عەبدولستار مەجید، کاندیدی دەرنەچووی کۆمەڵی دادگەریی کوردستان، لە شاری هەولێر لە کۆنفڕانسێکی رۆژنامەنووسیدا، هەڵوێستی حزبەکەی لەسەر ئەنجامی هەڵبژاردنی ئەنجومەنی نوێنەرانی عێراق خستەڕوو.

عەبدولستار مەجید وتی:” لە بازنەی سێ و چواری هەولێر لافاوێک لە خەڵک دەنگیان بە ئێمە داوە، ئەو دەنگانە ئامانەتە و وەک چاومان دەیپارێزین. بەڵام بەداخەوە دەسەڵاتی هەرێم کە دەزانێت خەڵک بێزار و ناڕازییە، ناتوانێت هیچ پرۆسەیەکی دەنگدان بێ ساختەکاریی بەڕێوەببات.

عەبدولستار مەجید ئاماژەی بەوەدا کە ئەوان بەڵگەیان لەبەردەستە کە لە پارێزگای هەولێر ساختەکاریی، پێشێلکاریی و چەواشەکاریی هەبووە و کۆمسیۆنیشیان لێ ئاگادارکردووەتەوە و سبەینێ بەڵگەکانیان ڕادەست دەکەن.

عەبدولستار مەجید، ڕاشیگەیاند: من نزیکەی ١٥ هەزار دەنگم بەدەستهێناوە، لەکاتێکدا ئەو کەسەی لە شوێنی من بە دەرچوو ئەژمار کراوە، کەمتر لە ١٤ هەزار دەنگی هێناوە.

جەختیشکردەوە”ئەنجامی بازنەی سێ و چواری هەولێر ڕەتدەکەینەوە و قبوڵمان نییە، لە دادگای فیدراڵی سکاڵا تۆمار دەکەین، هەموو ڕێگایەکی یاسایی و مەدەنیی دەگرینە بەر و دەنگدەرانمان دەهێنینە سەر شەقام، ڕێگانادەین مافمان بفەوتێت، دڵنیابن سەری خۆمانی لەسەر دادەنێین”.

ف.ق