کەردەنەوە و بەشداری ئا هێزێ و دەوڵەتێ بە گردی و بە تایبەتی 'ناتۆ و گلادیۆ'یش جە کۆمەڵکوشی پاریسیەنە بە وردی وستەبێ ڕووە.
کۆمەڵکوژی پاریسی هامکات بێ چەنی دایوئەسای "دانوستان" و گفتۆگۆکێ 2013و ئیمرالی، جە ئا سەروەختەنە کیاستێ دەوڵەتو تورکیا و کیاستێ تەرێ پەیتا پەیتای سەردای زیندانو ئیمرالی مەکرێنێ و دیدارێ و چەمپنەکۆتێ چەنێ ڕێبەر ئۆجالانی ئەنجامێ دێنێ. جە میانو ئا سەردای و دیدارانە ئۆجالان تیرۆرکەردەی 'ساکینە جانسز'ێ و کۆمەڵکوشی پاریسیش چوون دووەمین کۆمەڵکوشی دێرسیمی و دووەمین گەلەکۆمە و پیلانگڵنای میاندەوڵەتی بەنامێ کەردەبێ و ئاشکراش کەردەبێ: "هەم جە گەلەکۆمە و پیلانگڵنای یەکەمین و هەم جە پیلانگێڵنای دووەمینە هێزێ میاندوڵەتیێ بە گردی و گلادیۆ و ناتۆ بەتایبەتی بەشدارێ بێنێ و هەر دووێ پیلانگێنایێ و گەلەکۆمەکێ گلادیۆ و ناتۆ-ی سەرپەرشتی کەردێنێ و بەردێنەڕاوە". 
ئۆجالان بەرشییە وێش جە سوریا و دەرەنجام بەدیلگێرتەیش و تەسلیمکەردەیش بە تورکیای، بە ئۆپەڕاسیۆنو گلادیۆی جە قەڵەم دابێ و واتەبێش: " تورکیا جە 'ناتۆ'نە ئەندامەن، پەوکەی سەرجەم کەردێ 'سیاسیێ، کۆمەڵایەتیێ و گەلەکۆمێ و پیلانگڵنایێ' پەیوەست بە تورکیای هەنێ، 'ناتۆ - گلادیۆ' ئەنجامێشان مدانێ و تورکیا بە تەنیا ئا ماف و هێزەش نییەن سەربەوێ هەمچینین کەردێ ئەنجامێ بدۆنە. هەر پۆکەی فەڕەنسا و ئەورووپا و زلهێزە جیهانیەکێ گەرەکشان نییەن ڕاستی دلێ کۆمەڵکوشیەکە و وردەکاریەکێش و بەشداربییەکێش ئاشکرێ بکریانێ و سەرجەم هەوڵشان ئانەنە تا پەردەپۆش بکەرانێ.
ڕێبەر ئاپۆ چوون کەردێوێ هامبەش کە گلادیۆ و ناتۆی ئەنجام دان، کوشتەی سەرۆکوەزیرانو سویدی، 'ئۆلف پاڵمێ'ش بەنمومە ئاوەردەبێوە و کە تا بە ئارۆچ کوشتەکەیش پەردەپۆش کریان و ڕاستینە و وردەکاریەکێش ئاشکراێ نەکریێ و پەردەپۆشێ کریێنێ.

"گلادیۆ هێزی ئەوەشاریا و نهێنێ ناتۆیەن"

ڕێبەر عەبدوڵا ئۆجالان دەستنیشانش کەردەبێ: "گلادیۆ هێزی ئەوەشاریا و نهێنێ پەیمانو ئەتڵەنتیکی سەرینی ئەشناسیا بە 'ناتۆ'یەن. ئەگەر ناتۆ نەبیێ کێ و کام هێز و دەوڵەت مەتاوێنە جە پاریس کۆمەڵکوشی 9و چەلێ و تیرۆرکەردەی ساکینە جانسزێ و هەڤاڵەکانش ئەنجام بدۆنە. ڕاستەن جە ڕواڵەتەنە کۆمەڵکوشی پاریس تورکیای ئەنجام دان، بەڵام بە سەرپەشتی و چەمداری ناتۆی و گلادیۆی کەردەیی کریان. فەڕەنساچ ڕۆڵش جە کۆمەڵکوشیەکەنە هەن و بەشدار و وەرپرسیارەن جە ئا تاوانەیە.

"کۆمەڵکوشیەکەی ڕاستە ڕاست 'ئۆجالان'ش کەرد ئامانج"

