ئێران سەربازی بۆ سەر سنوری ئەرمینیا و ئازەربایجان ڕەوانە کرد
ڕژێمی ئێران ڕایگەیاند، سەربازی زیاتریان بۆ سەر سنوری ئەرمینیا و ئازەربایجان ڕەوانە کردووە.
بەپێی ڕاگەیەنراوێکی پارێزەرانی شۆڕشی ڕژێمی ئێران بەهۆی ئەوەی چەندین بۆمب لە قەرەباخەوە هەڵدراون و بەر سنورەکانی ئێران کەوتوون، سەربازیان بۆ ناوچە سنوریەکان ڕەوانە کردووە.
محەمەد پاکپوور فەرماندەی هێزە زەمینیەکانی پارێزەرانی شۆڕشی ڕژێمی ئێران وتی، بەهۆی شەڕی نێوان ئەرمینیا و ئازەربایجان یەکینەکانی خۆیان بۆ ناوچە سنوریەکان ڕەوانە کردووە.
بەپێی میدیاکانی ئێران هەفتەی ڕابردوو، ژمارەیەک موشەک بەر گوندی هودا ئافەرینی نزیکی قەرەباخ کەوتوون.
پەیوەندیەکانی ئێران هەم لەگەڵ ئازەربایجان و هەم لەگەڵ ئەرمینیا باشە. حکومەتی تاران زۆر جار داوای لە هەردوو وڵات کردووە کە ئاگربەست ڕابگەیەنن.
ف.ق
