لە گرتەیەکی ڤیدیۆییدا کە لە تۆڕە کۆمەڵایەتیەکاندا بڵاوبووەتەوە، دەردەکەوێت، لە شارەکانی ڕۆژهەڵاتی کوردستان قەیرانی کەمی پێداویستی پزیشکی و کەلوپەلی خۆپاراستن لە ڤایرۆسی کۆرۆنا دروست بووە.
شاری بانەی ڕۆژهەڵاتی کوردستان یەکێک لەو شارانەی ئەو بەشەی کوردستانە کە ڤایرۆسی کۆرۆنا ڕۆژ بە ڕۆژ زیاتر تێیایدا بڵاودەبێتەوە.
بە گوێرەی ئاماری میدیا نافەرمیەکان لە بانە دۆخەکە خرابە و زانکۆی زانستە پزیشکیەکانی شاری سنە ڕۆژی شەممە ٢٠ی ئازار ڕایگەیاندبوو، لە بانە ٥٩ حاڵەتی کۆرۆنا تۆمارکراون.
هەروەها بە پێی ئامارە فەرمیەکان تا ئەمڕۆ ٦ کەس لەو شارە گیانیان لەدەستداوە و باسی ئەوەش دەکرێت ژمارەی ئەو کەسانەی کە تووشی ڤایرۆسەکە بوون و گیانیان لەدەستداوە زیاترن.
هەروەها باسی ئەوەش دەکرێت نەخۆشخانەی بانە تووشی قەیرانی کەمی پێداویستی پزیشکی بووەتەوە.
دیمەنێکی ڤیدیۆی لە تۆڕە کۆمەڵایەتیەکاندا بلاوبووەتەوە کە دەلالەت لە کەمبوونی دەرفەت و پێداویستی پزیشکی دەکات و تا ئەو رادەیەی دەستکێش، دەمامک، جلەبەرگی نەخۆشخانە و کیسی جەنازەش کەمبوونەتەوە و داوای هاوکاری لە خەڵکی بانە دەکرێت.
کەسێک لە گرتە ڤیدیۆیەکەدا دەردەکەوێت و دەڵێت، برایەکی تووشی ڤایرۆسی کۆرۆنا بووە و پەرستارەکانی نەخۆشخانە جلوبەرگی تایبەت و دەستکێشیان نییە و داوای لە رێکخراو و دەزگا خێرخوازیەکان کرد، لە دابینکردنی پێداویستیە سەرەکیەکاندا هاوکاری نەخۆشخانەی بانە بکەن.
ف.ق