ڕێبەر ئۆجالان سەبارەت بە ئامانج و هۆکارەکێ ئەنجامدای کۆمەڵکوشی پاریسی زانیاریێ گرنگێش دێبێنێ و واتەبێش: "کۆمەڵکوشی پاریسی دووەمین گەلەکۆمە و پیلانگڵنای میاندەوڵەتی بێ دژ بە من، ڕاستە ڕاست منش کەردەوە ئامانج".
بەپاو هۆرسەنگانی ئۆجالانی و شارەزێ بوارەکەی ئامانج جە پیلانگێڵنای دووەمینی، جە باربەردەی ئا پرۆسە ئاشتی و چارەسەریە بێ کە ڕێبەر عەبدوڵا ئۆجالانی جە دلێڕاسی 1980کانەوە دەستش پنەکەردەبێ و جە 2012 و 2013نە یاوابێ قولە و خەریک بێ بەرهەم بدۆنە و بە ئەنجام بیاوۆنە. ئەگەر هەوڵ و تەقەلاکێ ئۆجالانی ئەنجامگیرێ بیێ بیێنێ، ئا کاتە پەرسەو کوردی جە تورکیا و ناوچەکەنە چارەسەرە بێنە و هاموەخت ڕا جە ئا پرۆسە وێرانکەرەیە مەگێریێ کە هێزە هەژەموونگەرا و میاندەوڵەتییەکێ دژ بە تورکیا، کوردستان و وەرهۆزی میانی "وەرسانی میانی- ڕۆژهەڵاتی ناوینی"ی متێبێشارە و پیلانەشان پەی کەردەبێ و ئیتر سوریا، ئێراق، لیبیا و تەنات یەمەن بە گردی و کوردستان و تورکیا بەتایبەتی ڕووبەڕووێ ئا بارودۆخە سەخت و دژوارەیە نەبێنێوە کە جە 2012وە تا بە ئارۆ تووشش بیێنێ، کە جە ئاکامشەنە ملیۆنان کەسێ کوشیێ و دەیان ملیۆن کەسێ کۆچبەرێ بێ و ئا وڵاتێچە بیێ بە وێرانە بەجۆرێ کە ئاسەوارەکەش تا دەیان ساڵێ تەرێ بە شێوازی نەیێنێ بمانۆوە و کاریگەری خراب جە چەندین نەوێ ئایندەی بکەرۆنە.

"کۆمەڵکوشی پاریسی چ ئاژێوەش شۆنیەرە ئوما"

هێزە هەژەموونگەرێ و مایندەوڵەتیەکێ بە ئەنجامدای کۆمەڵکوشی پاریسی چ ئاژێوەشان جە کوردستان، تورکیا و وەرهۆزنی میانی "وەرسانی میانی- ڕۆژهەڵاتی ناوینی"ننە خوڵقنا؟ جە ڕاستیەنە بە کۆمەڵکوژی پاریسی بە تەوەنێوە چەندین نیشانێشان پێکێ بە ئی جۆرە:

- ئا پرۆسە ئاشتی و چارەسەریەیشان جەباربەرد کە ڕێبەر عەبدوڵا ئۆجالانی جە دلێڕاسی 1980کانەوە دەستش پنەکەردەبێ و جە 2012 و 2013نە یاوابێ قولە و خەریک بێ بەرهەم بدۆنە و بە ئەنجام بیاوۆنە و چێرو کاریگەری هێزە هەژەموونگەرێ و مایندەوڵەتیەکانە، جە 2015نە ئەردۆغانی بە تەمامەتی دماییش پەنە ئاورد و ئێرو جەنگیش جە کوردستان و تورکیا و ناوچەکەنە هۆرگیرسنا.

- تورکیا جە گەشەی ئابوری دوور وزیاوە کە جە 2012وە بە بەدست پنەکەردەی پرۆسە و ئاشتی و چارەسەری ڕێبەر ئاپۆی بە خێرایی هۆرکێشیێ و ئەگەر بە ئا شێوازە بەردەوام بییەبیێ، ئا وەختە تورکیا جە 2021نە یانی ئێساڵ بێ بە 10مین زلهێزو ئابوری جیهانی.

- سوریا، ئێراق، لیبیا و کوردستان و تورکیا و تەنانەت یەمەن و ئێران و ناگۆرنۆ قەرەباخ ڕووبەڕووێ جەنگی و ئاژولێ کریێوە و بەشێوازێ جیێ جیێ وێرانێ کریێ و ملیۆنان هاموڵاتیێشان کوشێ و بریندراێ بیێ و دەیان ملیۆنێ تەرێ کۆچبەرێ بیێ و بەگردی سامانشان بەتاڵان بریا و ئابورییەکەشان جە بناغەوە هۆرشنایەوە و وێران کریا.

- بەکۆمەڵکوشی 04-01-2016ی کە جە سلۆپی ئەنجام دریا و جە میانەشە سێڤێ 'دەمیر ئەندامەو ئەنجومەنو دەبەپە-ی'، 'فاتما ئویار، ئەندامەو کۆنگرەو ژنێ ئازادێ' و 'پاکیزە نایر، هامسەرۆکەو ئەنجومەنو گەلو سلۆپی'، شەهیدێ کریێ و بەکۆمەڵکوشیێ و ئەوەتەقایەکێ ساڵەو 2015ی کە دەیان شەهیدێشان ونە کەوتێوە، ئاندەی تەر بارودۆخەکە ئالۆزتەر کریا و زەمینە پەی جەنگی و دەستونەدای هێزە هەرێمێ و میاندەوڵەتییەکان زیاتەر ڕەخسنیا.

- دوژمانیەتیش دلێ نەتەوەێ و پێکئاما کۆمەڵایەتیێ و ئایینیێ و ئایینزاکێ هەرێمەکەیەنە خوڵقان و قوڵ کەردەوە و پەرت بکەرە و زاڵ ببە دژشان کەردەیی کریا کە تا بە ئارۆچ درێژەش هەن.

- پەی قوڵتەر بییەی سەرجەم ئا جەنگێ و ئاژولێ و ناکۆکی و قەیرانا و هەرگیز چارەسەرنەکەردەیشان، جە ئیمرالی گۆشەگیر و ئەشکەنجەی سەخت و نا ئەخلاقی سەپنیا سەرو ڕێبەر 'عەبدوڵا ئۆجالان'یەرە کە تا ئارۆچ بە دژواتەرین شێواز بەردەوامەن.

بەشی یوەم

 

بەشی دووەم

 

بەشی یەرەم

 

بەشی چوارەم