نالی یام حەزرەتو نالی (بەشی دووەم)

«نالی یام حەزرەتو نالی» کتێبێوی ڕەخنەگرانە سەبارەت بە نالی شاعیری و جە نویستەی و ئامادەکەردەی ”ئەسعەد ڕەشید“ین و دیدگا و پەیلوای و ئەنەیاوی نویسەریەن جە سەردەمێ کە ”نالی“ش چنەنە ژیوان و نویستەن.

وەڵېنە...    

وەنەری ئازیز ، لاپەڕەکۍ وەردەسیت چن سەرنجێ وېمەنۍ  سەروو دیوانە شېعرەو ( نالی ) و وینگاو‌ وېچم پەی کەسایەتی نالی, یاوانەو من پەی شېعرەکان و ( نالی ) پېوەسەن بە خودو وېمەوە ، تا چن تاوانم دیمو دلۍ شېعرەکان و نالی بوین و ، تا چن تاوابۊم  دوور جە گیانی دەمارگیری و ناوچەیی ڕەخنەو تالېقەی بنیاڎنەرە گېروەنە دیمە ناڕۊشنەکاو شېعرەکاش ، شمەی وەنەر سەنگ و مەحەکیندۍ  پەی ڕاسی یام  پۊختەکەردەی یاوانەکام.

نویستەی و ئامادەکەردەی/ ئەسعەد ڕەشید

بەشی دووەم

نالی و حوجرەو مزگییەکێش: 

 نالی جە ( یۊشیاینە ) شوبهاندنەنە  فرە لاوازەن ،  وەختێ  باسو حۊجرەو مزگیەکێش مەکەرۊن کە فرە  وېرانەن ،  یاگۍ نیشتەی نیەن ،  دارەڕاکەش بەرکۆتەن ، دیوارەکېش  لەمەشا دێنەو خەریکەن وڕا  ،  بانو حۊجرەکێش خۊڵەش سەرۆ نەمەنېنە و دارەڕاکەش بەرکۆتەن ، ئیتر  وېناش کەردەن بە ( مازی هەرێ ) زەعیفی کە پەراسووەکېش کۆتېبان  بەرۆو  بە دەس  بژماریا  
هەر  لەسەربان  دار بە داری ڕایەڵی بژمێرە وەک
 لا پەراسوی  بارگیرێکی کە زیندوبێ  بە ناو 

ژوورو  حۊجرەکێش  مشنان بە ( لەمەو ژەنی ) ! وەختێنە   حامېلېنەو  زاروڵەش  پەنەن کە شوبهاندنێ فرە لاوازو دوور جە ڕوحی شاعېرانەن 
حوجرەکە ئاوس بوو  وەعدەی خۆی بەهارێ بو  بزێ
 وەزعی حەملی کەوتە  پایز ،  نا بەکام و  نا تەواو
 دماتەر ماچۊ  ئاوەو دلۍ  ژوورەکەی  پېسەنە  ئاوەو دلۍ  ڕەحمو  ژەنۍ ( نطفە ) و وەختێ  ژوورەکە  وڕا  پەیمان بەرکۆت کە هیشتای هەر ئاوینەو نەگرسێنەو نە بیېنە بە ( گۊشت و  ونی )! دیسان یۊشییەیێ  فرە لاوازو گۊلش بەکارئاردەن .  
خۆ سکی  نیشتۆتە ئەرضی و ، تومەزا هێشتا وەکو
 نوطفەکەی هەر ئاو بو ، بەریاوێت لەبەر هەورو هەڵا 
دیسان هەر جە باسو حۊجرەکێشەنە  تەعبیرێ (بەروستێوە ) بەکارمارۊ کە بە لەیەکدایۆ (نالی ئەشناسەکان ) فرە بەهېزەن ،   بەڵام هیچ  هېزێش نیەن چەنە  ، وەختێنە  مۆجەو سەردای ملۊ دلۍ  ژوورەکەیش ( حوجرەکەیش ) یەکسەر مەگېڵوۊوە و مزیۊرە ، چونکم  ژوورەکەش ئڼڎە سەردەن ، مۆجەو سەرداکەی نمەتاوۊ  وەردەمو  سەرداو  ژوورەکێشەنە  وېش بگېرۊ 
هەر لە ئێستاوە وەها سەرمای تێدا سەرما دەبێ
 ڕەنگە ناوی لێ بنێی چوار طاقی سەرما تێخراو 

