رۆژدا عەفرین فەرماندەى یەپەژە: ئامادەین بۆ هەر هێرشیک کە لە داهاتوودا رووبدات

رۆژدا عەفرین یەکێک لە دامەزرێنەرانى یەپەژە رایگەیاند، شۆڕشی رۆژئاوا شۆڕشی ئەخلاقە، ئەو ئەخلاقە واتە پاراستنی خاک و پاراستنی کۆمەڵگا بە فکرێکی راست و دروست.

رۆژدا عەفرین یەکێک لە دامەزرێنەرانی یەکینەکانی پاراستنی ژنان (یەپەژە)، کە لە ئێستادا فەرماندەی گشتیی یەکینەکانی پاراستنی ژنان (یەپەژە)یە لە هەرێمی جەزیرە لە رۆژئاوای کوردستاندایە، لە چاوپێکەوتنێکی بەرفراوان بۆ ئاژانسی هەواڵی فورات (ANF) دەربارەی هەر دوو کۆنفرانسی یەپەژە و ئامانج و فەلسەفە و ئایدلۆژیای یەپەژە و چۆنییەتیی دامەزراندنی ئەم هێزە و چەندین بابەتی دیکە دوا.

لەبارەی سەرەتای دامەزراندنی یەکینەکانی پاراستنی ژنان (یەپەژە) رۆژدا عەفرین وتی: "یەکەمین کۆنفرانسی یەپەژە لە ساڵی ٢٠١٣ بەسترا، بەستنی ئەو کۆنفرانسە دەستپێکی شۆڕش بوو. یەکەمجار بوو شتێکی لەم شێوەیە لەسەر ئاستی سوریا ئەنجام بدرێت، کۆمەڵگای ئێمە بێ باوەڕ بوو لە توانای ژنان لەلایەنی شەڕکردن و بەکارهێنانی چەک. سەرەتا یەخەکە هەبوون، کە گرووپی بچووک و نهێنی بوون پەروەردە دەکران. لە عەفرین کە یەکەم ئەکادیمیای یەپەژە  دامەزرا و دەتوانین بڵێین سەرەتای دەستپێکی یەپەژە لە عەفرین بوو. لە دوای بەستنی یەکەم کۆنفرانس لیوای یەپەژە دروستبوو، لیواکانی یەپەژە لە کۆبانی و عەفرین و دیرک دروستکران".

'لە مێژووی کورستاندا هەمیشە ژنان رووبەڕووی داگیرکەران شەڕیان کردووە'

دەربارەی هۆکاری بڵاوبوونەوەى ناوی یەپەژە و ناساندنی بە تەواوی جیهان رۆژدا عەفرین وتی: "یەکەم شەهیدی ئێمە شەهید سلاڤا بوو، سەدان هەڤاڵمان لە شەڕی دژی چەتەکانی داعش و چەتەکانی بەناو سوپای ئازادی سوریا، تەسلیم بوونیان قبوڵ نەکرد و خۆیان پارچەپارچە کرد بە رووی دوژمن دا، وەکو شەهید ئارین میرکان لە کۆبانی و لە شەڕی کۆبانێ یەپەژە ناوی دەرکرد و رۆڵێکی مێژووییان گێڕا، لەمێژووی داگیرکاریی کورستان دا هەمیشە ژنان رووبەڕووی داگیرکەران شەڕیان کردووە وەکو لەیلا قاسم. هەڤاڵ بێریڤان ئێزدی یەکەم شەهیدی ئێمەیە لە سەرێکانی لە شەڕی دژ بە چەتەکان تا دوا هەناسە شەڕی کرد تاکو شەهید بوو.

ئەو رۆڵەی یەپەژە دەنگی دایەوە لە جیهانەدا و مێژوویەکی دروستکرد و بووە ئەفسانەیەک لەسەر بنەمای کۆنفرانسی یەکەم ئەم مێژووە دروستبوو. ئەم ئەفسانەیە بە قارەمانی و خوێنی شەهیدان دروستبوو بە قارەمانیی شەهیدان بێریڤان، رۆکسەن، ژیندا و شەهید سلاڤا دروستبوو، کە ئەم شەهیدانە فەرماندەکانى یەکەم لیواکانى یەپەژە بوون."

