کەنەکە بە ئاماژەدان بە هێرشی ڕەشبگیری چالاکان وهاوڵاتیانی ڕۆژهەڵاتی کوردستان لەلایەن هێزە ئەمنیەکانی ڕژیمی ئێران دەسەڵاتی بانگەوازییەکی بڵاوکردەوە و داوای دەستێوەردانی بە پەلەی کرد.
ئەمرۆ کۆنسەی بەڕێوبەریی کۆنگرەی نەتەوەیی کوردستان- کەنەکە، دەربارەی ئەو شەپۆلە نوێیەی دەستگیرکردنی چالاکانی ژینگەیی ، مەدەنی و هاوڵاتیانی ڕۆژهەڵاتی کوردستان لەلایەن ناوەندە ئەمنییەکانی ڕژیمی ئێرانەوە بانگەوازییەکی ئاراستەی کۆمیسیاری باڵای مافەکانی مرۆڤی نەتەوە یەکگرتووەکان، ئەمنستی ئیترناشناڵ، چاودێری مافەکانی مرۆڤ، پەرلەمانی ئەورووپا، ڕێکخراوی هاوکاری ئیسلامی، باڵیۆزخانەی وڵاتان و ڕاگەیەندنەکان بڵاوکردەوە.
کەنەکە دەربارەی چارەنووسی گیراوای کوردی خەڵی رۆژهەڵاتی کوردستان هۆشداری دەدات و دەستنیشانی دەکات کە ڕژیمی ئێران بەردەوام بۆ چاوترسێن کردنی گەلانی ئێران بەردەوام هاووڵاتیانی ڕۆژهەلاتی کوردستان دەکاتە ئامانج.
لە بەشێک لە بانگەوازییەکەدا هاتووە:
بەپێی سەرچاوەکانی هەوال ژمارەی ئەو خوێندکار وچالاکوانانەی ڕۆژهەڵاتی کوردستان کە لە ڕۆژانی ڕابردوو لە لایەن ناوەندە ئەمنییەکانی ڕژیمی ئێرانەوە دەستگیرکراون گەیشتووەتە لانیکەم ٢٠ کەس. کە بریتین لە :
" لە شاری تاران ٧ خوێندکارو چالاکی کورد بە ناوەکانی؛ “سوهەیب بادرووج خەڵکی مەریوان، فەرزاد سامانی، سالار ڕەهەوی، دەریا تاڵەبانی، شەپۆل خزری، ئەفشین مام ئەحمەدی و سیروان نووری خەڵکی شاری مەهاباد” لە لایەن هێزە ئەمنییەکانی ڕژیمی ئیسلامی ئێرانەوە لە زانکۆی خواڕەزمی تاران دەستگیرکراون و گوازراونەتەوە بۆ شوێنێکی نادیار.
هەرلە شاری مەهابادی سەربە پارێزگای ورمێ، ٢ کەسی دیکە بە ناوەکانی؛ “ئیمان عەبدی و سۆران حسێن زادە ” دەستگیرکراون و گوازراونەتەوە بۆ ناوەندی ئەمنییەکان.
لە ناوچەی ڕەبەتی سە بە سەردەشت ٣ کەس بە ناوەکانی؛ “بەهمەن یووسف زادە، فەرهاد مووساپوڕ و فەرەیدوون موساپوڕ”، لەلایەن هێزەکانی ئیتلاعاتی سوپای پاسدارانی ڕژیمی ئێرانەوە دەستگیرکراون.
لە شاری مەریوانی سەربە پارێزگای سنەی ٥ هاووڵاتی بە ناوەکانی؛ “ دانا سەمەدی، زانیار موعتەمدی، سیروان کەریم نەژاد، کاروان مینویی و کارۆ عەلیداد” لە لایەن هێزە ئەمنییەکانی ڕژیمی ئێرانەوە دەستگیر کراون و گوازراونەتەوە بۆ ناوەندە ئەمنییەکان.
هەروەها لە شاری ‘بۆکان’ی سەربە پارێزگای ئورمیەش، بە لانیکەمەوە، ٤ کەس لەلایەن ناوەندە ئەمنییەکانی دەسەڵاتەوە دەستگیر کراون کە تەنیا ناسنامەی کەسێکیان بە ناوی ‘عەزیمە ناسری’ ئاشکرا بووە.
بەهۆی ئەوەی دەسەڵاتی ئێران خاوەن سیاسەتێکی دژبە کوردە، بەردەوام مەترسی، ئەشکەنجەدان و بێسەروشوێنکردنی گیراوانی کورد لە ئارادایە.
ک-ش