•         *               *     *          *        *                  
پارچە  شېعرێ  تەرەنە  نالۍ  ئەپېسە تاریفۍ ،  هەم وېناو زۊڵف و ڕومەت و یارېش مەکەرۊن 
 زوڵفت کە لەسەر ڕوو بە خەم و تابشە ئەمڕۆ             
 دودی سیەهی عودە لەسەر عاریضی پشکۆ 
  ڕومەت و یارەکېش  وېناکەردەن بە سکەڵ و خەڵوزی و  زۊڵفېچش بە دوکەڵ و دارو سیاوو      عودی ( بوخورد ) ، وەختێنە دارو سیاوو عودی منریۊ سەرو سکەڵیۆ مەسۊچۊو بوێ  وەشە بەرمەکەرۊن ،  دیسان  وېناکەردێوە  لاوازەن و  دوور جە بەهرەی شاعېرانەن
دیسان ماچۊ   : 
خاڵت چییە ؟ دانەی گەنمی جەننەتی ڕووتە  
چاوت چییە ؟ فیتنەی حەرەمی قیبلەیی ئەبرۆ 
ڕومەت و یارەکېش وېنا مەکەرۊن بە بەهەشتی و خاڵۆ ڕومەتیچش وېنا مەکەرۊن بە ئا دڼە گەنمۍ (خەلە ) کە ئادەمی  واردە ،   یانی  گەر کەسێ دەس بارۊن پەی خاڵۆ گۊنایت ، جە بەهەشت و ڕومەتیت   بەرشکەری و دورش  مەوزیۆ  .
 هەر پېسە وەڵتەر باسمان کەرد هۊنەرو شېعر تاشای ( وەشکەردەی ) زیاتەر زاڵەن ملۊ نالیرە هەتاکو بەهرەی شېعرییە .  وەختێنە جە پارچە شېعرێ کە بە نایابە دریێنە قەڵەم ، نالی چن  واچێ کۊردیۍ جە قاڵبێ عەرەبینە مجۊرەو ( سەرەو   بۊرەو کەسرەو  تەنوین )شان  مڎۊ پەنە  . کارێ چامنە نەک هەر هیچ  هۊنەرو جوانیێش نیەن ،  پەی شاعیرێ نامداری ناپەسەڼدەن 
دروني لدار ال( شارزوری) و بردە 
کفرمیسک گرم  الی  آوی  سردە
 سۆزو دڵ و دەرونیم پەی یانەو شارەزووری و تەوەنەکاش پېسەنە پېویسی هەڵسە گەرمەکام پەی ئاوۍ سەردۍ
 تری دشتە بالورد کانت بهشتە
 ثم الورد باران علی خاک وردە
     *           *           *         *            *                 
 نالی و تاریفۍ دڵیش : 
مەولەوی ماجۊ
 دڵ دیار نیەن های نەکەردەبۊ 
وە خزمەت ئازیز تەشریف بەردەبۊ
 ئەپاسە مەگېڵۊن شۊنەو دڵیشەرە ( بە خزمەت ئازیز ) ، تەشریفش بەردەن ، بەڵام نالی ئەپېسە مەواچۊن
 بێ ئەگەر بێتە دەرت ، دەیدەیە بەر شەق وەکو گۆ 
نییە زاتیشی نەیێ دڵ ، چ بکا قووڕ بە سەرە 
بە یارەکېش ماچۊن گەر دڵم  بێ پەی وەرو بەرێت ، پېسە تۊپۍ مڎەیش وەرو شەقا !!! بەڵام مەجبوریچەن دەسەڵاتش نیەن .
 نالی گېڵان هامشېوەو واچەکان بېزۊوە و دماتەر جە بەیتێنە مجۊشارە 
ئەی ساکینی ڕیاضی مەدینەی منەوەرە 
لوطفێ بکەو بفەرموو مەدینەی منەو ، وەرە
 منەوەرە ، یانی ڕۊشنایی ، وەراوەرشۆن ( منەو وەرە ) یانی هینو مناو بۊ ئەی ساکین جە باخچەو مەدینەی منەوەرەی ، لوتف کەرەو واچە مەدینەو منەن ( شارو منەن ) و تەشریف بارە پەی ئېگەی  .
