یەكێتی: هێرشی و داگیركاری توركیا شەرمەزار دەکەین
مەڵبەندی یەكێتی لە ڕاگیندراوێکدا هەوڵە داگیرکار و تاڵانکارەیەکانی دەوڵەتی تورکیای بۆ سەر خاکی باشوری کوردستان شەرمەزار کرد.
مەڵبەندی یەكێتی لە ڕاگیندراوێکدا هەوڵە داگیرکار و تاڵانکارەیەکانی دەوڵەتی تورکیای بۆ سەر خاکی باشوری کوردستان شەرمەزار کرد.
ئاراس محەمەد ئاغا ئەندامی سەركردایەتی و لێپرسراوی مەڵبەندی دهۆكی یەكێتیی لە پەیامێكدا ساڵیادی دامەزراندنی حزبەكەی هێرش و داگیرکای تورکیای بۆ سەر خاکی باشوری کوردستان شەرمەزار کرد.
"دەهۆک ڕوو بەڕووی داگیرکاری بۆتەوە"
لێپرسراوی مەڵبەندی یەكێتی لە دهۆك لە پەیامەكەیدا باسی لە ڕەوشی ئێستای بادینان كرد و ڕایگەیاند:" دۆخی دەڤەری بادینان مایەی دڵگرانییەكی گەورەیە، چونكە سەرباری ئاستەنگی ژیان، بەرتەسككردنەوەی ئازادییەكان و پاوانكردنی داهات و سامانی گشتی، ناوچەكەشیان ڕووبەڕووی هێرشی و داگیركاری توركیا بووەتەوە و دارستانەكانی ناوچەكە و ڕەزو باغی هاووڵاتییان دەسووتێنێت."
هاوکات لێپرسراوای مەڵبەندی یەكێتی لە دهۆك ئەو داگیركارییەی توركیای ئیدانە كرد و داواشی لە سەرۆكایەتی و پەرلەمان و حكومەت و لایەنە سیاسییەكانی هەرێمی كوردستان كرد هەڵوێستی توندیان لەوبارەیەوە هەبێت.
دەقی پەیامەكەی لێپرسراوی مەڵبەندی یەكێتی لە دهۆك
ماڵباتێن سەرفرازێن شەهیدان
پێشمەرگەهێن قارەمان و پارێزەرێن ئاخا وەڵاتی
خەلكێ ب ڕوومەتێ دەڤەرا بادینان
كادر و هەڤال و هەڤخەباتێن ئێكەتی نیشتیمانی كوردستان
سڵاڤەكا وەفاداریێ بۆ هەوەیێن هێژا
بهەلكەفتا 46 مین ساڵڕۆژا دامەزراندنا ئێكەتی نیشتیمانی كوردستان و 45 مین ساڵڕۆژا بەرپابوونا شۆڕەشا نوویا گەلێ كوردستانێ، گەرمترین پیرۆزباهیان ئاراستەی هەوە دكەین، ئومێدەوارین بەردەوامیێ بدەنە پشتەڤانییا كاروانێ تێكۆشانا پڕی سەروەری و قوربانیدانا ئێكەتییانەیا گەلێ كوردستانێ كو ل پێشی 46 ساڵان و د ڕۆژەكا وەكوو ئەڤرۆدا ب ڕابەراتییا سەرۆك مام جەلال بدرویشمێ ئێكەتی نیشتمانی كوردستان (بۆچی..؟) دەستپێكر و قۆناغێن هەری سەخت و دژوار دەربازكرن هەتا ئەڤرۆیا مە هاتییە دی و شیایی بەرسڤا وێ (بۆچیێ) بدەت.
ئێكەتی نیشتیمانی كوردستان مەزنترین دەستكەفت و سەروەری، دهەموو بوار و بیاڤەكیدا و لسەر ئاستێ هەرچوار پارچێن كوردستانێ، دیسان لسەر ئاستێن عیراقێ و دەڤەرێ تۆماركرینە، دوست و دوژمن، دیروكا دوور و نێزیك، رووبارەكێ خوینا شەهیدان، شەهدەیێ بۆ خەبات و فیداكارییا ئێكەتی نیشتیمانی ددەن.
ئەڤرۆ دڤێ قۆناغێ و دڤی سەردەمیدا، نەخاسم پشتی بەستنا چوارەم كۆنگرە، ئێكەتیێ قۆناغا نیبوونەڤێ دەست پێكرییە، ب كریار ژی نوویبوونەڤە دگشت جومگەهێن ئێكەتیێدا ڕەنگڤەدایە، ب سەمت و سیاسەتەكا نووتر، ب هزر و بیروباوەرێن گەنجانە، ل ژێر فەلسەفا سەرۆك مام جەلال و دەستەیا دامەزرینەر داڕشتی درێژی ب پێڤاژوویا خەباتێ دهێتەدان.
خەلكێ شەڕەفەمەندێ دەڤەرا بادینان
ئەڤرۆ قەبخوازیێن ل پێشییا گەلێ كورد ل باشوورێ كوردستانێ و بتایبەتی ل دەڤەرا بادینان، زۆر دگران و مەزنن، زێدەباری ئاستەنگێن ژیانێ، بەرتەسككرنا ئازادییان، پاوانكرنا داهات و سامانێن گشتی، دیسان دەڤەرا بادینان ژ ملێ باكووریڤە كەتییە بەر هێڕشەكا داگیركاری و وێرانكەرا لەشكەرێ دەولەتا تورك، دڤان هێڕش و گریارێن خۆدا، تەڕ و هشكان پێكڤە دسوژن، بدەهان گوند هاتنە چۆڵكرن، دەست ب سوتن و وێرانكرنا دارستان و ڕەزوباغێن خەلكێ بێ دەستهەڵان كرییە، بڤێ هەلكەفتێ، و ژ وی پێگەهێ ئێكەتی نیشتیمانی لسەر هاتییە دامەزراندن، ئەم ڤێ هەڵمەتا داگیركاری شەرمزار دكەین، داخوازێ ژ سەرۆكاتی و پەڕلەمان و حكومەت و لایەنێن سیاسیێن هەرێمێ دكەین هەڵویستەكێ ڕژد وەربگرن و فشارێن زێدەتر ب ڕێیا ناڤەندێن نێڤدەولەتی بكەن ژبۆ ڕاگرتنا دەستدرێژیێن لەشكەرێ داگیركەرێ توركیا.
دیسان بهەلكەفتا 46مین ساڵڕۆژا دامەزراندنا ئێكەتی نیشتیمانی كوردستان، خەلكێ خۆ دڵنیا دكەین كو بەردەوامیێ بدەینە سەمتا دیموكراسیەت و مافێن ئازادییا ڕۆژنامەڤانی و ڕادەربڕینێ و هەموو هەوڵێن مە پێخەمەت بەرپاكرنا وان مافان بمینن، و كار بكەین ژبۆ دابینكرنا ژیانەكا خۆشگوزەران بۆ خەلكێ خۆ، نەخاسم ماڵباتێن شەهیدان و هێزێن پێشمەرگە و هەموو تەخ و چینێن جڤاكی.
پیرۆزبیت لهەوە یادا 46 مین ساڵڕۆژا دامەزراندنا ئێكەتی نیشتیمانی كوردستان
بەرز و بلند بمینیت ئاڵایێ كەسكێ ئێكەتی نیشتیمانی
ئاراس محەمەد ئاغا
ئەندامێ جڤاتا سەرکردایەتییا ئێکەتی نیشتیمانی کوردستان
بەرپرسێ مەڵبەندێ چوارێ دهوک
ڕ.ح