ئیلیزابێس گەورییە: ئاکەپە دەیەوێت کۆمەڵکوژیى نوێ ئەنجام بدات

ئیلیزابێس گەورییە رایگەیاند، ئاکەپە بەردەوامیى گروپی ئیتحاد و تەرەقییە. راشیگەیاند "ئاکەپە دەیەوێت کۆمەڵکوژیى نوێ ئەنجام بدات و باکووری سوریا داگیر بکات".

ئیلیزابێس گەورییە جێگری هاوسەرۆکى ئەنجوومەنى بەڕێوەبەری خۆبەڕێوەبەریى دیموکراتیکی باکوور و رۆژهەڵاتى سوریا بە ئاژانسى هەواڵی فورات (ANF)ی راگەیاند، لەسەرەتاى شەڕ و قەیرانەکانەوە، کە ماوەی ٨ ساڵە بەردەوامە روویان لە گەلانى سوریا کردووە و لە ناو گەلانی سوریادا دەستیان بەکارکردووە.

 

راشیگەیاند "ئێمە خۆبەڕێوەبەریى دیموکراتیکمان دامەزراند. لە خۆبەڕێوەبەرییەکەدا مافە ئایینى، ئیتنی و خۆبەڕێوەبەریى هەموو گەل و کۆمەڵگەمان چەسپاند. کاتێک لە سەرەتاى ساڵی ٢٠١٤دا خۆبەڕێوەبەریى دیموکراتیک دامەزرا، ئێمە یەکسانی، برایەتیى گەلان و دادپەروەریی کۆمەڵگەمان کردە بنەمای کارەکانمان و خۆبەڕێوەبەریی دیموکراتیک".

لە پێناو سوریایەکى نوێ و دیموکراتیک دا

ئیلیزابێس ئەیسا گەورییە باسی ئەوەیکرد، لە سایەى شەڕڤانان دا، کە باکووری سوریا بە باجی قورس و تێکۆشانێکى گەورە لە بەرامبەر هێرش و فیکری تاریکدا دەپارێزن، ئێستا لەسەر پێین. وتیشی "لە سایەى ئەو تێکۆشانە گەورەیەدا ئێمە توانیمان خۆبەڕێوەبەریى دیموکراتیکی باکوور و رۆژهەڵاتى سوریا دابمەزرێنین. ئەو خۆبەڕێوەبەرییە نەک بۆ پارچەکردنى سوریا، بەڵکو بۆ دامەزراندنی سوریایەکى نوێ و دیموکراتیک دامەزراوە. بۆ ئەوە دامەزراوە، گەلانى باکووری سوریا خاوەنی ئیرادە بن و لە دەستووری بنەڕەتیی نوێی سوریادا ئەو ئیرادەیە قبوڵ بکرێت و نوێنەرایەتیى قبوڵ بکرێت".

"دەیەوێت سەیفۆیەکى نوێ ئەنجام بدات"

ئیلیزابێس گەورییە رایگەیاند، پرۆژە دیموکراتیکەکەیان بووەتە هۆی بێزاریى دەوڵەتى تورکیا، چونکە ئەو دەوڵەتە بیر و هۆش و عەقڵییەتى دیموکراتیکى نییە و لە پرۆژەى دیموکراتیک بێزارە.

ئەوەشى وت "ئاکەپە بەردەوامیى ئیتحاد و تەرەقییە. هەر چۆن ئیتحاد و تەرەقی هەستان سوریانییەکان و ئەرمەنییەکانیان کۆمەڵکوژکرد، بە هەمان شێوە ئاکەش دەیەوێت سەیفۆیەکى (جینۆسایدى سوریانییەکان: سەیفۆ - Seyfo) وەک ساڵی ١٩١٥ ئەنجام بدات. لە عەفرین، باب و جەرابلوس کۆمەڵکوژیى ئەنجام دا و گەلی ناچارکرد ماڵ و حاڵ و زێدی خۆیان بەجێبهێڵن. دەیانەوێت دیمۆگرافیاى ئەو هەرێمانە بگۆڕن. ئەردۆغان دەیەوێت لە رێگەى شەڕێکى گەورە لە ناوچەکەدا عەرەبەکان، کوردان، سوریانیان، تورکمەنەکان، ئەرمەنییەکان و چەرکەزەکان کۆمەڵکوژ بکات و لە باکووری سوریادا بیانسڕێتەوە و پاکتاویان بکات".