وۍ بەکەمزانی نالی یاوان ئاستێ کە سنورە ئینسانی و شەرعییەکېچش ویەرنێنۍ ، وەختێنە ئینسان ڕېزدارەن و تەکریم کریان جە لاو خالیقیشۆ ( لقد کرمنا بنې آدم ) کە سەرو بنەماو ئینەیچە  ئینسان نمەبۊن  وېش بە کەم   بزانۊو وېش  وەزنۊرە  پەی ئاستو هیچ مەخلوقێ تەری . گیانەوەرو ( توتە )ی ڕاسەن مەخلۊقەن ، بەڵام گڵیاوەن . ئیتر نالی کە گنۊ تاریفی شارو ( مەدینە )ی کە مەزارو پېخامئاوەرو ئیسلامیش چەنەن ئەپی جۊرە ماچۊن
 نالی کەوا سەگی سەگی ئەو مەرزو بومەیە
 ئەمما سەگی موعەللمی بێ دەنگ و ، بێ وەڕە 
نالی وېش مەکەرۊن  بە توتەو توتەو خاکو مەرزو مەدینەی ،  یانی گەر جە شارو مەدینەینە  توتێوە مەژیوۊن ، نالی ئاستو   وېش مەوەزنۊرە پەی توتێوە بۍ دەنگو بۍ گەفی کە خزمەت بە توتەکەو شارو  مەدینەی  مەکەرۊن  .
دماتەر زیاتەر  وەزۊرەو داوا مەکەرۊن بەشکو بە بەرەکەت و خاکو مەدینەی گەڕۊڵی و  پیسی و گڵیاویش لابەرۊن 
بەڵکو لە فەڕڕی طەیبە کە طیبی پەیامبەرە 
ساکن ببێ گەڕۆڵی ئەو ( کەلبە ) بێ فەڕە  
•                       *         *       *     *     *  
مەولەوی جە تاریفۍ  وەهارینە  باسو ( ۋلە نەرگزی ) مەکەرۊن کە وەختێنە  شەونم  وارۊنە سەرش و پرژېش مەڎۊ وەنە ، دلۍ پەردەو نەزاکەتینە چەمە مەسەکاش مەکەرۊوە
 جە پرژەی شەونم نە تۊی پەردەوە 
نەرگز مەس مەس چەم  وەڵا کەردەوە
 بەڵام نالی ( ۋلۆ نەرگزی ) یاگێ تەرەنە مەوینۊ ، وەختارێ ڕۊ قیامەتی مەردەکۍ دلۍ قەبرەکانە بەرمەیان  پېسە نەرگزی مدرێنۍ و چەمېشان پڕێنۍ تۊقەو سەرێشان ، کە وېناکەردەی چامنە پەی ۋلە نەرگزی نمەگۊنجیۊ  چونکم ، زیڼۆبیەکۍ هەم خاس و هەم خرابشان چەنەن ، بەڵام  ۋلە نەرگز پەڕەن جە جوانی و پاکی و نەزاکەتی .  
ئایا قەدو قیافەیی خۆی بو بە کێلی خۆی
 یا ساقی عەبهەرە کە دوو چاوی لەسەر سەرە 
عەبهەر = نەرگز
 نالی پەی گۊنجنای قافیەو شېعرەکاش کۆتەن ماڕای واچەکان ، بە نمونە واچۍ ( نیمەڕۆ ) ش کەردەن بە ( نیمەڕە ) 
مەخزونی ڕوقعە حەببە بە حەببە لە کەففەدا 
خالص دیارە مس کە مسە ، عەینی زەڕ زەڕە
 زەڕڕێک لە چاوی بۆتەیی صەڕڕافی کەففەدا 
مەخفی نییە ، دیارە ، وەکو ڕۆژی ( نیمەڕە ) 
نالی جە تاریفۍ گوارانە ماچۊ  :
 مەڵامەتو زەردی گوارا   ئاڵتون نیەن ، بەڵکم ئانەن کە هۊرواسیێنۍ گۊشۍ ژەنېرەو یاگېشان بەرزەنەو جە تەرسینە ڕەنگەشان  زەرد بیەن
 سەراپای گوارە زەردی ترس و لەرزە
 دەڵێی عاصی بووە لەو جێگە بەرزە
 وېنا کەردەیێ فرە لاوازەن ،  هۆرامی چن زەریفش واتەن
 گۊشەوارەکېت جە گۊش ئاوېزان 
خۊ پاییز نامان من گەڵام ڕېزان
 فرەو شاعرەکان وەختێنە باسو گەرمی کوورۍ دەرونیشان مەکەران ، شۊنیشەرە  وېناو هەڵسۆ چەماشان نمایېش مەکەران 
