کەمێک پێش ئێستا، لە ئەنقەرەی پایتەختی تورکیا، بەرپرسانی باڵیۆزخانەی ئەمەریکا ڕایانگەیاند:"هۆکاری هەڕەشەی ئاساییشی لە سەر باڵیۆزخانە و کارمەندەکانیان، بۆ کاتێکی نادیار بڕیاری داخستنی باڵیۆزخانەکەیان داوە".

هەروەها بەرپرسانی باڵیۆزخانەکە ئاشکریان کردوە:"بێجگە لە حاڵەتی زۆر بەپەلە و زۆر تایبەت نەبێت، کارمەندانی باڵیۆزخانەکە تەواوی کارەکانیان ڕادەگرن و هەر کاتێک زانیان گونجاوە، ئەو کات وساتی کردنەوەی باڵیۆزخانەکەیان بۆ ڕایگشتی ئاشکرا دەکەن".

باڵیۆزخانەی ئەمەریکا، داوای لە هاوڵاتیانی ئەمەریکی نیشتەجێی تورکیاش کردووە، خۆیان لە شوێنی شلوغ بپارێزن و بە وریاییەوە هاتوچۆ بکەن. 

جێگای ئاماژەیە، بە هۆی شەڕی داعش، وەستانەوە لە دژی گروپە تەرۆریستەکانی وەک بەرەی نوسرە و ئەلقاعدە لە سوریا، بوونی هێزی ئەمەریکا لە ڕۆژئاوای کوردستان و هەماهەنگیان لەگەل قەسەدە، شەڕی عەفرین، بوونی فەتحوڵا گولەن لە ئەمەریکا، پێشێلکردنی گەمارۆکانی سەر ئێران لەلایەن تورکیاوە و سپیکردنەوەی پارەی ڕەشی ئێران لەلایەن بەرپرسانی تورکیاوە، ناکۆکی گەورە لە نێوان ئەمەریکا تورکیا هەن و ئەو ناکۆکیانەش لە کۆتایی ساڵی ڕابردوو و دەستپێکی ئەم ساڵەوە تا دەچێت قوڵتر دەبنەوە و وێڕای چەندین کۆبوونەوەی نێوانیان بەڵام بێچارەسەر ماونەتەوە.

هـ.هـ