زایەڵە ٣ کتێبێش چاپۍٚ و ۋەڵاۋۍٚ کەردێوە

سازی چاپی و ۋەڵاۋەوکەردەی (زایەڵە) کتێبەکۍٚ (خاتوونێ قەڵەم ڕەنگینێ هەورامانی)، (دڵی وەش) و (دیوانوو سەردار سادێقی پایگەلانی)ش، چاپۍٚ و ۋەڵاۋۍٚ کەردێوە و ڕەۋانۍٚ کتێبخانەو هەورامانیش کەردۍٚ.

سازی چاپی و ۋەڵاۋەوکەردەیۆ (زایەڵە)ی، جە شارو مەریوان-ی بەردەۋامەن جە خزمەتکەردەی بەزۋان و  ئەدەبیات و چاپەمەنی نۋیسیای هۆرامی. جە ئەی چوارچۋەنە، زایەڵە یەرێ کتێبەکێبۍٚ تەرێش بە نامەکۍٚ: (خاتوونێ قەڵەم ڕەنگینێ هەورامانی) جە ئاماڎەکەرڎەی ڕەحیم ڕەحمانی، (دڵی وەش) جە نۋیستەی جەماڵ قادرپوور-ی و (دیوانو سەردار سادێقی پایگەلانی ئەژناسیا بە وەیلان )یش، چاپۍٚ و ۋەڵاۋۍٚ کەردێوە و ڕەۋانۍٚ کتێبخانەو هەورامانیش کەردۍ و ۋستێش وەرودیڎوە وانەران.

پەیوەست بە ئی یەرە کتێبەیە، زایەڵە ئی زانیاریێشە دێنۍٚ:

‍ 
نامێو بەرهەمی: خاتوونێ قەڵەم ڕەنگینێ هەورامانی
بابەت: وتارێ، ئەوەکۆڵیای، شێعرێ 
بەرهەموو پۆلیێ خاتوونە قەڵەم ڕەنگیناو هەورامانی
ئامادٚەکار: ڕەحیم ڕەحمانی
چاپوو ئەوەڵی: وەهاروو 1401
چاپ وپەخش: زایەڵە

ئی بەرهەمە؛ بەشێوە چا وتار و شێعراو ژەنە قەڵەم بەدەسە هامچەرخەکاو هەورامانیا هەکە جە هەمامەو بەرزنرخنای و ڕێزگێرتەی جە پلەوپایەو قەڵەموو ژەنە ئەکتیڤەکاو بواروو فەرهەنگی جە گۆڕەپانوو فەرهەنگوو هامچەرخوو هەورامانیەنە، ساڵەو 1397ک.ڕ بە کۆششوو ئەنجومەنوو نەسیموو فەرهەنگوو هەورامانی، جە شاروو پاوەیەنە بریان ڕاوە.

بە هەوڵ و کۆششوو بەڕێز ڕەحیم ڕەحمانی ئامادە کریان. ئەرکوو سنۆقوو پاڵپه‌شتی جه‌ نویسه‌راو هه‌ورامانی (واران) سه‌ر به‌ ئه‌ره‌مه‌رزیای فه‌رهه‌نگی هونه‌ری شنه‌و (نسیم) فه‌رهه‌نگوو هه‌ورامانی، ئێنتشاراتوو زایەڵەی  چاپ و پەخش کەردەن.
*  ئینە نۆهەمین بەرهەمەن سەروو ئەرکوو ئا سنوقی چاپ بۆ و گنۆ وەردەسوو هۆگراو گەشەو فەرهەنگ و ئەدەبی.

٭٭٭٭

نامێو بەرهەمی: دڵی وەش
بابەت: شێعرێ 
شاعێر: جەماڵ قادرپوور
چاپوو ئەوەڵی: وەهاروو 1401
چاپ وپەخش: زایەڵە

ئی بەرهەمە یەکەم دەفتەرە شێعروو شاعێری ناسک خەیاڵ؛ بەڕێز جەماڵ قادرپووریەن.  بە پۆلێو غەزەڵێ ناسکێ و هەستاویێ ڕەوتوو غەزەڵێش ڕازنانەوە.

گیان ئەگەر پەی تۆ نەبۆ با هەر نەبۆ نازارەکێم
سەر نەبۆ سەرگەردەکەت با سەر نەبۆ نازارەکێم
بێ چەمی خاسا نەکوو چەم نەگنۆ باڵاو تۆ گوڵم
دەس نەیاوۆ زڵفەکات یەکسەر نەبۆ نازارەکێم

ئی بەرهەمە سەروو ئەرکی ماڵی «سنۆقوو فەرهەنگ و ئەدەبوو دەگاو زاوەری»  ئێنتشاراتوو زایەڵەی  چاپ و پەخش کەردەن.

٭٭٭٭

نامێو بەرهەمی: دیوانوو سەردار سادێقی پایگەلانی(وەیلان)
بابەت: شێعرێ 
شاعێر: سەردار سادێقی پایگەلانی
چاپوو ئەوەڵی: وەهاروو 1401
چاپ وپەخش: زایەڵە

ئی بەرهەمە دیوانوو شێعراو شاعێری وەشنامی پایگەلانی؛ بەڕێز سەردار سادێقیەن و پۆلیێ شێعرێ ناسکێ و هەستاویێش گێرتێنێ وێ.

 بەرهەمەکە بە دەسوو خاتوو شەیدا باسامی حرووف‌چینی کریان و ئێنتشاراتوو زایەڵەی  چاپ و پەخش کەردەن.

بە سانای و وانایۆ کتێبێوە، متاومێ پەی پارێزنای و گەشەکەردەی فەرهەنگەکەیمان هەنگامەی گەورێ هوربگێرمێ.