تاقەت بی بە هوون جە سەختی زامان 
تک تک چەنی هەڵس ڕېزا  وە دامان 
نالی  وەختێنە باسو هەڵسۆ چەماش مەکەرۊن ماچۊ  هەڵسەکېم ئاوینۍ و هەم دانەو ناری ، دڵۊپەو ونۍ ، دماتەر ڕېزارەو گرسانەو مەبانە بە تەرزە ؟؟؟
 سرووشکم ئاب و دانەی نارە ، کێ دی 
بە گەرمی داوەرێ بەم طەرزە ( تەرزە ) 
هەڵسی  چ تەصویرێنە یام  وېناکەردەیێنە بەستەنشان ؟ دووەبارە نیارەی واچەکان جە بەیتە شیعرەکاو نالینە شۊندەسێ ئاگاییش چەنەن کە وەشکەردەی و تاشای شېعرۍ سەلەمنۊ 
نالی ماچۊ
 کەوا  زەڕتایی یەکتایی دەڵێی خۊرشیدی ئافاقە  
مەڵێ خۊرشیدی ئافاقە ، بڵێ میهرێ ( کەوا ) تاقە 
 واچۍ ( کەوا )ی ماناو کەواو ژەنۍ ( پۊشای کەوای ) ، بەڵام دېڕەی دووەمەنە  هەمان واچېش بەکارئاردېنۆ ( کەوا ) بە ماناو ( ئەپاسە ، ئاوا ، کەوایە ) . یانی بەخاترەو واچۍ ( کەوا )ی دېڕە شېعرەکېش متېنەرە کە مانێوە قوڵە هۊر نمەگېرۊ .
گەمە کەردەی بە واچەکان کسمێ  نالی بیەن بە وایەو  واچەسازی و  ڕېک وستەی  قافیەو شېعرەکاش ،  نالی ماچۊ 
صۆفی و سەرو مێزەر ، من و زوڵف و سەرو دەسماڵ 
من کوشتەی   لاجانگم و ، ئەو کوشتەی جانگە
 یانی من کۊشتەو لاجانگ و نازارانا و  وشکە صوفی کۊشتەو جەنگین  چەنی ئانېشا کە بە دڵش نیەنۍ ،  دیارەن دېڕەی دووەمەنە نالی واچۍ ( جەنگ )یش فاڕێنە بە ( جانگ ) بە خاترەو جیناسی چەنی واچۍ ( لاجانگ )ی  ، دماتەر واچۍ ( لاجانگی ) پەی ژەنۍ بەکار نمێ و زیاتەر جە پیاینە بەرمەگنۊ .
 دماتەر ماچۊن 
فەرموتە کە بانگم کە ، شەوێ دێمە کەنارت 
قوربان وەرە شەو ڕۆیی ، ئەوا وەعدەیی بانگە
 واچۍ ( بانگ )یش  دوېجار ئاردېنە بە ماناو ( چڕیە)ی و بە ماناو ( بانگو ساعبی ) 
دیسان نالی  واچۍ ( مانگ )ۍ و ( ماهی) بەکارمارۊن   پەی بەیتە شېعرێ دماتەری ئەپېسە 
بنوێنە برۆ ، یەعنی هیلالی سەری ماهت
 چوون وەعدەیی ماچی سەری کۊڵمت ، سەری مانگە 
ماچۊ بنمانە برۊت کە نیشانۍ هیلال و سەرو مانگېن ، چونکم  وەعدمان سەرو مانگۍ بۍ کە ماچێم دەی پەنە !!! ( سەرو مانگۍ  پەی ماچۍ ) دەسەواچێ نا شاعېرانەو بۍ مانان  .
نالی  خاوەن و بابەت و هەم ویرێ قووڵی نیەن پەی بینا کەردەو داستانە شېعرۍ . نالی جە قەصیدە  درېژەکاشەنە  تەنیا کەتوار ( واقع ) فاڕۊوە پەی دلۍ بەیتەکاش بەبۍ بەکارئاردەی هۊنەرێ جوان و  زەریفی و  واچەسازیێ  ماناداری  . پەی نمونەی جە قەصیدێ  تولانیەشەنە   باسو سەفەرو حەجیش مەکەرۊن ، قەتارو حوشترەکا و ڕەنگو خاک و خۊڵۆ ڕاکۍ و کەوەیی ئاسمانی و هیلاکی حاجی و حۊشترەکا 
