کۆماری ئیسلامی ئێرانی و هەرێمو کوردستانی جە میانشانە پەیوەندیێ جۆربەجۆرێشان جە بواری "سیاسی، هەواڵگری و ئابوری و بازرگانی" هەنێ و ساڵانە کۆماری ئیسلامی ملیاران دۆرلارێ پوڵ و دارایی جە هەرێمی بەدەست مەوزۆنە. 
جەی ئی چوارچوەنە بارزگانی هەمەجۆر میانو ئێرانی و هەرێمیەنە بەشێوازی فراوان هەن و تازەتەرین بازرگانیچ کە جە ئاستێوی فراوان و گەورەنە ئەنجام مدریۆن، بازرگانی خاکی خامیەن.
جە ئی بارەوە ئامارگەلێوە جە هەورامان بەدەستوزیێنێ  کە جە میانشانە باس جە سەدان کامیۆنێ و باربەرێ مەکرانێ کە ڕۆچانە جە مەزو (شۆشمێ/ تەوێڵێ) خاکی خام جە ئێرانەوە مەفاڕانێوە پەی هەرێمی و جەهەرێمەوە دیسان خاکەکە مەبریۆنە پەی چەندین وڵاتێ تەرێ.
ئامارەکێ باس جە قازانجێوی ملیۆنان دۆلاری مەکەرانێ کە کاربەدەستێ ئێرانی و هەرێمی بە ورتەی و ئەسای خاکەکەیەنە بەدەستش مەوزانێ.

بەپاو هەواڵێوی کە پەلیانەو سەلام پاوەی وەڵاوکەردەنەوە، دژ بە بازرگانیکەردەیە کە بە خاکی خامی مەکریۆنە، یەعقوب حەبیبی شەمس، سەرۆکو دادگوستەری شارو پاوەی ناڕەزایەتیش نیشانەدان و ئا بابەتەشە چەنی ”ڕەئیسی“، بازڕەسو ئێرانی باس کەردەن کە جە چەند ڕوێ ویەردێنە سەردای پاوەی و شۆشمێش کەردەبێ.

جەلایێ تەرەوە، چالاکوانێ ژیوگەپارێزێ و پارێزەرێ بەرژەوەندی خەڵکی جە پاوە و هەورامان ئاشکراشان کەردەن، ڕۆچانە هامۆشیە و ئاماولوای سەدان کامیۆنێ و باربەرێ گەورێ کە خاک و کەوپەل جە ئێرانەوە پەی هەرێمو کوردستانی مەفاڕانێوە و بە پێچەوانەوە جە هەرێم پەی ئێرانی هامۆشیەشان هەن، زیانی فرەش جە ئارامی خەڵکی و ژیوگەی دان و ڤییەری هامۆشیێش جە جادەکانە زیادکەردەن. هامکات ئا بازرگانییە گەورە هیچ سودێوش پەی هەورامانی نییەن.
چالاکوانەکێ وازیارێنی، جادێ و ڕێ گەورێ جە هەرێمەکەنە دروستێ بکریانێ کە توانایی هامۆشیەو ئا سەدان باربەرێ و کامیۆنانەشان ببۆنە و بەشێ جە پوڵ و داهاتو بارزگانیەکەی پەی خزمەتگوزاریەکێ هەرێمەکەی تەرخان بکریۆن.