'بەڵێنمان دابوو، کە گەلەکەمان بگەینینە ئازادی و بەڵێنەکەشمان جێبەجێ کرد'

دەربارەی گەیشتن بە کۆنفرانسی دووەم دوای ٧ ساڵ رۆژدا عەفرین ڕایگەیاند: "بە قوربانی دان و زەحمەتییەکی زۆر گەیشتینە کۆنفرانسی دووەمی یەپەژە. لە کۆنفرانسی یەکم بەڵێنمان دابوو گەلەکەمان بگەینینە ئازادی و بەڵێنەکەشمان جێبەجێ کرد."

'داعش کاتیک بینیان بەدەستی ژن دەکوژرێن دەرونیان تێکچوو و ورەیان رووخا'

دەربارەی ئەو ئەرکەی کەوتە سەر شانی یەکینەکانی پاراستنی ژنان (یەپەژە) دوای هێرشی داعش بۆ سەر شەنگال و رفاندنی هەزاران ژن و فرۆشتنی ئەو ژنانە لە بازاڕەکان دا رۆژدا عەفرین وتی: "دوای ئەوەی داعش هێرشی کردە سەر چەندین ناوچە، کە شەنگالیش کەوتە دەستی داعش و هەزاران ژن کەوتنە دەستی داعش و لەبازاڕەکان دەفرۆشران، ئێمەش بەڵێنمان دا ئەو ژنانە لە دەستی داعش رزگار بکەین، لە شەڕی ئێمە دژی داعش لە رەقا بە سەدان ژن رزگارکران و بەهەمان شێوە لە شەڕی دێرەزوور بەسەدان کچی ئێزدی و عەرەب-مان لە دەستی داعش رزگارکرد و بەڵێنی خۆمان بردەسەر، داعش بیروباوەڕی وابوو ئەگەر بەدەستی ژن بکوژرێن ناچنە بەهەشت و کاتێک بینییان بە دەستی ژن دەکوژرێن دەروونیان تێکچوو و ورەیان رووخا".

'هێزی یەپەژە تەنها بۆ پاراستنی ژنانی رۆژئاوا نییە، بەڵکو بۆ پاراستنی تەواوی ژنانی جیهانە'

دەربارەی ئایدلۆژیا و ئەرکەکانی یەکینەکانی پاراستنی ژنان (یەپەژە) لە ناوچکەدا رۆژدا عەفرین ڕایگەیاند: "هێزی یەپەژە تەنها بۆ پاراستنی ژنانی رۆژئاوا نییە، بەڵکو بۆ پاراستنی تەواوی ژنانی رۆژهەڵاتی ناوەڕاستە. ئێمە بڕوامان بە ژیانێکی ئازادە بۆ ژنان نەک ژیانێکی کوێلە، کە پیاو بەڕێوەی ببات، بەڵکو پێویستە ژنان ئازاد بژێن و بتوانن لە تەواوی جیهان دا پێشەنگایەتی بکەن."

'خۆمان بەرێکخستن دەکەینەوە و خۆمان زیاتر پەروەردە دەکەین تا ببینە پێشەنگ بۆ تەواوی ژنان'

دەربارەی بڕیار و باسەکانی کۆنفرانسی یەپەژە رۆژدا عەفرین ڕایگەیاند: "ئەوەی جێگای باسی ئێمە بوو لە کۆنفرانسەکەدا ئەوە بوو، کە چۆن دیسان خۆمان بەرێکخستن بکەینەوە و خۆمان زیاتر پەروەردە بکەین تا ببینە پێشەنگ بۆ تەواوی ژنانی رۆژهەڵاتی ناوەڕاست و جیهان تا ئەرک و بەرپرسیارێتیی خۆمان جێبەجێ بکەین بەرامبەر ئەو ژنانەی، کە بە قارەمانی شەهید بوون بۆ ئازادی و ئاشتی، دوای ئەنجامدانی کۆنفرانسی دووەم باری ئێمە زیاتر گران و قورس بووە".

'ئێستا لە هەرکات زیاتر دەتوانین وەڵامی هەر هێرشکی دەرەکی و ناوخۆیی بدەینەوە'

راشیگەیاند "ئێمە ئێستا لە هەرکات زیاتر دەتوانین وەڵامی هەر هێرشکی دەرەکی و ناوخۆیی بدەینەوە و لەهەر شوێنێکی جیهان هێرش دژی ژنان دروست بێت، دەتوانین وەکو هێزێکی پارستی ژنان وەڵامی ئەو هێرشانە بدەینەوە.

