ئەمڕۆ بەهەزارن هاوڵاتی عێراقی لە گۆڕەپانی تەحریر لە بەغدای پایتەخت و چەندین شاری دیکەی باشووری عێراق ڕژانە سەر شەقامەکان و لەدژی ئەمریکا و ئێران دروشمیان بەرز کردەوە.

رۆژانە لەسەر تۆڕە کۆمەلایەتییەکان بۆ چالاکی لەدژی دەسەڵاتدارانی عێراق کە لە ١ی تشرینی یەکەم دەستیپێکردبوو و ١٠ی کانونی دووەم بانگەوازیان بۆ چالاکی کرد.

شەوی ڕابردوو، لە شاری کەربەلا  لە باشووری عێراق، لەنێوان چالاکوان و هێزەکانی ئاسایش شەڕ پێکدادان درووستبوو، لە بەسرەش چەندین چالاکوان دەستگیر کران.

بۆ گۆڕینی دەسەڵات لە عێراق، نزیکەی سێ مانگە خۆپیشاندانی فراوان بەڕێوەدەچێت ، لە هەفتەکانی دواییدا پەیوەندی نێوان ئەمریکا و ئێران کاریگەریی لە سەر خۆپیشاندانەکان دژی دەسەڵات کردبوو.

لە هەردوو شەپۆلی خۆپیشاندانەکاندا نزیکەی ٥٠٠ کەس لە خۆپیشاندەران و هێزە ئەمنیەکان کوژراون و نزیکەی ٢٥ هەزار کەسیش بریندار بوون، چەندین کەسیش بەهۆی هێرشی هێزە ئەمنیەکانەوە کەم ئەندام بوون، لە لایەکی دیکەشەوە لەدژی چالاکوانان کەمپینی تیرۆر و ڕفاندن دەستیپێکردبوو، دەیان چالاکوانیان لەبەردەم ماڵەکانیان و لە کۆڵانەکان لەلایەن کەسانی نەناسراوەوە ڕفێندران و کوژران.

چالاکوانان، ڕێبەرانی سیاسی بە گەندەلی و ناکارایی تاوانبار دەکەن و بەمهۆیەشەوە، داوای گۆڕێنی ئەو حکومەتە دەکەن، هاوکات عادل عەبدولمەهدی و حکومەتەکەی لە بەرامبەر بەردەوامی خۆپیشاندانەکان دەستلەکار کێشانەوەیان پێشکەش کردبوو، بەڵام دوای تێپەڕبوونی ٤٢ ڕۆژ بەسەر دەستلەکارکێشانەوەی عەبدولمەهدی، تا ئێستا هیچ کەسێک بۆ پۆستی سەرۆک وەزیرانی نوێی عێراق دیاری نەکراوە.