کتێبو (گۆچانە)ی دوۍٚ ئەرمان‌نامۍٚ جەوێش مگێرۆن

کتێبو (گۆچانە)ی جە نۋیستەی ڕەئووف مەحمودپوور-ین و دوۍٚ ئەرمان‌نامۍٚ بە نامەکۍٚ (گۆچان-ۍٚ و ڕەمای تا بەرەو دانشگای) جەوێش مگێرۆنە و دەقێوی ئاوردیانە و خەلاقا و بە زوانێوی تا ڕادێوە تەنزاوی نویسیان.

کتێبو (گۆچانە)ی کە ماۋێۋە جەی وەڵتەر دەستگاو چاپ و پەخشو زایەڵە-ی چاپ و وەڵاوکەردەوە و جە نۋیستەی ڕەئووف مەحمودپوور-ین و چێش جە وێش مگێرۆنە و باس و خواسش چێشەن؟

زایەڵ  جە ئی بارەوە جە پەلیاەو وێشنە جە تەلەگرام ئی زانیاریێشە دێنۍٚ:

نامێو کتێبی: گۆچانە
بابەت: ئەرمان‌نامە (نمایش‌نامە)
نویسەر: ڕەئووف مەحمودپوور
چاپ و پەخش: زایەڵە/ زمسانو ١٤٠٠ی وەرەتاوی

