به‌یانیی دوێنێ له‌ شاری كه‌ركووك عه‌بدولره‌حمان خه‌لیفه‌ ئه‌ندامی كۆنگره‌ی نه‌ته‌وه‌یی كوردستان (كه‌نه‌كه‌) به‌هۆی جه‌ڵته‌ی دڵ كۆچی دوایی كرد. له‌ په‌یامێكدا كه‌ ئاراسته‌ی خانه‌واده‌ و دۆستانی كۆچكردوو كراوه‌، هاوسه‌رۆكانی كه‌نه‌كه‌ ڕێبوار ڕه‌شید و نیلۆفه‌ر كۆچ سه‌ره‌خۆشیان كرد.

ده‌قی په‌یامه‌كه‌:

«بۆ خانەوادە و دۆستانی كۆچكردوو كاك عەبدولرەحمان خەلیفە

بەڕێزان
بە داخ و پەژارەیەكی زۆرەوە، لە خەمیی كۆچی دوایی ھەڤاڵی بەڕێزمان كاكە عەبدولرەحمان خەلیفە دا بەشدارین. ھەڤاڵ عەبدولرەحمان ئەندامێكی چالاك و تێكۆشەری كۆنگرەی نەتەوەیی كوردستان بوو. مخابن بە كۆچی دوایی خوالێخۆشبوو، ك ن ك و گەلی كوردستان كەسایەتیەكی دڵسۆز و خاوەن باوەڕ بە یەكێتی نەتەوەیی و نیشتیمانی كوردستانی لەدەست دا. بەڵام ناو و ھەوڵ و خەبات و تێكۆشانەكەی ھەمیشە بە زیندوویی و بەرچاو دەمێنێتەوە و دەبێتە پێشەنگێك بۆ نەوەی ئێستاو ئایندە.
خەلیفە بە لەش و جەستە ئێمە و كوردستانی بەجێھێشت، بەڵام خوو و رەوشت و ئاكار و كارەكانی، دەبێتە جێگای شانازی و رێز و پێزانین و لە دڵ و بیری خەڵكدا دەمێنێتەوە.
ھیوادارین بە ھەبوونی كەسوكار و دۆستانی ئازیزی بە شێوەیەك خەم و پەژارەمان  كەم بكەنەوە و زووتر سوكنایی بە دڵماندا بێت و باری شانمان سووكتربێت.
تەندروستی و تەمەندرێژی بۆ ھەموولایەك دەخوازین.»
s.m