گۆرەپانی تەحریر لە بەغدای پایتەختی عێراق، ئەمڕۆ گەورەترین خۆپیشاندانی دوای ڕووخانی رژێمی سەدامی بەخۆوە بینی، سەرچاوەکانی ئاسایشیش رایانگەیاندووە کە هێزەکانی پۆلیس و دژە تیرۆریان لەناو شار کشاندووەتەوە، لەبەر ئەوەی هەست بە هەڕەشەی ئاسیایشی نەکراوە.

وێڕای ئەوەی لە بەغدا ڕوودەدات، هاوکات لە پارێزگاکانی دیکەی ناوەڕاست و باشور عێراقیش خۆپیشاندان بەردەوامە.

لە سەرەتای مانگی ڕابردووەوە، لە زۆربەی شارەکانی عێراق خۆپیشاندان بەڕێوەچوو، هاوکات بەهۆی خۆپیشاندانەکان سەدان کەس کوژران و هەزارانیش بریندار بوون.

هەروەها خۆپیشاندەران لە بەشێک لە شارەکانی باشووری عێراق، دەستیان گرت بەسەر بارەگا حزبییەکان و بەشێک لە بارەگای حزبە سیاسییەکانیان سووتاند و چەند ئەندامێکیشیان کوشتن، هەروەها بۆ ماوەیەک دەستیان گرت بەسەر بەندەری بەسرە.

خۆپیشاندانەکە سەرەتا بەهۆی نەبوونی خزمەتگوزارییەوە دەستیپێکرد و داوا لە حکومەتی ئێستای عێراق کرا کە دەست لەکار بکێشێتەوە و حکومەتی کاربەڕێکەر دروست بکرێت و هەڵبژاردنی پێشوەختە ئەنجام بدرێت.

دواتر لە بەشێکی زۆری خۆپیشاندانەکان داوای نەهێشتنی دەستێوەردان و هەژموونی ئێران کراوە لەناو حکومەتی عێراق.

شەوی پێنجشەممەی ڕابردوو، لە گۆڕەپانی تەحیری، کردەوەی توندوتیژی زۆر ئەنجام درا و خۆپیشاندەران ویستیان دیواری پردی کۆماری بشکێنن و بپەڕنەوە بۆ ناوچەی سەوز.

ک-ش