مەڵێ دەشتە ، بڵێ دنیا هەموو خانێکە ، ئەم حەوشە
 چ حەوشێکە ؟ کە ئافاقی حەصار ، ئەفلاکی سەربانە 
نمەواچە  ئانە دەشتەنە ، واچە دنیا گردش یانێوەن و ئا دەشتۍ  هۆشەکېشەنە   چ  هۆشێوەنە ؟ حەسارش ئاسۊی  دوورا و سەربانەکەش ئاسمانەن
 سماقی ئەحمەرە ، یا قوتی ڕۆح و ئاگری نەفسە
 حەصاتی ئەبیەضە یا شوهب و نەجمی ڕەجمی شەیتانە 
یانی :  خاک و خۊڵەو دەشتەو ڕاو مەککەی ( سماقی سورېنۍ ) یان  واردەو  ڕۊحی و ئایېرو نەفسی ؟ وردە تەوەنەکېچش ( چەوی چەرمەن ) یان ئا هەسارېنۍ کە ئاسمانەنە  کېشیاو  ڕەجمۆ شەیتانەکان مەکەرانو دورشان مەوزاوە جە شارو مەکەیی و دمایی گنارە ئېگە ؟
 دماتەر نالی ماچۊ  :
شەفیری چاڵی شۆری هەر دەڵێی لەعلی نمەک پاشە 
حەفیری چاهی وشکی هەر دەڵێی چاهی زەنەخدانە 
گەرەکشەن وېناکاری کەرۊن ، بەڵام نمەتاوۊ ، ماچۊ  قەراخ و چاڵە ئاوە سۊڵەکا و دەشتەو  ڕاو مەککەی هەر ئەجۊ  لەب و یارېن کە نمەکشان شانیابۊ  پۊرە ،  قووڵی چاڵە وشکەکاچ  هەر  ئەجۊ چاڵۆ سەرو چەناکۆ  یارەکېشەنە .  چن تەسویرێ گۊلەن .
نالی بە سواری حوشتری و ئینا دلۍ کەژاوۍ سەرو حۊشترەکەیۆ ، بە هۊکارو جوڵەو کەژاوەکۍ جیکە جیکو شانو کەژاوەکۍ  وېنایێ پەی نالی درۊس مەکەرۊن ، جیکە جیکو کەژاوەکۍ بە وانای ( سبحان اللە ) کەردەی مورغەکا ( پەلەوەرەکا ) سەرو تەخت و حەزرەت و سڵېمانی مەوینۊن صەریری جونبوشی تەخت و مەحەففەی مەخمەڵی سەوزی
 دەڵێی تەسبیحی مورغانە ، لەسەر تەختی سولەیمانە 
گەر شېعر تاشای نەبۊن ئانە کەی وېنا کەردەیەن ؟
 دیسان نالی جە تاریفۍ شەوەو میعراجینە مەواچۊن :
 لە خەوف و خەجڵەتی ، بەدری شەهی ئەنجوم سوپەهه ، ئێستەش 
کە هەڵدێ  زەردیی و سووری  لە طەڵعەتیا  نومایانە 
یانی ، مانگێ چواردۍ کە شاهێوەنە ( پاشا ) و  هەسارەکۍ ئاسمانی لەشکرشەنۍ ، ئیسەیچ کە هۊرمێ جە تەرسەو ڕۊشنایی شەوەو میعراجینە ڕەنگەش زەردەنەو جە خەجاڵەتیېچشەنە  ڕەنگەش سورەنە  ،  دیسان وېناکەردەیێ  فرە لاوازو نەگۊنجیان  .
 نالی  ئاسمانی مشانو ( وېنا ) مەکەرۊن بە حەزرەت و یەعقوبی و  هەسارەکۍ  ئاسمانیچ بە چەماش ! و شەوۆ میعراجیچش وېنا کەردېنە بە حەزرەت و  یۊسفی ! ، وەختێنە شەوەو میعراجی ( یوسف ) دوورە مەگنۊوەو جارێتەر نمەگېڵۊوە ، ئاسمان ( یەعقوب ) بە چەمەکاش ( هەسارەکۍ ) مەگرەوۊن و  کۊرمەبۊنەو  چەمېش چەرمۍ  مەبانە ،  پەوکەی هەسارەکۍ  چەرمېنۍ ! 
لە هیجری یوسفی میعراجی  یەعقوبی فەلەک  چاوی
نوجوومی  بوو سپی  هێشتاکو  هەر  حەیرانەو سەهرانە
وینمۍ نالی فرە هۆڵېش دێنۍ تەصویرۍ و هەم وېنێ خۊلقنۊ  و شېعرەکاش ڕازنۊوە  پەنەشا ، بەڵام نەتاوانش . 

