ھاوڵاتیانی بناری قەندیل لەدژی بەکارھێنانی چەکی کیمیایی لەگوندی ئێنزە گردبوونەوەیەکیان ئەنجامدا و داوایان لە ڕێکخراوەکانی مافی مرۆڤ کرد لە بەرانبەر ئەو تاوانانە بێنە دەنگ.
بەڕێز خدر، ھاوڵاتی بناری قەندیل وەک یەکێک لە ئەنجامدەرانی چالاکیەکە بە ئاژانسی ڕۆژنیوزی راگەیاند، دەوڵەتی داگیرکەری تورک شکستی گەورەی ھێناوە لەبەرامبەر ھێز و ئیرادە و بەرخۆدان و خۆڕاگری، بۆیە دەستی کردووە بە بەکارھێنانی چەکی قەدەغەکراوی کیمیایی بۆ شاردنەوەی شکستەکانی.
ئەو هاوڵاتیەی بناری قەندیل وتیشی: دەوڵەتی داگیرکەری تورک بەبەرچاوی جیھانەوە، پێچەوانەی ھەموو یاسا و نێودەوڵەتیەکان یاساکانی جەنگ پێشێل دەکات و چەکی قەدەغە کراوی کیمیایی بەکاردەھێنێت و ئەوانیش بێدەنگن لەئاست ئەو پێشێلکاریە.
خۆپیشاندەران داوایان لە خەڵکی ھەرچوار پارچەی کوردستان و ھەموو دامەزراوە نێودەوڵەتی و ڕێکخراوەکانی مافی مرۆڤ کرد کە بەئەرکی ئەخلاقی و یاسایی خۆیان ھەستن و بەزووترین کات پێش لەوتاوانە دژە مرۆڤایەتیانە بگرن.
لە مانگی نیسانی ئەمساڵەوە دەوڵەتی داگیرکەری تورک بەچەکی کیمییای ھێرش دەکاتە سەر باشووری کوردستان و بەو ھۆیەوە چەندنین ھاوڵاتی مەدەنی شەهید و بریندار بوون.
ف.ق