*ئی بەرهەمە دوێ ئەرمان‌نامێش گێرتێنێ دامان. ئەرمان‌نامەو «گۆچان»ێ و ئەرمان‌نامەو «ڕەمای تا بەرەو دانشگای». 
گۆچانە  دەقێوی ئاوردیانە و خەلاقا. بە زوانێوی تا ڕادێوە تەنزاوی نویسیان. ئەرمان‌نامێوی دەگایانەن. باسوو کوڕێوە بێ‌دەنگی و وێ لاگیری کەرۆ هەکە شێوازێوی جیاوازش پەی چەمنای گۆچانا ئاوردەنەنە و بە پێچەوانەو نەریتی ویەرینی خەریکوو ئاوردەیەنە و جیاوازکاریەن. ئی کوڕە و گۆچانەکاش کەوتێنێ سەروو زوانوو خەڵکی و بیێنێ باعیس بەشێوە فرە جە خەڵکوو دەگای گنا وات‌وویت و هەریۆ بە جۆریێ و جە وینگایێوێ کەسی و مەرامیانەوە باسوو ئا هەرمانێ بکەرۆ و بە دڵوو وێش لەیەکش بدٚۆوه. هەرکەس پەی ئا کاری ناتۆرەی جیاواز تاشۆ و وزۆش وەروو پەلامارێ. بەڵام گۆچانەکێ جم‌وجووڵێوی تایبەتشا وستەن دلێو خەڵکوو دەگاکێ و بیێنێ سەرچەمەو باس و بابەتی.  ...
*  بەشێوە کوڵ جە دەقەکەی:
« ...    باس باسوو گۆچانەکێ "ژیولە"یا. هەر یۆ بە جۆریێ باسش کەرۆ. سەرچەمەو گردوو باسەکایچ پەی دەنگدایشۆ جە ئێنترنتەنە مگێڵۆوە. قاوەخانەکەو "حوزە زوانە"یچەنە پیر و جوان گووشیێوەشا گرتەن دەسەوە و سەرشەوە متەشا مێ. جارجاریچ نووکە گلکێوەش پۆرە ساوا، عەین  ئەجۆ هەشپشی کوشا. 
"قێخا فەڵەدٚە"  قاوەخانەکەنە مێ بەر. چەمش گنۆ  "خاڵە فیلمچی" وەختاریێ دووربینەکەش گرتەن خەڵکەکەی و خەریکوو زەفت کەردەیەن.
دەسیێ وزۆ سەروو چەماش و عال وردوو خاڵەی و دووربینەکەیش بۆوە. چندٚ هەنگامێ ملۆ وەرۆ. 
ماچۆ: ها... کورە، ئەجۆ دووبارە خەریکوو بساتەکەیەنی؟! زانی چێشا و ئی خەڵکە باسوو چێشیشا؟!
خاڵە: ناوەڵا لالۆ فەڵەدٚەگیان، خاس نمەیاوونە. ماشەڵا ئننە وری وری فرەن حیچما حاڵی نمەوۆ!!
قێخا فەڵەدٚە: ڕاسەکێش، ماوێوەن جۆرە گۆچانێو ئامێنێ بازاڕ، چنی گۆچانەکاو ئەوسای فەرقشا  فرەن. چەمەرەکەشا ئەو چەموو دەعبایا مشۆ. ئەجۆ چەمێ هەورێشەیەنێ یان ماری و ماساوێ... خاڵ و مێڵشا ئەجۆ لاملێ ژەرەژانێ. عال بدٚیەیشا پۆنە ئاشکرای عالەم ئەجۆ خوای خوا!!!
خاڵە:  ملۆوە پەشتەو دووربینەکەی. چەمێوەش قووجنۆ و ئەویچشا لکنۆ دووربینەکەیەرە. ماچۆ: دەی دەی... فرە باشەن! مزانی ئا گۆچانێ جە کۆگەوە ئاومێنە؟! دارەکەش چێشەن؟ کێ چەمنێینە؟! فرەتەر دلێ کام چینوو خەڵکیەنە برەوشا هەن؟ قیمەت مەکەرا؟
قێخا فەڵەدٚە: گردوو ئی باس و بالۆرەی جە گۆچانە زەردێوە دەسش پەنە کەرد. ژیولەن ژیولە!!
چی عانەنە کابرایێ هورمێزۆوە. مدٚۆ دلێ قسەکاو قێخا فەڵەدٚەیەرە.
 ماچۆ: ئەرێ ئانە ژیولە ژیولەو چێشیتا قێخا؟ عەیب نیا کەریما نام و ناتۆرەو وەڵاتا. ئانە ئا زۆڵە، سەبا گردوو دنیێرە پەخشش کەرۆوە. خاسا مەگەر ژیولە پیاش کوشتەن؟!  هونەرش هەن هونەر!! 
قێخا فەڵەدٚە:  ئەی تڕحێو پەی وێش و هونەریش؟! دا وس بە مچە بازن! تۆ پی مافەتێ ماچی هونەر؟ زانی چەنی دەگاکێش تێکە داینە؟!  خۆ حەر ئینەتا مەنەن شنیەیدێ سەروپۆپڕوو یۆترینی؟!
مچە بازن: دەی چی چێش بیەن مەگە؟ کوڕێوی تازە هورئاما هونەرێوە تازەش ئاردەنەنە. جۆرە گۆچانێو چەمنۆ بابا و بابا گەورەو ئێمە بە خەیاڵشارە نامێنە. ئینە مافەتەن؟!
قێخا فەڵەدٚە: کوڕی تازە هورئاما یان شەیتانێوە ئاژاولەچی؟ تۆ پانەی ماچی هونەر؟
مچە بازن: دیاوە پەی دووربینەکەی! قێڕناش وەنەو خاڵەی: گێرۆ کورە ؟
خاڵە: ئەرێ وەڵا گردم گێرتەن...عال عالێ گێرۆش... »
*  «ڕەمای تا بەرەو دانشگای» ئەوتەر ئەرمان‌نامەکەو دلێو ئی کتیبیەنە هەکە بە پەشت‌بەستەی و وەرچەم نیای ئەرمان‌نامێوە «گلین هیوزی) ڕێک وزیان.
*  ئی کتیبە  جە ژانروو ئەرمان‌نامەیەنە، دووهەم بەرهەموو نویسەریا. وەڵتەر ئەرمان‌نامەو «کۆمسای» پێسەو یەکەم دەقی ئەرمان‌نامەی جیددی جە زوانی هەورامیەنە وزیان وەروو دەسوو هۆگرا. گۆچانەیچ دووهەم کتیبا چی بوارەنە و خولقیاو ئی قەڵەمی.
 
*با بە ئەسای و وانایۆ کتیبێوە، پەی پاڵەپەشتی نویسەرەکاما و گەشەو فەرهەنگەکەیما، هەنگامێوە گەورێ هورگێرمێ.