دارستانەکۍ هەورامانی بە ئاگاداری ئیدارەو ئیتلاعاتی تاڵانۍ کریانۍ

جە شارەکڵەکۍ دزڵیۍ و هەورامانو تەختی و چنڎ یاگۍ تەرۍ وەراسانو هەورامانی، ماۋێۋەن کەسێو بە نامۍ والێد شەفیعی کە خەڵکو هەرێمەکەین، دەسشدان داربڕییە و تاڵانکەردەی دارستانەکان. زانیان ئا دڕەختۍ کە بڕیەنێۋە (کەکەۋی، ۋەنی، بڵچی، مرۋە کۊیی، مازوو و بەڵوۍ)نۍ.

جە ئا بارەۋە سەرچەمێۋ جە دزڵیەۋە بە بەشو هەورامی ئاژانسەکەیمان فوڕات (ANF)ی ۋات: ”دما بەدمای ئانەی کە خەڵکو هەرێمەکەی جە داربڕیەکەی هایدارۍ بیێنێۋە، لۋێنۍ یاگۍ تاوانەکەی و ناڕەزایەتیشان نیشانەدان و نامبریا ڕەمان و وێش شاردەنەوە“.

هەرپاسە ۋاتیچش: خەڵکی بە نیشانۍ ناڕەزایەتیی نیشاندای لۋێنۍ سەرو یو جە پاسگاکانو ڕژێمو کۆمارو ئیسلامی ئێرانی کە نزیکەن جە یۊ جە ئا یاگا کە دارەکێش چنە بڕیێنێۋە. جە ۋەرانۋەرەنە فەرماندەو پاسگاکەی بە خەڵکەکەیش ۋاتەن؛ والێد شەفیعی بە ئاگاداری ئیدارەو ئیتلاعاتی دارەکێش بڕیێنێۋە و کاغەزو ئا ئیدارەیش پنە بیەن و پەوکی ئێمە ڕاگیریمان ۋنە نەکەردەن".

بەپاو زانیارییەکان، خەڵکی و ژیوگەپارێزۍ هەرێمەکەی چنڎین جارۍ لۋێنۍ سەر یانەو والێد شەفیعی و نامبریا وێش شاردنەوە و تەلەفۆنەکەش ۋستەنەرە. خەڵکی و ژیوگەپارێزۍ بە کەسوکارەکەیش ۋاتەن؛ زوو یان دێر مشیۆم باجو تاوانەکەیش بڎۆنە و هەرپاسە بە ئاسانی سەرشەرە نمشۆنە.