ئارام قادر ئەندامی ئەنجومەنی ناوەندی یەکێتی نیشتیمانی کوردستان دەربارەی هەڕەشەکانی تورکیا بۆ سەر خاکی ڕۆژئاوای کوردستان لە لێدوانێکدا بە ئاژانسی هەواڵی فورات (ANF) ڕایگەیاند: "ئێمە وەک ئەنجومەنی ناوەند لەگەڵ هەڤاڵانمان هاتین بۆ سەردانی ناوەندی کانتۆنەکانی ڕۆژئاوا هەم بۆ پشتیوانی و هەم بۆ دوپات کردنەوەی پشتیوانی ڕاگەیەندراوەکەی مەکتەبی سیاسی کە بەشێکی پشتیوانی بو لە گەلی ڕۆژئاوا و ئارامکردنەوەی ئەو ڕەوشەی نێوان تورکیا و ڕۆژئاوا".

هەروەها وتیشی:"ئێمە دووپاتی دەکەینەوە کە پشتیوانی گەلی خۆمانین لە ڕۆژئاوا و ئەم ڕەوشە بە شەڕ چارەسەر نابێت، ڕۆژئاوا و شەڕڤانان ڕۆڵێکی گرینگیان هەبووە لە تێکشکاندنی داعش لە ناوچەکە بۆیە ناکرێت بەو شێوەیە پاداشت بکرێنەوە. پێویستە ئەوروپا و نەتەوە یەکگرتۆکان هەمووی بێنە سەر خەت چونکە ڕۆژئاوا خوێنی داوە لە پێناو ڕزگاری و ئازادی و ئاسایشی گشتی ناوچەکە بۆ هەموو جیهان، بۆیە ناکرێت تورکیا بەو شێوەیە تەماشای ڕۆژئاوا بکات پێویستە پەیوەندیەکی نەرم و نیان لەنێوانیان هەبێت. هیوادارین هەموو لایەک بێنە سەر خەت بۆ ئەوەی ئەو دۆخە هێور بکرێتەوە و بتوانین ڕۆڵمان هەبێت لە ئاشتەوایی ناوچەکە".

ئارام قادر لە درێژەی قسەکانیدا ئەوەشی خستە ڕوو کە گەلی باشوور وەک هەمیشە پشتیوانی گەلی ڕۆژئاوا بووە و یەکێتی نیشتیمانی کوردستانیش هەوڵی خۆی دەدات بۆ ئەوەی بتوانین بە ئاشتیانە کێشەکان چارەسەر بن. دەبێت هەموو جیهان بزانێت کورد لەهەر چوار پارچەی کوردستان خەبات و تێکۆشانی خۆی بەردەوام دەکات بۆ بەدەست هێنانی مافە ڕەواکانی خۆی، هیچ هەڕەشەیەکیش ناتوانێ شەڕڤانان ببەزێنێ و وەک دەبینین شەڕڤانان گەورەترین هێزی تیرۆریستیان لە ناوچەکە تێکشکاند.

ف.ق