ئەردۆغان هێرش دەکاتە سەر پرۆژەکەمان

گەورییە ئاماژەى بە پرۆژەى خۆبەڕێوەبەریى دیموکراتیک کرد و رایگەیاند، پرۆژەکەیان خاوەنی ئەو هێزەیە کە دەتوانێت کۆتایى بە تیرۆر لە هەرێمەکەدا بهێنێت. راشیگەیاند "هێزەکانمان لە ئێستادا لە دژی داعش لە دوا قەڵاى ئەو گروپەدا شەڕ دەکات. هاوکات لەگەڵ ئەو شەڕەدا ئەردۆغان هێرش دەکاتە سەر پرۆژەکەمان و هێرش دەکاتە سەر هێزەکانمان. هێرشی کردە سەر کۆبانێ، سەرێکانی و گرێ سپی. دەیەوێت عەقڵییەتى یەکپەرەستیى (یەک نەتەوە، یەک زمان، یەک ئایین، یەک دەوڵەت، یەک ئاڵا، یەک پیاو)ی شۆڤێنیانەى خۆی بەسەر خاکەى ئێمەشدا بسەپێنێت. بەو شێوەیە هەناسە بەبەر تیرۆریستانى داعشدا دەکاتەوە و دەبێتە یارمەتیدەریان".

وڵات و گەلەکەمان شایانی چارەسەرییە

ئیلیزابێس گەورییە ئەوەشی وت، بۆ ئەوەى شەڕ و هێرش لە سەرتاسەری سوریا کۆتایى پێ بێت و قەیرانەکان چارەسەر ببن، پێویستە نەتەوە یەکگرتووەکان دەست لە دۆخەکە وەربدات. وتیشی "گەلانى سوریا ئازاری زۆریان چەشتووە. ئێمە دەمانەوێت سوریایەکى دیموکراتیک دابمەزرێنین، چونکە وڵاتەکەمان، خاکەکەمان و گەلانمان شایانی ژیانێکى دیموکراتییانە و ئاشتییانەن. خاکی سوریا لە رەوتی مێژوودا لانکەى شارستانیەت و زانست بووە. پیت و حەرف سەرەتا لەم خاکەدا داهێنرا و مرۆڤ بە پیت و حەرف دەستیکرد بە نووسین".

ئیلیزابێس گەورییە کێیە؟

ئیلیزابێس گەورییە ژیانى هاوبەشی پێکهێناوە و دایکى ٣ منداڵە. پەروەردەکارە و ماوەی ٢٨ ساڵ مامۆستایى کردووە. بۆ پاراستن و داهاتووی زمانى سوریانى کاری گرنگی ئەنجامداوە. وتەبێژی کۆمەڵگەى سوریا بووە.

ئیلیزابێس گەورییە لە ساڵی ٢٠٠٥ەوە بەشدارە لە کارەکانى دیپلۆماسیى گەل دا. لە ساڵی ٢٠١٤دا لە ئاستى پێشەنگایەتیدا بەشداری دامەزراندنی خۆبەڕێوەبەریى دیموکراتیک لە رۆژئاوا بوو.

گەورییە هاوکات بەردەوامە لە کارەکانى بۆ زمانى دایک، واتە زمانی سوریانی.

هەروەها جێگری هاوسەرۆکانی ئەنجوومەنى بەڕێوبەری خۆبەڕێوەبەریى دیمکراتیکى باکوور و رۆژهەڵاتى سوریایەیە.

ر.م