یونسکۆ پەی تۆرمارکەردەیش بە میراتی جیهانی سەردای هەورامان-یش کەرد

یونسکۆ کە ڕێکوزیێوی سەر بە نەتەوە یۆگێرتەکان، پەی تۆمارکەردەی هەرێمو هەورامانی پێسەو میراتی جیهانی نمایندەو وێش حسام مەهدی-ش کیسات هەرێمەکە و نامبریا چەنڎین سەردایێ و کۆبیێش ئەنجامێ دێنێ.

جە چەنڎ ڕوێ ویەردێنە، حسام مەهدی نمایندە و هۆرسەنگنەرو یونسکۆ-ی کە ڕێکوزیێوی سەر بە نەتەوە یۆگێرتەکان و بە ڕەگەز مسر-یەن، پەی تۆمارکەردەی هەرێمو هەورامانی پێسەو میراتی جیهانی سەردای ئا هەرێمەیشە کەردەن و چەنڎین شارێ و دەگایێ هەورامانیش بەسەرێ کەردێنێوە.
مەهدی جە سەردایەکەیشنە چەنی چینە جیا جیاکێ گلێرگەو هەورامانی و وەرپرسە ئیداریەکێ هەرێمەکەی کۆبیەنەوە و سەرسامی وێش بە سروشت، بیناسازی و فەرهەنگو هەورامانی بەروستەن و واتەنەش: ئەرزیابی و هۆرسەنگنای ورد و جدی پەی تۆمارکەردەی چەنڎین دەگایێ و ناوچێ هەورامانی پێسەو میراتی جیهانی جە یونسکۆ-نە بکەرۆنە.

جە میانو سەردایی حسام مەهدی نمایندە و هۆرسەنگنەرو یونسکۆ-یەنە، چەنڎین چالاکیێ هونەریێ و فەرهەنگیێ ڕەسەنێ هەورامانی نیماییشێ و پێشکەشێ کریێنێ کە بیێنێ مایەو سەرنجو نامبریای.

یاگێ ویروستەیەن، کە ساڵێوە زیاتەرەن کە دۆسیەو هەرێمو هەورامانی جە دیمو وەرهۆرزو کوردستان (ئێران)ی دریان بە ڕکوزیاو پەروەردە، زانست و فەرهەنگو سەر بە نەتەوەیۆگێرتەکان کە ئەژناسیان بە یونسکۆ تا هەورامان چوون میراتی جیهانی تۆمار بکریۆنە. بڕیاربێ جە  مانگەکێ ئوردیبهشت‌ و خرداد-ی ویەردەیەنە پەی تۆمارکەردەیش بە میراتی جیهانی، ڕێکوزیاو یونسکۆ سەردای هەورامانیش کەردەبیێ. بەڵام بەنوگەو وەڵاوبییەی پەتا و نەوەشی کۆرۆنا ڤایرۆس-ی ئا سەردایە دما وزیا بێ پەی ئی مانگێ.

دۆسیەو هەورامانی کە پەی یونسکۆی کیانیان، ونەکۆڵیای و پەیجوری فراوان جە بوراەکێ (ئەندازیاری بیناسازی و باغداری، گەل شناسی، ژیوگەپارێزی، ئاوی، خاک، فەرهەنگ، زوان و تاریخ) جە وێش مەگێرۆنە و جە میانشەنە ئاماژە بە جیاوازیێ و تایبەتمەندییە زەنگینەکێ هەورامانی و گەلەکەیش دریان و داوا جە یونسکۆ-ی کریان پەی پارێزنایشان هەرێمو هەورامانی کە مەگنۆنە شارستانەکێ مەریوان، سەوڵاوا، پاوە، جونڕۆ و سنە-ی سەر بە ئوستانەکێ سنە-ی و کرماشان-ی پێسەو میراتی جیهانی مرۆڤایەتی تۆمار بکەرۆنە.

ئەگەر جە دمای ئەوەگێڵای حسام مەهدی نمایندە و هۆرسەنگنەرو ڕێکوزیاو یونسکۆ-ی، هەورامان چوون میراتی فەرهەنگی جیهان قبوڵ و تۆمار بکەریۆنە، ئا وەختە نەتەوە یۆگێرتەکێ و دەوڵەتو ئێرانی ناچارێنێ بودجەی تایبەت بە پارێزنای هەورامانی جە گردوو بوارەکانە دیاری بکەرانێ و ڕا نەڎانە ئا میراتە دەوڵەمەندە جیهانییە دەستکاری و وێران بکریۆنە. ئانێچە هەنگامێوە گرنگەنە تا جە ڕاشەوە زوان، وێژە، فەرهەنگ، تاریخ، بینسازی، باغداری، جیاوازیێ و تایبەتمەندیێ هەورامانی و هەورامییەکان جە فەوتیای ڕزگارێ بکریانێ و هامکات گەشەشان پنە بدریۆنە. بە گردی تۆمارکەدەکەی جە یونسکۆنە ببۆنە بە هۆکار پەی گەشەکەردەی گەشتوگێڵی و ئەوەژیوای زیاتەری جە بواری ئابورییەنە و پەرەئەسانی هەرمان و کاری زیاتەری جە هەرێمەکەنە.

٭وێنەکێ جە پەیلیانەو سەلام پاوە-ی هۆرگێریێنێ