سەنتەری میترۆ بۆ بەرگریکردن لە مافی ڕۆژنامەنووسان، ڕاپۆرتی ساڵانەی خۆی لەبارەی پیشێلکاریەکانی دژی رۆژنامەنووسان بڵاوکردەوە.

ڕێواس فایەق سەرۆکی پەرلەمانی هەرێمی کوردستانیش بەشداری لە کۆنفڕانسی ڕۆژنامەنووسی سەنتەری میترۆ کرد و وتی، "ڕاگەیەنراوی پارتەکان هەیە، گەل دەیانبینێت و دەیانناسێت. لەلایەکی دیکەوە هەندێک میدیا هەن کە خۆیان وەک بێلایەن لەقەڵەمدەدەن، بەڵام پارتەکان پشتگیریان دەکەن و دەزانرێت کە نزیکی ئەوانن، هەوڵ دەدەن گەندەڵی بشارنەوە، بانگەشەیان بۆ دەکەن. گەل دەیانناسێت و دەزانێت. لەلایەکی دیکە میدیای ئازاد هەیە کە چاو و گوێی خەڵکن. بەڵام ئێستا لە لاوازترین سەردەمی خۆیاندان. بە تایبەتی لاوازکراون و لەجێگەیان هەندێک میدیا کە لایەنگری پارتەکانن، بەهێزکراون."

ڕێواس فایەق باسی ئەوەشی کرد، "حکومەتەکەمان بڕیار لەدژی یاساکان دەدات. بەوهۆیەوە ٣ ساڵە میدیای ئازاد لاواز بووە. ئەو ئامارەی کە سەنتەری میترۆ ئاشکرای کرد، پیشانی دەدات کە میدیای ئازاد نەماوە."

ف.ق