دیسان ( نالی ) وۍ بەکەمزانی وېش نیشانە مڎۊ ، جە تاریفۍ شارو ( مەدینە ) ینە ئەپېسە مەواچۊن :
 نەبو ڕووم بێمە خاکی چاکی پاکی طەییبە( مەدینە ) ، تا بیستم
 بە ( سەگ ) نابێ مولەووەث ئاوی زەرقا ، بەحری ئیحسانە 
ماچۊ  سەرەتا ڕووەم  نەبۍ بەونە پەی خاکو ( مەدینە )ی ، هەتا وەختێ  ئەژنیم  ئاوەو  بەحری بە دەمو ( توتە )ی پیسە نمەبۊ ! دیسان یاگێ تەرەنە  وەراوەرو  وەشەویسەکېشۆن ماچۊن 
ئەو خاکی دەرە مەسکەنی صەد ساڵەمە ، شایەد
 جارێ لە دەمی تۆ ببیستم ، ( سەگ بەوەفایە ) 
ماچۊ  دەبا جارێ دەمو  تۊوە  بژنەوو کە واچی ( نالی توتێ بەوەفا ) و وەرو بەرەکەیما  !
 نالی  ڕەخنەش گېرتەن جە ( مونەججیم ) ەکا ، ئا کەسۍ کە کارو هەسارە ئەشناسی مەکەران و جوڵەو  هەسارەکان بە هۊکارو ڕوداوەکان مەزانان .  نالی  چوون یەکشان  مەکەرۊن چەنی ( داڵە گۊشت وەرەی ) کە سەرو لاکە  تۊپایاوە  مەژیوان و  فەلەک و تەمامو گەردونی بە ( لاکەی تۊپێ ) مەوینۊن ، کە چوون یەکیێ فرە نا مەنتیقی و نا دروسەن .
 مونەججیم ( کەرگەس ) و ( لاشە )ی لەلا شەیئێکە 
 نەیزانی کە ئەم  ئەفلاکە چەن لاکە ، کە ئەم گەردونە چەن دونە
ناچوونیەکی دلۍ بەیتەکان و ( نالی ) نە  بەر مەگنۊ کە ماناو میسراعی دووەمیش تەمام پېچەوانۆ میسراعی یەکەمیشەن
 دڵ سیاسەنگ نەبێ ، مائیلی خاکی وەتەنە 
خاڵی لەعلی حەبەشە ، ساکنی بوردی یەمەنە 
دڵ ئەگەر پېسە تەوەنۍ  ڕەق و سیاو نەبۊ ، حەتمەن مەیلو ئارەزوش پەی لاو نیشتمانییەن ، پەی نمونەی خاڵەی سیاوە مەسکەنش ئینا سەرو نیشتمانیشۆ کە ڕومەتی چەرمەو تاڵۍ زۊڵفە سیاوەکاشەنۍ  ( بوردی یەمەنی ) قۊماشێ خوری بیەن کە ڕوتەختش چەرمەن و خەتۍ سیاوېش چەنەنۍ 
دېڕە ( مسراعی ) یەکەمەنە   ماچۊ دڵ وەختێ مەیل و نیشتمانیش هەن گەر ( سیاو ) نەبۊنە ، بەڵام دېڕەی دووەمەنە  نمونە مارۊوە  پەیش کە ئەها خاڵەی ( سیاوە ) مەیلش هەن پەی نیشتمان و وېش کە ڕومەت و یارېن داییم ئینا سەرشۆ  ، چەنی ئانەیچ وېناکەردەی خاڵۆ ڕومەتی چېرو تاو زۊڵفانە نادروسەن ، چونکم وەختێنە زوڵف و پەرچەم مائیل مەبۊنە سەرو ڕومەتی نەک هەر خاڵەکۍ گۊمەبۊ بەڵکم ڕومەتیچ  مەشاریۊوە ( بەو شەوە ڕۆژ گیراوە ).

پەلیانەو ANF هەورامی/ ئی نویستەیە گوزارەن جە دیگا و پەیلوای نویسەری

 

بەشی یوەم/ یەکەم