دایكانی ئاشتی پشتگیریی له‌یلا گیوڤه‌ن ده‌كه‌ن

ئه‌نجومه‌نی دایكانی ئاشتی به‌ لێدوانێكی ڕۆژنامه‌وانی پشتگیریی خۆی بۆ هاوسه‌رۆكی كه‌جه‌ده‌ و په‌رله‌مانتاری هه‌ده‌په‌ له‌یلا گیوڤه‌ن پیشان دا كه‌ له‌ دژی گۆشه‌گیریی سه‌ر ڕێبه‌ری گه‌لی كورد عه‌بدوڵا ئۆجالان ده‌ستی به‌ مانگرتن له‌ خواردن كردووه‌.

ئه‌نجومه‌نی دایكانی ئاشتیی شاری ئامه‌د، بۆ پشتگیری كردن له‌ مانگرتن له‌ خواردنی بێ مه‌ودای هاوسه‌رۆكی كۆنگره‌ی كۆمه‌ڵگه‌ی دیموكراتیك (كه‌جه‌ده‌) و په‌رله‌مانتاری جۆله‌مێرگی پارتی دیموكراتی گه‌لان (هه‌ده‌په‌) له‌یلا گیوڤه‌ن، له‌ بینای ئه‌نجومه‌نه‌كه‌ لێدوانێكی ڕۆژنامه‌وانی دا.

ئه‌ندامی ئه‌نجومه‌نی دایكانی ئاشتی هاڤا كران لێدوانی دا و گوتی: «پێویسته‌ به‌په‌له‌ گیوڤه‌ن ئازاد بكرێت. ئه‌و ئیراده‌ی گه‌لی كورده‌. په‌رله‌مانتاری جه‌هه‌په‌ ئه‌نیس به‌ربه‌رئۆغلو سه‌ره‌ڕای ئه‌وه‌ی سزای بۆ بڕابوویه‌وه‌ ئازاد كرا، به‌ڵام له‌یلا گیوڤه‌ن هێشتا به‌ندكراوه‌ و ئازاد ناكرێت. ئایا ئه‌مه‌ فاشیزم نییه‌؟ له‌به‌رئه‌وه‌ی پشتگیریی گه‌لی كورد ده‌كات ئازادی ناكه‌ن.»

«ئێمه‌ پشتگیریی گیوڤه‌ن ده‌كه‌ین»

كران له‌ درێژه‌ی لێدوانه‌كه‌یدا سڵاوی له‌ چالاكیی مانگرتن له‌ خواردنی له‌یلا گیوڤه‌ن كرد و گوتی: «بڕیاره‌كه‌ی گیوڤه‌ن، بڕیارێكی به‌هاداره‌. دوێنێ ئه‌م بڕیاره‌ی دا و خاوه‌نداره‌تی له‌ تێكۆشانی گه‌لی كورد كرد. ژنانی كورد هه‌رگیز له‌ به‌رانبه‌ر فاشیزم سه‌ریان دانه‌نه‌واندووه‌. ئه‌ویش هه‌رگیز سه‌ری خۆی دانانه‌وێنێت و به‌ سه‌ربه‌رزی نوێنه‌رایه‌تیی گه‌له‌كه‌ی ده‌كات. ئێمه‌ پشتگیریی ئه‌و ده‌كه‌ین و هه‌میشه‌ له‌گه‌ڵی ده‌بین. پێویسته‌ ده‌وڵه‌ت به‌په‌له‌ گیوڤه‌ن ئازاد بكات.»

s.m