عوسمان شیبان لە وان لە دوای دەستگیرکردنى، لەلایەن سەربازانی تورکەوە لە کۆپتەر هەڵدرابووە خوارەوە. دوای ئەوەى کەسوکارەکەى دەیبنەوە بۆ ماڵەوە، پۆلیسی تورک سەر لەبەیانیی ئەمڕۆ دەچن بۆ ماڵەکەى و بە زۆر دەیبەن بۆ نەخۆشخانەى سەربازی.
هێزەکانی دەوڵەتى تورک لە ناوچەى شاخێ لە پارێزگای وان لە باکووری کوردستان دەستیان بە ئۆپراسیۆن کردبوو و لە ١١ی ئەیلولی ٢٠٢٠دا عوسمان شیبان و سەروەت تورگوت-یان دەستگیرکردبوو.
دوای ٢ رۆژ لە دەستگیرکردنیان لە راپۆرتی نەخۆشخانەدا ئەوە ئاشکرابوو، کە عوسمان شیبان باوکی ٨ منداڵ و تەمەن ٥٠ ساڵ لەلایەن سەربازانی دەوڵەتی تورکەوە لە کۆپتەر و لە ئاسمانەوە هەڵدراوەتە خوارەوە.
سەرباری ئەوەش ئەمڕۆ پۆلیسی تورک هەڵیکوتایە سەر ماڵی عوسمان شیبان.
بەپێی زانیارییەکان، پۆلیس بە فەرمانی داواکاری گشتیی کۆماری عوسمان شیبان-یان بردووە بۆ نەخۆشخانەى سەربازی. هێشتا ئەوە روون نییە، کە بڕیاری دەستگیرکردن بۆ عوسمان شیبان دەرکراوە یان نا.
شیبان بەهۆی ئەشکەنجەى زۆر سەربازەکانی دەوڵەتی تورک بە سەرۆکایەتی ئاکەپە و ئەردۆغان لەسەر هۆشی خۆی نییە و هیچی بیر ناکەوێتەوە و لەبەر ئەوەش تاوەکو ئێستا وتەى خۆی لەسەر رووداوەکە وەرنەگیراوە.
ژ.ت
****
