نوێنەرایەتی ڕۆژئاوا لە باشووری کوردستان: با گەلەکەمان سەفەربەر بێت

نوێنەرایەتی ڕۆژئاوای کوردستان لە باشووری کوردستان ڕایگەیاند: داوا لە گەلەکەمان و تەواوی لاینە سیاسیەکان دەکەیەن لە باشوور بۆ پاراستنی دەستکەوتەکانی ڕۆژئاوای کوردستان سەفەربەر ببن.

نوێنەرایەتی خۆبەڕێوەبەرایەتی ڕۆژئاوای کوردستان لە ناوەندەکەی لە شاری سلێمانی لە لێدوانێکی  ڕۆژنامەوانیدا دەربارەی هێڕشەکانی دەوڵەتی تورکیا بۆ سەر ڕۆژئاوای کوردستان داوای هاوکاری و هەماهەنگی لە تەواوی گەلی کورد و لایەنە سیاسیەکان و گەلی باشووری کوردستان بۆ بەرەنگاربوونەوەی ‌هێڕشەکانی تورکیا کرد.

لەسەر ناوی نوێنەرایەتیەکە دکتۆر جاویدان حەسەن بەیاننامەکەی خوێندەوە و ڕایگەیاند، "ئێمە چەتەکانی داعشمان تێک شکاند و ناوچەیەکی ئارامان لە باکور و ڕۆژەهەڵاتی سوریا بۆ تەواوی پێکهاتەکان بنیات نا، ئەم دەسکەوەتە بە خوێنی هەزاران شەهید و بریندار بەرهەم هاتووە.

دکتۆر جاویدان حەسەن وتیشی:  دەستکەوتەکانی باکور ڕۆژهەڵاتی سوریا دەستکەوتی هەموو مرۆڤایەتی و گەلی کوردیشە، بۆیە ئەرکی هەموو گەلی کورد و مرۆڤایەتیە، بیپارێزن و خاونداری لێبکەن.

لەبارەی هەڵوێستی لایەنە سیاسیەکان و حکومەتی باشووری کوردستان لە کۆنفراسەکەدا نوێنەرایەتی خۆبەرێوەبەرایەتی باشووری کوردستان ڕایگەیاند، تەنها لێدوان یان بەیاننامە پێوست ناکات بەڵکوو دەبێت بە ڕوحی سەفەربەری کە ٣ ڕۆژە لە ڕۆژئاوای کوردستان ڕاگەیەندراوە چی لە دەستمان دێت پێویستە بیکەین.

تەواوی بەیانامەکە

بۆ ڕای گشتی لە ماوە ی هەشت ساڵی راِبردوودا و لە ئەنجامی شۆڕشێكی راستەقینە لە هەموو بوارەكاندا، گەلەكەمان لە رۆژئاوای كوردستان و باكور و ڕۆژهەڵاتی سوریا توانی بە پشتبەستن بە ئیرادەی خۆی چەندین گۆڕانكاری گەورە ئەنجام بدات و سیستمێكی بەڕێوەبەریی دیموكراتی بونیادبنێت, و ببێت بە دەرفەتێك بۆ تەواوی پێكهاتەكان بۆ بەدیهێنانی تەبایی وپێكەوەژیان, هەروەها ببێت بە نموونە بۆ ژیانی هاوبەش و ئازاد و ڕخساندنی دەرفەتێك بۆ چارەسەركردنی تەواوی كێشەكانی ناو سوریا, لەسەروو هەمووشیانەوە دۆزی رەوای گەلی كورد.

گومانی تێدا نییە كە ئەم دەستكەوتە مەزنانە هەموویان لە ئەنجامی قوربانی گەورەی رۆڵەكانی گەلەكەمان لە (كچ و كوڕ)كان پێكهاتوون دوای بەرخودانێكی بێ وێنە لەدژی ستەمكاری و تیرۆری چەتەكانی جبهە النصرە و احرار الشام و سوپای بەناو ئازاد, لە كۆتاییشدا سەركەوتنی مێژویی و لەناوبردنی گەورەترین و مەترسیدارترین رێكخروی تیرۆریستی لە مێژوودا ( داعش) و لەناوبردنی لەسەر زەمینی جیوگرافی، كە ئەم بەرخودانە خۆی لە خۆیدا نەك تەنها بەرگریكردن بوو لە گەلی خۆمان و ناوچەكانی خۆمان, بەڵكو بەرگریكردن بوو لەبری تەواوی مرۆڤایەتیی. ئەمەش لەكاتێكدابوو كە دەوڵەتی توركیا بەردەوام یارمەتی ئەو هەموو گروپە تیرۆرستیانە دەدات, لە سەرووی هەمووشیانەوە گروپی تیرۆریستی داعش، كە لە ئیستادا بە دەیان بەڵگە و دۆكیۆمێنت لەبەردەستن كە ئەو پەیوەندیە لە نێوانیاندا دەسەلمێنێت.

 هەروها زۆر ئاشكرا و دیاربوو دوای شكستی هەموو هەوڵەكانی ئەو چەتە تیرۆریستیانە لە بەدیهێنانی ئامانجەكانیان، دەوڵەتی تورك دوای ئەوە هەستا بە جوڵاندنی سەربازەكانی خۆی بۆ بەدیهێنانی ئەو ئامانجانەی كە چەتەكانی نەیانتوانی بەدیبهێنن، لە ئەنجامدا ئەو داگیركارییە لەسەر عەفرین سەپێنرا، و دەستكرا بە كوشتار و دەربەدەركردنی خەڵكی مەدەنی و ڕەسەنی ناوچەكە و گۆڕینی دیمۆگرافی و دەیان تاوانی دیكەی دژی مرۆڤایەتی, كە تا ئیستاش رۆژانە رفاندن و ئەشكەنجەدان و دەستدرێژی دەرهەقی ئەو خەڵكەی كە لە وێ ماون, بەردەوامە.

