سیاسەتە هەڵەکێ دەسەڵاتداریە تاکگەرا و دژە گەلییەکێ ڕەجەب تەیب ئەردۆغانی جە سەرجەم بوارەکانە بە تایبەتی جە بوارو ئابوری و ئیکۆنۆمیەنە، تورکیای وێران و وێرانتەر مەکەرانێ.
 
ئانەیچە بە تایبەتی کاریگەریش فرە خراپش کەردەن سەرو پوڵو نیشتمانیی ئاو وڵاتەیە کە لیرەن و زوو زوو وەرانوەر بە پوڵە جیهانیەکان زیاتەر بەهاکەیش جەدەست مڎۆنە و ڕۆچانە ڕوو بە وڕای و ئەرەتەپای زیاتەریەن.

جە ئی چوارچوەنە، دیسان لیرەی تورکی جە ئەرەوەستەی و هاڕەکەردی بەردەوام بی و جە بازارەکانە هەر 1 دۆلاری ئەمەریکی بە زیاتەر جە 10.5877 لیرێ و هەرپاسە 1 یۆرۆ بە 11.9894 لیرێ مامەڵەشان پۆوە کریان و فڕیێنێوە.

شارەزاێ بوارەکەی، سیاسەتە جەنگەرانەکێ ڕەجەب تەیب ئەردۆغانی بە هۆکارێ سەرەکیێ پەی جەدەستدای بەهاو لیرەی و ئەرەتەپای ئابوری تورکیای مزانانێ و هۆشداری مەڎانێ کە "ئەگەر بە زوویی سنور پەی ئەردۆغانی نەنریۆنەرە، ئاوەختە کەرەتەکێ ئابوری، دارایی، پیشەسازی و بارزگانی بەتەمامەتی بۆوڕانێرە و تورکیا و گەلەکێش ڕووبەڕووێ چارەنویسی تەرسناکی و هۆرشنایای ببانێوە".
شارەزاکێ باس جە ئانەی مەکەرانێ، "ئەگەر بە خێرای ڕێچارێ پەی گرفتە ئابوری و دارایەکێ تورکیای دەستنیشانێ نەکریانێ، ئەگەرش فرەن کە تورکیا تاپول (ئیفلاس) بکەرۆن.

یاگۍ یادئاوەرین کە جە 2005نە، 1 ملیۆن لیرێ تورکیای وەراوەر بێ بە 1 دۆلاری ئەمەریکی. بەڵام ئەردۆغان پەی ئەوەگێڵنای نرخ و بەهای پەی لیرەی، پۆلێ تازەش چاپ کەرد و 6 سفرەکێش لابەردێ. بەئی جۆرە 1 دۆلار و 1 لیرە نرخشان یەکسان بی. بەنزیکی و بەشێوازێ جە شێوازەکان، لیرە تا ساڵەو 2015ی نرخ و بەهاو وێش وەرانوەر بە دۆلاری پارێزنا. بەڵام جە دمای تێکدای پڕۆسەو ئاشتی جەلاو ئەردۆغانیەوە کە ڕابەر ئۆجالانی دەستپنەکەردەبێ و ئەنجامی گرنگش پەی تورکیای و سەقامگیری ئابوریی، ئاساییشی و کۆمەڵایەتیی و سیاسیی ئا ووڵاتەیە چەنی وێش ئاوردەبێ، ئیتر سات بە سات لیرە بەهاش جەدەستدا و هامتەریب چەنی ئانەیە بەگردیی ئابوریی تورکیا تەپارە، سەقامگیری ئابوریی، ئاساییشی و کۆمەڵایەتیی و سیاسیی گورزی گەورەش ونەدریا.