لە کۆنفرانسی دووەم دایکانی شەهیدان ئامادەبوون و لەبەردەم دایکی شەهیدان دا بەڵینمان دا، کە هەموو ژنان بپارێزین. ئامادە بوونی دایکانی شەهیدان لەو کۆنفڕانسەدا موراڵێک بوو بۆ ئێمە، کە ئەو شەهیدانە لە کۆنفرانسی یەکەم ئامادە بوون، بەلام لە کۆنفڕانسی دووەم دایکی ئەو شەهیدانە ئامادە بوون.

هەوڵدەدەین خۆمان زیاتر بەهێز بکەین لەلایەنی فکری و سیاسی و لەشکری تا ئامادەبین بۆ هەر هێرشیک کە لەداهاتوودا رووبدات تا بتوانین گەلی خۆمان بپارێزین و سۆز و بەڵێنی شەهیدان جێبەجی بکەین."

'شۆڕشی رۆژئاوا شۆڕشی ئەخلاقە'

دەربارەی ئەو شۆڕشەی، کە ئێستا لەلایەن ژنەوە بەڕێوە دەبرێت لە رۆژئاوا رۆژدا عەفرین وتی: "شۆڕشی رۆژئاوا شۆڕشی ئەخلاقە نەک ئەو ئەخلاقەی کە کۆمەڵگا تەنها لە ژن دا ئەخلاق و ناموس دەبینێت، بەڵکو ئەخلاق لای ئێمە واتای پاراستنی خاک و پاراستنی کۆمەڵگا بە فکرێکی راست و دروستە، کە دادپەروەریی تێدا بێت و کەس بندەست نەبێت و ژیانێکی هاوبەش و ئەخلاقی بەڕێوەبردن لەلایەنی ژن و پیاوەوە، چونکە خاک ئازاد نەبێت ناتوانین باسی ئەخلاق بکەین. ئەو شۆڕشە ئێمە بەڕێوەی دەبەین دەتوانین بڵێن شۆڕشێکی ئەخلاقی و ویژدانی-یە، سیستمی سەرمایەداری هەوڵ دەدات ئەخلاقی کۆمەڵگە تێکبدات و بە تێکدانی ئەخالاقی گەنجان و ژنان هەوڵی  لەبیرکردن و سڕینەوەی کولتور و چاندی خۆیان دەدات و ئێمەش خاوەنداری لە چاند و ئەخلاقی کۆمەڵگای خۆمان دەکەین و دەیپارێزین لە تێکدان."

'بانگەوازمان تەنها بۆ ژنانی کورد نییە بەڵکو داوا لە تەواوی ژنانی جیهان دەکەین بۆ ئازادی تێبکۆشن'

دەربارەی پەیامی خۆی بۆ ژنان رۆژدا عەفرین وتی: ''داوا لە هەموو ژنان دەکەین بەتایبەتی ژنانی گەنج، کە لەو لایەنەوە بتوانن ژیانێکی بەئەخلاق و وتادار و ئازاد بژین لە ژێر ئاڵا و رێکخستنی یەکینەکانی پاراستنی ژنان (یەپەژە)، ئێمە تەنها بانگەوازمان بۆ ژنانی کورد نییە، بەڵکو داوا لە تەواوی ژنانی جیهان دەکەین کە تێکۆشن تا ژنانی سەرتاسەری جیهان ئازاد دەکەین. ئەوانەی ئەمڕۆ شەهید دەبن لە یەپەژە تەنها ژنانی کورد نین، بەڵکو ژنانی عەرەب و ئێزدی و سریان و ئاشوری و دەیان کچ و ژنی ئەنتەرناسێوناڵیست-یان تێدایە".

لە کۆتایدا رۆژدا عەفرین وتیشی: "بانگەوازی لە تەواوی ژنانی گەنج دەکەین لە جیهاندا خۆیان بناسن، چونکە ناسینی خۆیان و مێژووی خۆیان وەکو ژن و خاونداری لە کەلەپوری خۆیان و خاوەنداری لە شۆڕش و شەهیدانی مێژوو و شەهیدانی ئەمڕۆ، کە بە قارەمانێتی شەهید بوون دەبێتە هۆی پاراستنى خۆیان و کولتور و خاک و مێژووی راستەقینەی خۆیان. لەسەر ئەوە بنەمایە ئێمە کۆنفرانسی دووەمی یەپەژە لە تەواوی ژنان و دایکانی شەهیدان پیرۆز دەکەین و دەڵێین یەپەژە لەسەر بنەمای ژیانێکی ئازاد و خاکێکی ئازاد و ژیان و گەلێکی ئازاد و بە حورمەت بژین و خۆمان بەهیز بکەین و خۆمان مەزن بکەین."

ژ.ت