میت و موساد و پەدەکە پیلانەشان دژ بە شەنگالی متێنەرە

لێکۆڵین ئۆرگ کە ناوەندێوی پەیجۆری ستراتیژین ئاشکراش کەردەن: هەواڵگریەکێ تورکیای و ئیسرائیلی و دەسەڵاتداریی'پەدەکە'ی دژ بە هەرێمو شەنگالی پێوەرە پیلانەشان متێنەرە و بڕیارشاندان وەڵێ ڕەمەزانی هێرش بکەرانێ سەرو هەرێمەکەی.

پیلانگێڵنای و گەلەکۆمە دژ بە هەرێمو شەنگالی و دەستکەوتەکێ ئێزیدییەکان بەردەوامیشان هەن و تا ئیسە سەرجەمشان بە مدرمان و کۆشای پەیاپەی شەنگالییەکان شکست دریێنێ. بەڵام سەرەڕاو ئانەیە پیلانگێڵنەرێ و گەلەکۆمەکارەکێ دەستبەرداری دژایەتی شەنگالی نمەبانێ و پیلانێ تازێ دژ بە هەرێمەکەی و گەلەکەیش مجانێرە.
جە ئی بارەوە، لێکۆڵین ئۆرگ کە ناوەندێوی پەیجۆری ستراتیژین جە ڕاپۆرتێوەنە ئاشکراش کەردەن: هەواڵگریەکێ تورکیای 'میت' و ئیسرائیلی 'مۆساد' و دەسەڵاتداری 'پەدەکە'ی دژ بە هەرێمو شەنگالی پێوەرە پیلانەشان متێنەرە و بڕیارشاندان وەڵێ ڕەمەزانی هێرشە بکەرانێ سەرو هەرێمەکەی، بە ئا ئامانجە تا دەستکەوتەکێ وێسەری دیمۆکراتیی گەلو ئێزیدی دلێنەبەرانێ.
بەپاو ڕاپۆرتەکەو 'لێکۆڵین ئۆرگ'ی، ئی مانگێ میت و مۆساد و پەدەکە کۆبیێنێوە و بڕیارشاندان تا جە 14و هەمان مانگێنە هێرشەکەشان پەی سەرو شەنگالی کەردەیی بکریۆنە.

لێکۆڵین ئۆرگ وردەکاری پیلان و هێرشەکەیەش بە ئی جۆرە وستەن ڕووە:

میت، مۆساد و پەدەکە جە ئاستی باڵانە، ورپرسیارەکێشان جە هەولێر و هامنەهەوارو سەلاحەدینی کۆبیێنێوە

جە کۆبیەکەنە بڕیار دریان کاری و ژڵێوەی هامبەش ئەنجام بدریۆن

شۆنیشەرە هێرشی هامبەش دژ بە شەنگالی ئەنجام بدریۆن

لێکۆڵین ئۆرگ پەی دەستوستەی ئی زانیارێ کە وەڵاوێش کەردەێنێوە، پەشتیش بە چەندین سەرچەمێ باوەڕپنەکریێ بەستەن و ئا بڕیارێ جە کۆبیەکەو هەولێر و هامنەهەوارو سەلاحەدینی دزەشان کەردەن.
بەپاو زانیاریەکان، کۆمبیەکەو هەولێری جە گەڕەکو شۆڕشی و یانە کەسایەتیێوی تورکومانییەنە ئەنجام دریان کە نامێش ئاشکرا نەکریان.

جە کۆبیەکەنە باس ئانەیە کریان، تا حەشدی شەعبی ڕازی بەهامکاری میتی و مۆسادی و پەدەکەی بکریۆنە و دژایەتی پیلانەکێشان نەکەورۆن.

هامکات هەوڵ بدریۆنە مایەنە حەشەدی شەعبی و 'پەکەکە'ی جە هەرێمەکەنە تێک بدریۆن.

مۆساد، میت و پەدەکە ڕێکێکەوتێنێ تا وەڵێ ڕەمەزانی ‌هێرشەکەشان پەی سەرو شەنگالی دەستپنەبکەرۆنە و دما نەوزیۆنە.

جە رێککەوتو 14/03/2021ی جە کۆبیەکەو 'هامنەهەوارو سەلاحەدین'یەنە کە سەعات 17:00 وێرەگای ئەنجام دریان، وەرپرسیارێ میتی و مۆسادی و مەسرور بارزانی سەرۆکو حکومەتو هەرێمو کوردستانی و ڕێبەر ئەحمەد وەزیرو دلێوێیی هەرێمی ئامادێ بیێنێ.

لێکۆڵین ئۆرگ کە ناوەندێوی پەیجۆری ستراتیژین هەرپاسە ئاشکراش کەردەن: جە کۆبیەکانە باس جە دژایەتیی پەکەکەی و ستاتۆ و ئایندەو پەدەکەی جە ناوچەکەنە کریان.