کۆمەڵێک کەسایەتی و ئەکادیمی باشوور لە دژی شەڕی کورد بە کورد بانگەوازی ئاشتی دەکەن

کۆمەڵێک کەسایەتیی ئەکادیمی و ڕۆشنبیری باشووری کوردستان لە دژی هەوڵی دروستکردنی شەڕی کورد بە کورد بانگەوازی ئاشتی دەکەن.

ژمارەیەک کەسایەتی و ئەکادیمیی دیار و ڕۆشنبیری باشووری کوردستان لە بەنگەوازێکدا دوای  ئاشتی دەکەن و دژی هەر هەوڵێک دەوستنەوە بۆ دروستکردنی شەڕی کورد بە کورد. بۆ ئەو مەبەستە بەیانامەیەکیان بڵاوکردووەتەوە و تیایدا مەترسییەکانی شەڕی کورد بە کورد دەخەنەڕوو و  لە بەرامبەریشدا داوای ئاشتی و یەکڕیزیی گەلی کورد دەکەن لەبەرامبەر داگیرکاری.

هەرەوەها دەڵێن: نەفرەت لەشەڕ، كوردستان لە رێگای ئاشتی ئاوەدان دەبێتەوەو گەشە دەكات، نەك شەڕ، داوا لە خەڵكی كوردستان دەكەین دەنگی خۆیان بخەنە پاڵ دەنگی ئاشتی و نەفرەت لەشەڕ بكەن."

دەقی بەنگەوازەکە

بانگەوازێك لەپێناو ئاشتی

با رێگا نەدەین كوردستان ببێتە گۆڕەپانی شەڕ

خەریكە دیسان زەنگی شەڕی ناوەخۆ لێدەدرێتەوە، دیسان كار بۆ ئەوە دەكرێت، كوردستان خەڵتانی خوێن بكرێت، ئەركی هەموو مرۆڤێك، هەموو تاكێكی ئەو وڵاتەیە چیی پێدەكرێت بیكات، بۆ ئەوەی رێگا لە فروانبوونی ئەو شەڕە خویناویە بگیرێت، كە لە بەر دەرگامانە و هەڕەشە لە بوونمان دەكات.

 شەڕ بەهیچ شێوەیەك لەبەرژەوەندیی كورد نییە، لە بەرژەوەندی هەرێمی كوردستان نییە. سوودمەندی یەكەم لە هەر شەڕێك دوژمنانی كوردە، ناكرێت دڵی دوژمنان خۆش بكەین و دایكانی كوردستان هەمدیس رەشپۆش بكەینەوە، دەبێت بە هەموو لایەك دەستی ئاشتی بەرز بكەینەوە، رێگا لە بازرگانانی شەڕ بگرین، كە دەهۆڵی شەڕی كوردی – كوردی لێدەدەنەوە، دەبێت هەموو خەڵكی كوردستان لەوە دڵنیا بێت، ئەگەر ئەمجارە شەڕێكی ناوخۆی بەرفراوان رووبدات، وەكو ساڵانی نەوەدەكانی سەدەی رابردوو، واتە وەكو جەولەكانی تری شەڕی ناوخۆ نابێت، ئێستا هاوسەنگی هێزی جیهانی گۆڕاوە و هاوكێشەكان پێچەوانەوەی بەرژەوەندیەكانی كورد بۆتەوە، هەر شەڕێكی ناوخۆ تەنیا یەك لایەن ناسووتێنێت، بەڵكو بەر لەهەموو شتێك دوا گولـلە لە قەوارەی هەرێمی كوردستان دەدات.

ئەو پلانە هەرێمیەی داڕێژراوە زۆر لەوە ترسناكترو گەورەترە، كە ئێمە بیری لێدەكەینەوە، هەر شەڕیكی ناوەخۆ لەو كاتەدا تەڕو وشك بەیەكەوە دەسووتێنێت، خەون و ئاواتەكانی ئەو میللەتە بە یەكجاری لەگۆڕ دەنێت، كوردستان دەكاتە گۆڕەپانی شەڕێك، كە دەستپێكەكەی دیار دەبێت، بەڵام هەرگیز پێشبینی كۆتاییەكەی ناكرێت.

دەیانەوێت هەرێمی كوردستان بە سوریا بكەن، بۆیە دەبێت بە هەموو شێوەیەك دژی هەر هەوڵێك بووەستین، كە بۆ شەڕ دەدرێت، شەڕی ئەو جارە شەڕی لەناوبردنی هەموو دەستكەوتەكانی كوردە، با چیتر دڵی دوژمنانی كورد خۆش نەكەین، داوا لە پارتی دیموكراتی كوردستان و پارتی كرێكارانی كوردستان دەكەین، هەرچی زووە لەسەر مێزی گفتوگۆ دابنیشن و كێشەكانیان لەریگای گفتوگۆوە چارەسەر بكەن، دەبێ لەوە تێبگەن لە هەموو كاتێك زیاتر داگیركەرانی كوردستان پلان بۆ شەڕی كوردی كوردی دادەڕێژن و ئاگرەكەی جۆش دەدەن. با بەهەموو لایەك ئەو ئاگرە لە كوردستان دوور بخەینەوە.

نەفرەت لەشەڕ، كوردستان لەرێگای ئاشتی ئاوەدان دەبێتەوەو گەشە دەكات، نەك شەڕ، داوا لە خەڵكی كوردستان دەكەین دەنگی خۆیان بخەنە پاڵ دەنگی ئاشتی و نەفرەت لەشەڕ بكەن.

1-           پ. د. كامەران مەنتك، پسپۆڕ لە فەلسەفەی پەیوەندیە نێودەوڵەتیەكان، هەولێر

2-           د. عارف گۆران، راوێژكاری هەناو، لەندەن

3-           د. زیرەك عومەر مەموندی، پسپۆڕی هەناوو دكتۆری خێزان، سوید

4-           د. نگین جەعفەر، پسپۆڕی نەخۆشیەكانی ژن و منداڵان، دانیمارك

5-           د. تەلار علی ئەمین، پسپۆڕ لەمێژووی نوێ و هاوچەرخ، سلێمانی

6-           د. كەژاڵ حەوێز، پسپۆڕ لەبەشی هەناوو فریاكەوتن، سوید

7-           د. كوێستان شەهابی، پسۆڕی گشتی، سوید

8-           پ.ی. د. كوثر احمد، پسپۆڕ لە یاسای تاوانەكان، هەولێر

9-           د. بەدرخان حەسەن، پسپۆڕ لە نەشتەرگەری بۆڕییە خوێنەكان، سوید

10-         د. كەریم عارف، پسپۆڕ لە بەشی دڵ و سییەكان

11-         د. كاروان سنجاوی، پسپۆڕ لە لووت و گوێ، سوید

12-         د. ئازاد ئەمین سەیدۆ، پسپۆڕی دڵ، سوید

13-         د. ئازاد عوسمان، پسپۆڕ لە زانستە سیاسیەكان، ئەڵمانیا

14-         د. ژیان مەجید، دكتۆری خێزان، سوید

15-         د. لەمیعە توفیق، پسپۆڕی لووت و قوڕگ  و گوێ، سوید

16-         نەوزاد مەعروف، ئەندازیارو چالاكوانی مەدەنی، دانیمارك

17-         سیروان بازرگان، ئەندازیارو وەرگێڕ، سوید

18-         د. بەختیار مودەڕس، پسپۆڕی نوژداری، كۆبانێ، رۆژئاوای كوردستان

ژ.ت