لە باکوور و رۆژهەڵاتى سوریا بۆ پێشگرتن لە بڵاوبوونەوەى پەتای ڤایرۆسی کۆرۆنا دوێنێ بڕیاری قەدەغەى هاتووچۆ لە نێوان شارەکان و لە ناو شارەکاندا دەرکرا.

ئەنجوومەنى تەندروستیی گەل لەبارەى ڤایرۆسی کۆرۆناوە گەلی هۆشیار کردووەتەوە و بۆ پێشگرتن لە بڵاوبوونەوەی ڤایرۆسەکەش پارکەکان، خوێندنگەکان، رێکخراوە مەدەنی و پیشەییەکان و کافتریاکان داخراون.

هێزەکانى پاراستنى کۆمەڵگەش بۆ پێشگرتن لە بڵاوبوونەوەى پەتاکە دەستیان بە گەڕ و دەورییە کردووە و کار بۆ جێبەجێکردنی بڕیارەکان دەکەن.

شەقامەکان، کۆڵانەکان و بیناکان پاک دەکرێنەوە

هەموو رۆژێک شەقامەکان بە رێکوپێکى دەشۆردرێن. خەباتکارانی دامەزراوە تەندروستییەکانیش دەرمان رێژکردنی شەقامەکان بۆ پاککردنەوە ئەنجام دەدەن و لەو چوارچێوەیەدا شەقامەکان و کۆڵانەکان و بیناکان لە دژی ڤایرۆسەکە تەعقیم دەکرێن و پاک دەکرێنەوە.

بۆ ئەوەی گەل بەهۆی قەدەغەی هاتوچۆەوە زیانیان پێنەگات، کاری خزمەتگوزاریی گشتیی زیادی کردووە.

هەروەها لە باکوور و رۆژهەڵاتی سوریا ٩ ناوەندی تەندروستیی خێرا ئامادە کراون و هێڵی تەلەفونی فریاگوزاریی ٢٤ کاتژمێری بۆ خزمەتی هاووڵاتییان کراوەتەوە.

ژ.ت