لە ئیستەنبول ژنێکی تر کوژرا
لە ناوچەى بایرام پاشای ئیستەنبول ژنێک بە ناوی فەردانە کورت، کە لەگەڵ منداڵە ٣ ساڵانەکەیدا لە ژوورێکی ئۆتێلێکدا بوون، لەلایەن کەسێکی نەناسراوە کوژرا.
فەردانە کورت لە گەڕەکی موراد پاشای ناوچەى بایرام پاشای ئیستەنبول لە ژوورێکی ئۆتێلکێدا دەمایەوە و تەرمەکەى لە ژوورەکەیدا لە ئۆتێلەکەدا دۆزرایەوە. کورت بەرچاوی منداڵە ٣ ساڵەکەیەوە کوژراوە. دوای ئەوەى منداڵەکەى دەستی بە گریان کردووە، کارمەندانی ئۆتێلەکە بە رووداوەکەیان زانیوە.
تیمی تەندروستی چوونەتە شوێنی رووداوەکەوە و تەرمی ژنێکییان بینیوە، کە لەلایەن کەس یان کەسانێکەوە کوژراوە.
بەپێی راگەیاندراوێکی ئەنجوومەنی ژنانی هەدەپە هەموو رۆژێک لە تورکیا بەلانیکەمەوە ٥ ژن دەکوژرێت
هەروەها بەپێی ئامارەکانی پلاتفۆرمی "ئێمە رێگری لە کوشتنی ژنان دەکەین" لە ساڵی ٢٠٢٠دا لە تورکیا ٣٠٠ ژن کوژراون و ١٧١ ژنیش بە شێوەیەکی گوماناوی گیانیان لە دەستداوە.
هاوکات بەپێی ئاماری ئاژانسی هەواڵی ژن نیوزیش لە ساڵی ٢٠٢٠دا لە تورکیا ٣٣٢ ژن و ٣٣ منداڵ کوژراون. ١١٠ ژنیش بە شێوەی گوماناوی گیانیان لە دەستداوە و دەستدرێژیش کراوەتە سەر ٤٩ منداڵ.
ژ.ت
