میدیاکانی عێراق بڵاویانکردەوە، لە ئەنجامی گەڕان و پشکنینی هێزە ئەمنیەکانی عێراق لە ناوچەی تارمیەی بەغدا، ١٠ ئەندامی هێزەکانی سوپای عێراق کوژراون، کە لەنێویاندا پلەدار و ئەفسەر هەیە، تەواوی قوربانیەکانیش بەهۆی تەقینەوەی بۆمبی چیندراوەوە کەوتوونەتەوە.
درەنگانێکی شەوی ڕابردوو شانه‌ى جەنگی عێراق بڵاویکردەوە، له‌ئاكامى ته‌قینه‌وه‌ى بۆمبێكى چێنراو له‌شارۆچكه‌ى تاڕمییه‌ى باكوورى به‌غدا، چوار سەرباز کوژراون، هەروەها لە تەقینەوەیەکی دیکەشدا ئەفسەرێک و عەریفێک کوژراون.
بەپێی دوایین ئاماری دەزگا ئەمنیەکانیش، کۆی قوربانیەکان گەیشتوونەتە ١٠ کوژراو.
شانەکە ئاماژەی بەوەشداوە، چەتەکان بۆمبێكی چێندراوی دیکەیان له شارۆچكه‌ی تاڕمییه به ئۆتۆمبێلێكی جۆری هه‌مه‌ر سه‌ر به‌فه‌وجی ٣ی لیوای ٥٩ی فیرقه‌ی شه‌شه‌می سوپای عێراقی ته‌قاندوەته‌وه و چوار سەربازی کوژراون، هەروەها ئەندامێکی سەحوە و دوو سەربازی دیکەش بریندار بوون.
ک-ش
