سەبری ئۆک، ئەندامی دەستەی بەڕێوەبەری کەجەکە، ڕایگەیاند نابێ ڕێگە بدرێ تەنانەت یەک هەنگاویش لە خاکی عەفرین و باکووری سووریا، لەلایەن تورکیاوە دەستی بەسەردا بگیرێت. بێجگە لە چوونەدەرەوەی سوپای تورکیا لەعەفرین، گەل هێچ شتێکی دیکە قەبووڵ ناکات.
سەبری ئۆک، لە وتووێژێکدا لە مەڕ ٢٥ڕۆژ بەرخۆدانی مێژوویی عەفرین لەدژی داگیرکاری دەوڵەتی تورکیا، بۆ ئاژانسی فرات قسەی کرد.
ئۆک بە ئاماژە بە خەون و خەیاڵی دەوڵەتی تورکیای داگیرکەر بۆ داگیرکردنی عەفرین لە چەند کاتژمێر یا چەند ڕۆژدا، بەرخۆدانی عەفرینی بەواتای شکستی هەموو پیلان و پڕۆژەکانی دەوڵەتی تورکیا لێکدایەوە و وتی: سەدان چەکداریان کوژراوه و بە دەیان تانک و هێلیکۆپتەریان تێکشکاوە. گەلی عەفرین لە راستیدا بەرەنگارییەکی مێژوویی کردووە و خاک و شەرەفی خۆی دەپارێزێ".
سەبری ئۆک، لە درێژەی قسەکانیدا، باسی خۆڕاگری قارەمانانەی یەپەگە/یەپەژە-ی لە دژی داگیرکەران کرد و ستایشی هاودەنگی و هاوهەڵوێستی گەلانی باکووری سووریای کرد و بە یەکگرتنی مێژوویی ناوی برد. ئۆک، هاوهەڵوێستی گەلانی باکووری سووریا-ی وەک مسۆگەری داهاتووی دموکراتیکی گەلانی سوریا لێکدایەوە و وتی: " داگیرکەری بە چۆک داهاتووە و ئیرادەی پۆڵایینی گەلانی دێموکراسی خواز و بەرخۆدانی مێژوویی عەفرین، سەرکەوتووە"
سەبری ئۆک، ئاکامەکانی ئەو خۆراگرییەی شکۆدار بەناو کرد و ڕایگەیاند؛ تەنیا یەک هەنگاویش لە ژێر پۆستاڵی داگیرکەراندا نامێنتەوە. ئەو ئەندامەی دەستەی بەڕێوەبەری کەجەکە، بانگیشی لە هێزە نێودەوڵەتییە پەیوەندیدارەکانی سووریا کرد کە ئەرکەکانی خۆیان بەپێی ڕێکارە دێموکراتیکەکان، پێک بێنن و وتیشی: ''ڕێگەچارەی دێموکراتیک، ڕەتکردنەوەی داگیرکارییە و پێویستە هێزە داگیرکەرەکان لە خاکی عەفرین، بچنە دەرێ. گەلی عەفرین، هیچ ڕێگە چارەیەکی دیکە بێجگە لە چوونە دەرەوەی داگیرکەران پەسەند ناکات".
سەبری ئۆک ، لە کۆتایی قسەکانیدا، وتی: ''ئەوڕۆ بیست و پێنجەمین ڕۆژی بەرخۆدانی عەفرینە. شکاندنی داگیرکەران نیزیکە و سەرکەوتنی عەفرین بە ڕیگەوەیە. بەردەوامی هێرشەکان، بەرەنگاری بەهێزتر بەدوای خۆیدا دێنێت. ئەوەی گرینگە ئەوەیە کە سەرکەوتن بۆ عەفرین و تەواوی گەلانی بەرخۆدێر و ئازادیخوازە".