 دەوڵەتی فاشیستی توركیا هاتووە هەمان سیناریۆ دووبارەبكاتە و لە ناوچەكانی دیكەی ڕۆژئاوای كوردستان و باكور ڕۆژهەڵاتی سوریا، بە ئامانجی لێدان لە پرۆژەی دیموكراتی و لەناوبردنی هەر ئیرادەیەكی كورد لەوێ، ئەمەش لەدوای رێككەوتن و لێكتێگەیشتنێكی نێودەوڵەتی، سەرەڕای ئەوەی كە زۆر روون و ئاشكرایە كە خۆبەڕێوەبەری دیموكراتی لە باكور ڕۆژهەڵاتی سوریا هەرگیز نەبووە بە هەڕەشە لەسەر سنووری توركیا و هیچ كاتێك هەڕەشە یان تەنها هێرشێكیشی ئەنجام نەداوە، بەڵكو ئەو ناوچەیە و بە تایبەتی نزیك سنوورەكان ئارامترین و سەقامگیرترین ناوچەبوون، هەر وەكو خۆربەڕێوەبەری خۆمان چەندین جار دووپاتی كردبوو كە ئەوان ئامادەن بۆ هاوكاری و هەماهەنگی بۆ چەسپاندنی سەقامگیری لەو ناوچانە لە رێی پابەندبوون بە میكانیزمی پاراستنی سنوورەكان, كە لە نێوان ئەمریكا و توركیا رێككەوتنی لەسەر كرابوو ، هەروها بەردەوام ئەوەی دووپاتكردبووەوە كە بڕوای تەواویتن بە دیالۆگ و چارەسەری سیاسی و ئاشتیانە هەیە بۆ چارەسەركردنی كێشەكان لەگەڵ هەر لایەنێكدا.

ئەم ئۆپەراسیۆنە سەربازییەی توركیا لە دژی ڕۆژئاوای كوردستان و باكور و ڕۆژهەڵاتی سوریا، ئەنجامەكەی زۆر وێرانكەر دەبێت لەسەر تەواوی ناوچەكە و ئەگەری هەڵگیرساندنی شەڕێك فەراهەم دەكات, كە چەندین ساڵ درێژە دەكێشێت. ئەم هێرشە ئامانجەكەی لێدانی پڕۆژەی دیمكراسی و ئیرادەی گەلان و بە تایبەتی ئیرادەی گەلی كوردە، بۆیە ئێمە روومان لە كۆمەڵگای نێودەوڵەتییە بۆ دەستێوەردان لەم دۆخە و راوەستاندنی ئەم هێرشە و رێگانەدان بە توركیا بۆ داگیركردنی ناوچەكە و ئەنجامدانی كۆمەڵكوژی گەورە بەسەر سەری خەڵكەكەدا. هەر هێرشێكی سەربازی توركیا بێگومان قەیرانێكی مرۆیی زۆر گەورە بەدوای خۆیدا دەهێنێت و دەبێت بە هۆكاری ئاوارەبوون و دەربەدەربوونی ملیۆنان خەڵكی ئەو دەڤەرە كە لە دواجاردا دەرهاوێشتەكانی هەموو ناوچەكە دەگرێتەوە.

ئێمە بانگەوازی گەلەكەی خۆمان دەكەین لە باشووری كوردستان بۆ دەربڕینی هەڵوێستێكی گونجاو بەرامبەر ئەم هێرشانە و بینینی مەترسییەكان پێش روودانی، كە ئەمەش ئەركێكی ئەخڵاقی و نشتیمانی و نەتەوەییە، لە رێی رێكخستنەوەی رێپێوان و مانگرتنی ئاشتیانە سەرانسەری هەرێمی كوردستان، هەروها دەبێت پەرلەمان و حكومەتی هەرێمی كوردستانیش بە ئەركی خۆیان هەستن بۆ رێگریكردن لەهەر هێرشێك و پشتیوانیكردنی دەستكەوتەكانی ڕۆژئاوای كوردستان و باكوور و ڕۆژهەڵاتی سوریا و جێبەجێكردنی بڕیاری ژمارە 24ی رێكەوتی 15/10/2014 ی پەرلەمانی كوردستان, كە تایبەت بە پشتیوانیكردنی ئەزموونی خۆبەڕێوەبەری رۆژئاوای كوردستان. لە كۆتاییشدا ئێمە دووپاتدەكەینەوە كە باوەڕی زۆرمان بە هێزی سەربازی خۆمان و پرۆژەی دیموكراسی و گەلەكەمان هەیە, بۆ پاراستن و بەرگریكردن لە خاكی خۆمان، هەروها گومانمان نییە كە ئەوان پارێزەی رێبازێكی راستەقینە دەبن بۆ چارەسەركردنی تەواوی كێشەكان لەگەڵ هەموو لایەك و پاراستنی دەستكەوتەكانی گەلەكەمان و بونیادنانی سوریایەكی نا ناوەندیی و دیمكرات.

نوێنەرایەتی رۆژئاوای كوردستان لە باشووری كوردستان 9/10/2019 سلێمانی

ف.ق